في ضيافه فلان ضيف الحلقه ( esraa)

[IsLaMiC GirL]

بما انى مسألتش قبل كدة وللاسف مكنتيش متابعة اوى وكان نفسى اسئل ناس كتير بس يالله بقى مش مهم كله قام بالواجب معاهم بس ملحوقة فأعوض دة فى جودى الجميلة :p

1 2 3 استعدىىىىىىى

ازيك عاملة اية؟

اسئلة صغننة وخفيفة خالص متقلقيش

بسم الله

اية رأيك فى دفعتك؟
عايزة تشتغلى والا لا ؟وتفضلى تشتغلى فى مصر والا برة مصر؟
اية الحلم اللى حلمتى بية وحققتيه ؟ واية اللى لسه محققتهوش؟
اية الانطباع الاول اللى الناس بتاخدة عنك دايما؟
اية الصفة اللى بضايقك فى نفسك ونفسك تتخلصى منها؟
اية اكتر حاجة ممكن تضايقك فى الشخص اللى بتتعاملى معاه؟
واية اكتر صفة تحبى تبقى موجودة فى الشخص اللى بتتعاملى معاه؟
اية رأيك فى الحب من اول نظرة ؟
هدية جتلك فرحتى بيها اوى كانت اية؟ ومن ميييين؟
اية الحكمة اللى بتؤمنى بيها؟
اية هوة الامان بالنسبالك؟
اية اكتر حاجة ممكن تفرحك؟
اية الصفات اللى لو لقتيها فى الشخص اللى اتقدملك تقول لا والف لا ؟
قوليلنا موقف ضحكك اوى؟

*تعملى اية فى المواقف دى:
لو وانتى ماشية فى امان الله ومتشيكة ووراكى مشوار مهم هوب راح عيل صغير رش عليكى مية هتعملى معاه اية؟
لو لقيتى واحدة جية بتسلم عليكى وانتى متعرفهاش هتعملى اية ساعتها؟
لو واحد جة قالك بحبك وانتى فى قبول هيكون رد فعلك اية؟ ولو مش قبلاة هتقوليله اية ؟
لو بتحبى واحد وصحبتك جت قالتلك انها بتحبة ؟ ساعتها هتختارى مين الحب والا الصداقة؟
لو اللى بتحبية جة وقالك معلش مش هنقدر نكمل مع بعض؟
لو لقيتى واحدة صحبتك متغيرة معاكى ومن غير اسباب وسألتيها قالتلك مفيش حاجة؟
لو حد حرجك وسط صحابك؟

اختارى 3 من المنتدى ووجهلهم نصيحة او كلمة اوى اى حاجة

توجهى الكلمات دى لمين

كلمة شكر
كلمة عتاب
كلمة حب

بتمثلك اية الاشياء دى

الصدااقة
الحب
الاسرة
الكلية
البحر
الورد

رتبى الحاجات دى

الاسرة-الشغل-الحب-المال-الصداقة


بس كدة كفاية دول المرادى

شفتى انا طيبة ازاى

[Mimi]

بما انى مسألتش قبل كدة وللاسف مكنتيش متابعة اوى وكان نفسى اسئل ناس كتير بس يالله بقى مش مهم كله قام بالواجب معاهم بس ملحوقة فأعوض دة فى جودى الجميلة :p

يلا معلش ياقلبي هتعوضيها ان شاء الله بس هو انتي هتعوضي كل الضيوف اللي فاتو فيا ولا ايه هههههههههه : D

1 2 3 استعدىىىىىىى

I'm Ready Sweety

ازيك عاملة اية؟

الحمد لله تمام ياقلبي انتي عامله ايه كدا ؟

اسئلة صغننة وخفيفة خالص متقلقيش

ماشي معاكي مفيش اي قلق : D
بسم الله

اية رأيك فى دفعتك؟

هقولك ياروحي زي ما قلت قبل كدا اني في حالي جدآ في الكلية ومليش احتكاك جامد بدفعتي مع اننا عددنا تقريبآ 120 بس يعني كلنا عارفين بعض كويس بس مش بحب اتعامل مع ناس كتير وبحاول اخلي دايرة صداقتي صغيرة جدآ بس عمومآ مفيش مشاكل مع اي حد فيهم وكلهم كويسين .

عايزة تشتغلى والا لا ؟وتفضلى تشتغلى فى مصر والا برة مصر

أكيد أحب اشتغل لاني بحب اوي المجال اللي بدرسه بجد ونفسي اديه من طاقتي على قد ما اقدر وبالنسبة لمكان الشغل ان شاء الله هيكون برا عشان بابا بيشتغل في نفس التخصص والمكان متوفر يعني غير باه اني مش عايزه ابعد عن اهلي اكتر من كدا .

اية الحلم اللى حلمتى بية وحققتيه ؟ واية اللى لسه محققتهوش؟

زي ما قلت بردو لسه يعني مش لاقية حلم حلمته واتحقق بشكل واضح بس ارجع واقول اني قنوعة جدآ باي حاجة ومؤمنة بالقدر ومفيش حاجة بتحصل الا ما بتكون خير من عند ربنا أما باه اللي لسه محققتوش فهو اني نفسي اعمل دراسات عليا بعد ما اخلص ان شاء الله واحترف كل شغل الجرافيكس والتصميم واسافر تركيا .

اية الانطباع الاول اللى الناس بتاخدة عنك دايما؟

الهدوء وبالنسبة للبنات كتير قالولي كنا بنشوف فيكي في الاول انك مغرورة بس ربنا يحفظنا من الغرور انا بكره الصفة دي .

اية الصفة اللى بضايقك فى نفسك ونفسك تتخلصى منها؟

أكتر صفة ان معنديش ثقة في نفسي وافتكر من كتر ما اتقالتلي الكلمة دي من ماما وبابا ومن الناس بقت طبع فيا وحاولت كتير ابقى واثقة في نفسي او في اللي بقدمه بس مش قادرة دايمآ عندي حتة كدا مهزوزة ، فنفسي اتخلص من الصفة السيئة دي .

اية اكتر حاجة ممكن تضايقك فى الشخص اللى بتتعاملى معاه؟

بجد اكتر حاجة تدايقني في اللي قدامي لو رغاي وكمان مش بحب الناس اللي بتعد تمدح في نفسها كتير بس اكتر حاجة فعلآ هي الرغي شئ مزعج جدآ جدآ .

واية اكتر صفة تحبى تبقى موجودة فى الشخص اللى بتتعاملى معاه؟

الوضوح والصراحة

اية رأيك فى الحب من اول نظرة ؟

بيحصل بس لناس وناس ممكن تبقى فعلآ هي نظرة الحب مع ناس وممكن تبقى مجرد نظرة اعجاب . بس عمومآ مجربتهاش عشان اقولك ياقلبي .

هدية جتلك فرحتى بيها اوى كانت اية؟ ومن ميييين؟

اممممم اه كانت أورج YAMAHA EZ-30 وكان اللي جابهالي بابا فرحت بيها اوي لاني بحب العزف والميوزيك

اية الحكمة اللى بتؤمنى بيها؟

في حكم كتير اوي بحبها بس خليني اكمل اجابات الاسئلة التانية وارجع على دا ، بصي من ضمن الحكم اللي بحبها بتقول تكلم وأنت غاضب .. فستقول اعظم حديث تندم عليه طوال حياتك. وفي واحدة تانية بتقول فيما معناه يعني من قال لك أنه يحبك مثل أخيه ..فتذكر قابيل وهابيل .

اية هوة الامان بالنسبالك؟ احساسي دايمآ بربنا

اية اكتر حاجة ممكن تفرحك؟ اني اشوف فرحة اهلي في قلوبهم

اية الصفات اللى لو لقتيها فى الشخص اللى اتقدملك تقول لا والف لا ؟ الغيرة - الانانية - الكدب - البخل

قوليلنا موقف ضحكك اوى؟ مش فاكرة والله بس بردو هجاوب وارجع للسؤال دا ، والله مش فاكرة انا فكرت كتير بس حاليا مش قادرة افتكر حاجة محددة بس هقولك حاجة دايمآ تضحك اصحابي عليا اني طول ما انا ماشية معاهم ومندمجة باه في كلامهم لازم اتخبط في حاجة وخصوصآ كتفي يااما في عمود او في دولاب او في حيطة وهكذا : D

*تعملى اية فى المواقف دى:

لو وانتى ماشية فى امان الله ومتشيكة ووراكى مشوار مهم هوب راح عيل صغير رش عليكى مية هتعملى معاه اية؟
يالهوووي ايه الموقف دا هزعق للولد طبعآ بس مستحيل هكمل المشوار بالمنظر دا ، فهرجع البيت اظبط نفسي تاني وانزل عادي باه ما ممكن المواصلات هي اللي تأخرني في كذا حاجة ممكن تأخرني بس هفضل مثلا شهر كامل متغاظة من الولد دا .

لو لقيتى واحدة جية بتسلم عليكى وانتى متعرفهاش هتعملى اية ساعتها؟

يااااه ليه بس كدا دي حصلت معايا كتير اوي بتحرج اوي بس بكلمها كأني عارفاها وفاكراها بدون ما اقول اسمها بس عارفه دي لو قابلتني في الشارع هتكون أهون من انها تكلمني في الموبايل ، لان في بنتين كانو بيكلموني علطول وانا لحد هذه اللحظة مش عارفاهم بجد . بس الحمد لله معدوش بيتصلو : D

لو واحد جة قالك بحبك وانتى فى قبول هيكون رد فعلك اية؟ ولو مش قبلاة هتقوليله اية ؟

لو في قبول هقوله طيب هبقى افكر في الموضوع وارد عليك ههههههههه يعني يااسلاميك بمشي دايمآ الموضوع بشكل كوميدي مش بفضل يفضل بشكل رومانسي عشان بتحرج جامد أكيد لو قلتله كدا هيتحرج بس بردو مش هينفع ارد عليك بنفس كلمته حتى لو كانت روحي فيه ، انما لو مفيش قبول هصارحه في لحظتها وافهمه انه انسان كويس ويستاهل اللي يحبه بجد وكدا يعني وبنات كتير يتمنوه بس وهفهمه اني مش عايزه اظلمه معايا المهم تطلعي منها بشكل زوقي بدون تجريح .

لو بتحبى واحد وصحبتك جت قالتلك انها بتحبة ؟ ساعتها هتختارى مين الحب والا الصداقة؟

مش عايزه كلام خالص لما اتنين صحاب شباب يكسبو بعض ويخسرو بنت ليه احنا البنات كمان منبقاش كدا ؟ لاء طبعآ هبقى باقية على صداقتي واخسر اللي حبيته عشانها ويمكن هو كمان بيحبها ومش بيحبني فبلاش اخسر الاتنين وفي كل الحالات كنت هختار صاحبتي دي مش عايزه تفكير .

لو اللى بتحبية جة وقالك معلش مش هنقدر نكمل مع بعض؟

هتبقى صعبة أوي عليا بجد بس هطلب منه يفهمني الأسباب وهسيبه يمشي في الطريق اللي هو عايزه لان اللي يحب بجد بيدفن فكرة الفراق دي وبيطيرها من دماغه ومش بيعملها اي حساب وبردو مش هنسى كلام ربنا وعسى أن تكرهو شيئآ وهو خير لكم .

لو لقيتى واحدة صحبتك متغيرة معاكى ومن غير اسباب وسألتيها قالتلك مفيش حاجة؟

لو صاحبتي اوي وبحبها اوي هفضل وراها ومش هسيبها ومش هخليها تسيبني او تبعد عني الا ما تكون كويسة وظروفها كويسة مش في حالة هي مش كويسة فيها ، انما لو بنت عادية يعني ومش عايزه تكلمني تاني عادي معنديش مشاكل .

لو حد حرجك وسط صحابك؟

أصحابي بيفهموني من عيني وانا كمان دول اصحابي الانتيم واكيد هيفهمو انهم احرجوني ويحاولو يصلحو الموضوع غير كدا انا مش ببين اي مدايقة لحد ما نبقى لوحدنا واعاتبهم باه.

اختارى 3 من المنتدى ووجهلهم نصيحة او كلمة اوى اى حاجة

امممممممم كدا يااسلاميك لازم الاحراج دا طيب هشوف كدا :

1 - الشبح وسام عمران : اتقو شر الحليم اذا غضب هههههههههه وقصدي على رانيا ابعدو عنها ومتجروش شكلها :p
2 - زورو : ياريت تبطل تكتب تريقة على البنات على فكرة انا مش متدايقة منك بالعكس بحب دمك الخفيف بس دي نصيحة يعني : D
3 - حسن كعبول : متخليش ودانك مع اي حد عايز يعاديك ومتديش اي اهتمام للمواضيع دي .

توجهى الكلمات دى لمين

كلمة شكر : بشكر أوي صاحبتي وحبيبتي دودي واختها ريم لأنهم وقفو جنبي في أصعب الظروف اللي مريت بيها .
كلمة عتاب : بعتب على أستاذ محمد عشان حارمنا من مشاركاته وطلته وبجد وحشنا أوي .
كلمة حب : بقولها لصاحبتي jojo و Lolla عشان دول اللي عرفوني يعني ايه صداقة بجد ويعني ايه حب بجد .

بتمثلك اية الاشياء دى

الصدااقة = قلم عاجز عن التعبير.
الحب = دوري عليه في قلبك الاول بعدين دوري عليه برا .
الاسرة = روحي اللي عايشة بيها وعقلي اللي بفكر بيه .
الكلية = السلمة الاولى لمستقبل جميل وحقل تجارب لـ 100 سنة قدام في 5 سنين بس .
البحر = قبر لا محدود للاحزان والهموم وونيس موجود في اي وقت
الورد = هنستمتع بيه علطول لو كان في مكانه الصح ، وهتستمتعي بيه يوم او يومين لو شلتيه من مكانه .

رتبى الحاجات دى

حاضر

الاسرة-الشغل-الحب-المال-الصداقة

الأسرة - الصداقة - الشغل - الحب - آخر حاجة المال ( لأن المال خادم جيد ..لكنه سيّد فاسد )


بس كدة كفاية دول المرادى

كانت أسئلة كتيرة بس من جمالها بجد محستش بالوقت اني بتطلعي مني حاجات ممكن اكون بكتشف نفسي فيها لاول مرة بجد

شفتى انا طيبة ازاى

انتي طيبة وسكر وعسل وكل حاجة حلوة ^_^