في ضيافه فلان ضيف الحلقه ( esraa)

**Mohamed Hashem** · 12-03-2009, 05:13 PM

المشاركة الأصلية كتبت بواسطة اسامه البنا

واله المنتدي كله منور بيك يا هندسه

وبقول من وجهه نظري اننا نديك اجازه بسبب العيد

ونتواصل بعد العيد ان شاء الله

فتره العيد هتبقي لتلاقي الاسئله فقط

كل عام انت بخير يا أسامه

**ALY ELSAYED** · 12-03-2009, 02:27 AM

بشمهندس محمد منورنا ومنور الدنيا والله

سمعنا ان في رحلتك الاخيره وانتا راجع من مرسي علم

قابل حضرتك في البحر امواج ارتفاعها 4 امتار

ياريت نعرف كان موقفك ايه وياريت تحكلنا عن بعض المواقف الي بتقبلك في البحر

وللحديث بقيه ....................

**Mohamed Hashem** · 12-03-2009, 05:28 PM

تسلم يا كارمو انت اللى منور
عرفت منين ؟؟؟؟؟؟؟؟؟؟؟؟؟؟ ههههههههههههههههههههه
عموما آخر رحلة فعلا كانت على سواحل البحر الأحمر .. جغرافيا هى رأس صغيره على الساحل جنوب القصير بحوالى 130 كيلومتر وإسمها رأس أم تنضبه Umm Tanduba أما مرسى علم فدى مدينة وليست على الساحل وإنما تبعد عن الساحل حوالى 15 كيلومتر وهى مدينة صغيره واكتسبت شهرتها من حاجتين : الاول السياحة فهناك تم اعلان المنطقة محمية طبيعية وهى فعلا تستاهل وكلها مناظر ساحره للجبل والصحراء النقية البكر فضلا عن المياه ما اقولكش على المناظر الساحره للمرجان الطبيعى واعماق بسيطة جدا 2 متر فقط يعنى اى واحد يستطيع بماسك او نظاره بحر وبلا اى اسطوانات يغطس ويتفرج على المرجان والكائنات الغريبة والاسماك الملونة اللى عايشه جواه ..
والسياح من كل العالم بينزلوا فى مركز غطس هناك ليوم او يومين علشان يتعلموا الغطس ويتفرجوا على اجمل سواحل البحر الاحمر
دا اللى شفته .. اللى سمعته كمان ان هناك منطقة فى البحر اسمها بيت الدولفين عايش فيها 5000 حيوان من حيوانات الدرفيل فى نطاق المحمية الطبيعية وبييجى لها زوار كتير جدا للغطس وللفرجه على الحيوان دا فى بيئته الطبيعية ولاسيما انه بيعمل حركات بهلوانية من نفسه كده كنوع من اللعب وبدون اى مدربين وكل ده فى بيته الطبيعى فى البحر ... اكيد المنظر دا تحفه .. والمكان الثانى اللى بيجذب الغطس السياحى هناك نقطة اخرى اسمها خليج القرش أو shark bay وهى فعلا مليئة بأسماك القرش بس قرش من النوع الرمادى العادى اللى أحجامه مش بتزيد عن المتر ونصف .. طبعا فى الماء ممكن يشكل خطورة ولكن لو محدش اثاره مش حيهاجم ومن حكايات السكان المحليين هناك .. واحد اسمه محمد من قبيلة اسمها العبابده (شغال فى مركز الغطس) محمد شرح لى ان القرش بيهاجم لما يخاف وان فى عشرين سنة صادف حادثه واحده لسائحة ايطالية تعرضت لهجمه القرش وكانت جروحها خطيره
الجديد فى الموضوع ان مرسى علم – ودا الموضوع الثانى لشهرة البلد – هى اكتشاف منجم ذهب الاكبر من نوعه فى العالم

وللحديث بقية

**Mohamed Hashem** · 12-03-2009, 09:55 PM

منجم الذهب اللى بأكلمكو عليه ده أكبر منجم للذهب فى العالم وانا نفسى استغربت جدا لما سمعت الكلام ده .. لكن مسئول كبير من الشركة القائمة بالتنقيب (مصرى الجنسية) هو اللى قال لى كده ... وفيه استثمارات ضخمة جدا فى المنجم ده .. أعتقد انها حتعود على البلد بالخير ولو انه مفيش حاجه بتبان ابدا ... ويبدو ان كلامه صح جدا لأنى لاحظت - وزملائى أيضا - ان الرمال هناك .. رمال الصحراء العادية مختلطة بذرات دقيقة من الذهب .. طبعا مش حتصدقوا .. انا برضه مكنتش مصدق زيكو .. إلى ان شفت بعينى وسألنا طبعا فأكدوا لنا الملاحظة بل وسمعت ان طن الرمال يستخرج منه ما يوازى جرام .. وبالنسبة لعرق الذهب الأصلى .. مفيش أى معنى انهم يلتفتوا لذرات الذهب المتواجد فى الرمال ده
وبمعنى آخر انه استخراجه من الرمال غير مجدى اقتصاديا مقارنة بالمنجم الاصلى الذى يبعد 35 كيلو متر فى عمق الصحراء .. والطريف أن واحد من الزملاء ملأ زجاجه مياه بلاستيك كبيره بالرمال ولما رجع راح لورشة ذهب للتأكد من ذلك .. وطلعت الذرات اللامعه دى ... ذهب فعلا
المهم .. معلش طولت عليكم
اقولك بقى يا كارمو حكاية الأمواج العالية .. طبعا احنا ذهبنا للموقع ده عن طريق البحر ... سامع واحد بيقول روحتوها عوم ؟ لا يا خفيف .. رحنا مقطورين بمركب مخصصة للقطر Tug Boat ولأن الوحدات البحرية اللى بنشتغل عليها ثقيله نسبيا .. سرعة القطر بتبقى بطيئة جدا
المهم .. أخدنا حوالى 3 أيام فى الذهاب وخمسه فى العوده ودا كا بسبب سوء الأحوال الجوية .. اللى حصل .. البحر قام علينا (يعنى أصبح عالى) والريح وصلت لحوالى 40 عقده (حوالى 70كم/ساعه) أغلب الوقت ووصل ارتفاع الموج لأربعه متر .. أينعم دا بحر مش وحش قوى لأنى شفت أسوأ من كده بكتير
عموما .. يا على الأحوال الجوية السيئة بتكون خطورتها نسبية يعنى ريح متوسطه وامواج مترين بالنسبة لمركب صيد صغير ممكن تكون خطر .. بينما عادية لسفن أخرى أكبر وهكذا

الحمد لله .. احنا فعلا .. كنا قلقانين فى فترة ووقضيت 24 ساعه صاحى .. مش عارف أنام من الدرفله وأهتزازا البارج بشكل مقلق .. لكن الحمد لله .. ربنا هو الحافظ

آسف على الاطاله

**ALY ELSAYED** · 12-04-2009, 02:57 PM

والله مش عارف اقولك ايه يا بشمهندس

بس لازم تعرف ان في ناس بتسئل عليك ومهتمه بااخبارك

ورد حضرتك ممتع جدا جدا الواحد عمره ميزهق او يمل من كلام حضرتك

وبعد الحديث الجميل ده انا مشتاق جدا اني ازور البحر الاحمر

لاني مرحتش هناااااااك قبل كده خالص

بشكرك جدا يا هندسه وجزاك الله كل خير

**Mohamed Hashem** · 12-04-2009, 05:42 PM

المشاركة الأصلية كتبت بواسطة ALY ELSAYED

والله مش عارف اقولك ايه يا بشمهندس

بس لازم تعرف ان في ناس بتسئل عليك ومهتمه بااخبارك

ورد حضرتك ممتع جدا جدا الواحد عمره ميزهق او يمل من كلام حضرتك

وبعد الحديث الجميل ده انا مشتاق جدا اني ازور البحر الاحمر

لاني مرحتش هناااااااك قبل كده خالص

بشكرك جدا يا هندسه وجزاك الله كل خير

ربنا يكرمك يا على يارب .. شكرا جدا ليك طبعا ولكل اللى يسال عنى .. تسأل العافيه عنهم دايما يارب .. أنا آسف دايما بأكون مختفى كده ووقتى مش ملكى .. بس أتمنى والله نجتمع كلنا مره يارب سوا

**Wild_Angel** · 12-04-2009, 03:36 PM

بجد ربنا يكرم حضرتك ويزيدك
ويبعد عن حضرتك وعننا جميعاً كل سوء

طبعاً انا بقالى مده كبيره أوى مدخلتش موضوع الضيافه
وطبعاً قبل كل شئ برحب بحضرتك هنا

وانا مش حسأل إلا كام سؤال

1- لو حضرتك تختصر تجربتك الحياتيه تقولنا ايه عنها ؟
2 - لو حضرتك صحيت الصبح وكنت رئيس جمهوريه مين الناس اللى حتعينهم فى الوزارات من المنتدى ؟
3 - أمتى بتحس أنك قريب جداً من ربنا وأمتى بتحس أنك بتأنب نفسك أنها مش بتطاوعك وبتعصيك ؟
4 - لو حضرتك بتحضر أكل .. أمتى بتعمل كده ؟ وأيه الحاجات اللى بتفكر فيها وانت بتعمل أكل ؟

كفايه كده :) النهارده
وبجد احنا سعداء جداً اننا فى ضيافتك هنا
ويارب ما نتقل على حضرتك فى الاسئله

**Mohamed Hashem** · 12-04-2009, 06:12 PM

المشاركة الأصلية كتبت بواسطة Wild_Angel

وانا مش حسأل إلا كام سؤال

1- لو حضرتك تختصر تجربتك الحياتيه تقولنا ايه عنها ؟
2 - لو حضرتك صحيت الصبح وكنت رئيس جمهوريه مين الناس اللى حتعينهم فى الوزارات من المنتدى ؟
3 - أمتى بتحس أنك قريب جداً من ربنا وأمتى بتحس أنك بتأنب نفسك أنها مش بتطاوعك وبتعصيك ؟
4 - لو حضرتك بتحضر أكل .. أمتى بتعمل كده ؟ وأيه الحاجات اللى بتفكر فيها وانت بتعمل أكل ؟

كفايه كده :) النهارده
وبجد احنا سعداء جداً اننا فى ضيافتك هنا
ويارب ما نتقل على حضرتك فى الاسئله

شكرا جزيلا يا أخت وايلد .. سعيد جدا انى معاكم والله هنا أو فى أى مكان
بالنسبة لأسئلة حضرتك :
1
التجربة الحيايتة كلها لسه قدامها كتير علشان أقدر أقيمها
ولكن بشكل عام أنا مش راض عنها تماما .. حاسس باستمرار انها تشبه المسودة مليئة بالمحاولة والخطأ
2
لو صحيت الصبح ولقيت نفسى رئيس الجمهورية – ودا شئ مش لذيذ على فكره – سأشكل وزارة كالآتى
رئيس مجلس الوزراء : الدكتور جمعه داوود
وزير الصحة .. محبة الرحمن
وزير المالية .. نهى شعبان (تعمل لنا تصميم للفلوس احلى شوية )
وزير الدفاع .. حسن عشرة
وزير الاسكان .. اسلام عمران
وزير العمل .. محمود سليم
وزير الزراعة .. محب للرحمه
وزير الكهرباء والطاقة .. خالد موبوتو
وزير الخارجية .. ايمن جمال
وزير الداخلية .. الاستاذ محمد سعد
وزير التعليم .. دكتور سيد الزغبى
وزير الصناعة .. اسلام ممدوح
وزير الثقافة .. على السيد كارمو
وزير السياحة .. يوسف مصطفى
وزير البترول .. أسامه البنا
وزير النقل .. المهندس دفع الله حمدان هجو
وزير الاوقاف .. وايلد آنجل
وزير التخطيط .. محمد الفرارجى
وزير البيئة .. مروة محمود
وباقى الوزارات اللى لم اذكرها .. حألغيها .. ملهاش لزمة أساسا
وتانى يوم حاقدم استقالتى
3
والله انتى عارفه الايمان يزيد وينقص .. بس عاده الواحد بيكون هادى وراض عن نفسه – نسبيا – فى ايام جميلة زى رمضان وخلافه
4
موضوع الأكل والطبيخ والمطبخ والاكلات .. دى كانت عاده اكتسبتها من سنين العمل الأولى .. لم أكن مرتبطا بالمره لا جواز ولا غيره وكنا بنسافر كتير .. وكانت أغلب سفرياتنا داخل الجمهورية فى أماكن نائية ولم يكن بها مطاعم بالمعنى المفهوم فكنا لابد ان نتعلم شيئا من تحضير الاكل والموضوع تطور معايا بعد الجواز .. الى ان اصبحت شبه عاده .. واللى بيشجعنى طبعا زوجتى العزيزة – بس طبعا تشجيع محسوب – والاولاد لأنهم بيطلبوا حاجات غريبة

مرة تانيو باشكرك ... سعيد جدا بأسئلتك

**Mahmoud Slem** · 12-04-2009, 04:02 PM

اهلا بحضرتك يا بشمهندس

وبجد اختيار جميل جدا ان حضتك هو الضيف

وان شاء الله نستمتع بحضرتك

ومش هسال حضرتك غير سؤال واحد بس

امتى حسيت انك ضعيف ... مش ضعف جسدى لا ... موقف مش عارف تتصرف فيه ؟؟