في ضيافه فلان ضيف الحلقه ( esraa)

[spider girl]

اهلا وسهلا بحضرتك فى الضيافه يا بشمهندس محمد الفرارجى
نتمنى تقضى ضيافه سعيده
وتتوافد على حضرتك الاسئله كالمطر
اهلا وسهلا مرة تانيه

[Mohamed Hashem]

حبيبى .. انت وقعت ولا الموج اللى حدفك
خد عندك
دخلت كلية الآداب بالمجموع ولا كنت بتحب الجغرافيا مثلا؟
بفرض انك لم تصبح مساح .. كنت تحب تطلع ايه ؟
ايه سر حبك للادارة والتنمية البشرية وكل ما يتعلق بهما .. هل هى موهبه ام دراسة ؟ وليه طغت على الجغرافيا والمساحة اللى فى رأسك ؟ جاوب بصراحه
انت حاليا فى موزمبيق ودى بلد افريقى يعنى فقير نوعا وبعيد .. هل عندك حب السفر للعمل ولا هى جت كده ؟
لو قدر لك - ان شاء الله يارب - انك تكسب مليون دولار امريكى عدا ونقدا .... ايه أول 3 حاجات حتعملهم بالفلوس ؟
انت صريح ومش بتاع مجاملات .. هل ده بيسبب لك مشاكل ؟
انت اجتماعى .. وابن بلد .. هل مرة ندمت على انك كده ؟ ولماذا ؟
جاوب بصدق زى ما اتعودت منك ومن غير الكلام المزوق بتاع ممثلين اليومين دول (انا مبحبش الكذب وعمرى ما خفت الخ الخ ) على ان تكون اجابتك فيما لا يقل عن 650 سطر وتبدأ موضوعك بجملة " أنا مشرف فى منتدى المساحة "
هههههههههههههههههه
اتفضل يا عسل
سمعنا

[محمد الفرارجي]

هههههههههههههههههههههههههههههههههههه

حبة أسئلة عنب
بس كانت عايزة شوية من الأسئلة إللي اتسألتها تحية كاريكوا في فيلم لعبة الست لما كانت سهرانه في الكازينو ومعاها نجيب الريحاني يعني من قبيل
أين نشأت وترعرعت؟
مين أكتر فنان عينيه بتعجبك؟

كده يعني
بس حقيقي حبة أسئلة لووووووووووووووووز

تسلم ايدك
وقبل البداية شكرا ليك لاستضافتي بعدك ويا رب ما أزعل حد وربنا يستر

حبيبى .. انت وقعت ولا الموج اللى حدفك

لا يا خويا أنا بري ماليش دعوة بالموج
خد عندك

إديني
دخلت كلية الآداب بالمجموع ولا كنت بتحب الجغرافيا مثلا؟
هع هع هع هع
أنا من عشاق الجغرافيا ووأنا في الثانوية كانت أقصى ما أطمح إليه قسم الجغرافيا شعبة المساحة والخرايط.
بفرض انك لم تصبح مساح .. كنت تحب تطلع ايه ؟

يا سلام عالسؤال ده . عموما أنا مريت بأكتر من تجربة في الشغل منها اتش آر ومنها تسويق ومنها تجارة لكن حقيقي أكتر مجال حبيته هوه التجارة.
ايه سر حبك للادارة والتنمية البشرية وكل ما يتعلق بهما .. هل هى موهبه ام دراسة ؟ وليه طغت على الجغرافيا والمساحة اللى فى رأسك ؟ جاوب بصراحه

بص حبيبي أنا مهتم الحمد لله بالمساحة والدليل إني مش بس شغال فيها لكن الحمد لله بأتابع على قد ما أقدر , لكن قلة التنظيم والمتابعة إللي شايفهم بيخلوني أتكلم كتير عن الموضوع ده , وبالنسبة للناحية الدراسية , هيه كانت فترة اشتغالي بالتجارة بالبرامج الاليكترونية والمواقع أجبرتني على دراسة ادارة الفريق والعلاقات العامة والتسويق والمبيعات.
انت حاليا فى موزمبيق ودى بلد افريقى يعنى فقير نوعا وبعيد .. هل عندك حب السفر للعمل ولا هى جت كده ؟

لا والله يا هندسة القريبين مني عارفين إن قلبي جامد ومش بيفرق معايا السفر والدليلي إن ترشيحي جه في الأول للسوادن والترشيح التاني للجزاير والتالت كان لغانا وفي الآخر جه الدور إني أمسك موزمبيق لوحدي وقريب قوي ما حولها من الدول إن شاء الله.
وبصراحة من كتر حبي للسفر ربنا كرمني بالشركة خصوصا إننا فاتحين في حوالي 72 دولة على مستوى العالم فبجد متعه كبيرة قوي مش بيعكرها إلا بعدي عن إيد ابويا وأمي عشان أستمتع بتقبيلهم وطبعا سارة وأمها:cc_chinese:
لو قدر لك - ان شاء الله يارب - انك تكسب مليون دولار امريكى عدا ونقدا .... ايه أول 3 حاجات حتعملهم بالفلوس ؟
الجميل إننا كنا بنسال بعض السؤال ده من فترة
بص
1- هطلع كل حبايبي يحجوا إن شاء الله وانت منهم بإذن الله.
2- هكمل مشروع يا رب يكمل خاص بكفالة طلبة العلم إن شاء الله.
3- هدي الباقي للإلي بيعمل التراب دهب "أخويا الكبير ربنا يبارك له"

انت صريح ومش بتاع مجاملات .. هل ده بيسبب لك مشاكل ؟

كتييييييييييييييييييير قوي قوي فوق الوصف.
ممكن أندم إني زعلت حد مني لكن عشان أنا متأكد إني صح فإللي قدامي بيرجع يعتذر تاني لو غلط في حقي.
انت اجتماعى .. وابن بلد .. هل مرة ندمت على انك كده ؟ ولماذا ؟

حقيقي ما ندمتش على السلوك ده الحمد لله لأني بأحاول أخلي النية لربنا سبحانه وتعالى على قد ما أقدر

جاوب بصدق زى ما اتعودت منك ومن غير الكلام المزوق بتاع ممثلين اليومين دول (انا مبحبش الكذب وعمرى ما خفت الخ الخ ) على ان تكون اجابتك فيما لا يقل عن 650 سطر وتبدأ موضوعك بجملة " أنا مشرف فى منتدى المساحة "
هههههههههههههههههه
اتفضل يا عسل
سمعنا

[محمد الفرارجي]

صحيح يا جدعان
ههههههههههههههههه

هوه دلوقتي مش في ضيافة العبد لله

هههههههههههههههههههههههههههههههههههه

[ALY ELSAYED]

منور يا بشمهندس محمد الفرارجي

انا احب اسمع منك تجربتك مع العمل المساحي

ابتديت الشغل فين وازاي ووصلت لايه في الاخر

وايه طموحاتك في المجال

وياتري في احلام حققتها في مجالك ولا لسه

ولو لسه ايه هيا احلامك

دي شويه اسئله صغيره خالص بنستفتح بيها

جزاك الله كل خير

[محمد الفرارجي]

منور يا بشمهندس محمد الفرارجي

انا احب اسمع منك تجربتك مع العمل المساحي

ابتديت الشغل فين وازاي ووصلت لايه في الاخر

وايه طموحاتك في المجال

وياتري في احلام حققتها في مجالك ولا لسه

ولو لسه ايه هيا احلامك

دي شويه اسئله صغيره خالص بنستفتح بيها

جزاك الله كل خير

الشكر ليك انت يا علي.

الموضوع باختصار إني كنت سالك مجال تاني بعد التخرج غير المساحة خالص والمجال ده كان الدرسات العليا وده لحبي الشديد للمذاكرة. ويمكن عشان ترتيبي كان من العشرة الأوائل فمحبتش أضيع تعب السنين الأربعة وقلت أكمل لكن حصلت لي مشكلة جامده جدا تقريبا كل إللي قابلتهم إلا حبه صغيرين من الشباب واقعين فيها. وهيه .

التشتت.:closedeyes::closedeyes:

حقيقي اتشتت كتير والأهداف ما كانتش واضحة قدامي فمشيت في مجالات كتير مش المساحة بس عشان أكون صريح.:clap:

منها تجارة البرامج للشركات والطباعة ده بالاضافة لمجال التسويق . وتقريبا كلها كانت لحسابي الحمد لله فده اداني خبرة السوق شوية.:cc_canadian:

- أما بالنسبة للعمل المساحي فأنا اتنقلت كتير بين التخصصات كان منها الصرف الصحي ومنها الطرق فترة وشوية انشاءات .:11ight:

لكن زي ما قلت لك مشكلتي الكبيرة إني مالاقيتش حد عنده خبرة يديها لي بسهولة.

فكنت بأخوض المجال عشان أجرب بنفسي لأن معظم إللي قابلتهم كان صعب يديك خبرة حتى في أسهل الحاجات.:11ight:

وطقت في دماغي من فترة أشتغل في طباعة الكتب الجامعية ومكدبتش خبر واشتريت اللازم لكده وكمان خليت كل حاجة بالكمبيوتر تقريبا ولي فيه ما يشبه براءة اختراع ولله الحمد.:clap:
لكن برضه عدم وضوح الرؤية وعدم وجود ناصح أمين يعرفك الطريق . خلى الطريق طويل قوي وكان سهل جدا يبقى قصير لو ركزت في حاجة واحده من الميت ألف حاجة إللي شغلت باللي بيهم .

يمكن عشان كده لما حد بياخد رأيي في حاجة وهوه لسه في بداية طريقة في المساحة , مش بأزود عن نصيحتين :

1- التوتال استيشن.
2 الأتوكاد.

خلصهم واشتغل بيهم ونتكلم بعدين.

- حاليا الحمد لله على إللي أنا فيه . يكفيني راحتي النفسية والمرتب إللي أعتقد إنه مرضي عالأقل بالنسبة لاحتياجاتي الحالية.

- في المستقبل . نفسي أكمل الماجستير بتاعي إن شاء الله وأكون في الكادر الاداري تحت لقب مدير قسم المساحة إن شاء الله بس ربنا يسهل وتبقى قريب :11ight:

[ALY ELSAYED]

ربنا يخليك يا هندسه

وان شاء الله ربنا حيكرمك ويوفقك

وتحقق كل طموحاتك

قولي بقي اسماء اولادك ايه ؟

ونفسك تشفهم ايه في المستقبل ؟

ياريت نعرف اكبر موقف ضايق حضرتك ؟

ياتري عرفت ووصلت للمنتدي ازاي ؟

كفايه كده النهارده

جزاك الله كل خير

[محمد الفرارجي]

ربنا يخليك يا هندسه

وان شاء الله ربنا حيكرمك ويوفقك

وتحقق كل طموحاتك

ربنا يبارك فيك يا علي
قولي بقي اسماء اولادك ايه ؟

مفيش غير بنت واحده واسمها سارة سنة وسبع شهور - وكان نفسي يكون اسمها فاطمة تيمنا بالزهراء رضي الله عنها. لكن من كتر حبي لآل البيت رضي الله عنهم فدورت على إسم يكون ليه علاقة ويعجب برضه. فقلت يبقى سارة وآهي برضه تعتبر جدة النبي عليه الصلاة والسلام.
ونفسك تشفهم ايه في المستقبل ؟

بالنسبة للبنات لو هيبقى معاها دبلوم . مش هيفرق معايا لكن إللي هيفرق معايا. تقواها لربنا عز وجل من ناحية الناحية التانية لما تتجوز تكون " إذا أمرها زوجها أطاعته, وإذا غاب عنها حفظته في ماله وعرضه."

الولاد برضه مش هيفرق معايا التعليم قد ما هيفرق إنهم يكونوا رجالة ويفهموا إنهم مسلمين وبرضه نفسي يمشوا في طريق ما قدرتش أمشي أنا فيه"

ياريت نعرف اكبر موقف ضايق حضرتك ؟

والله يا علي مفيش موقف واحد لكن مواقف كتير قوي بتمر بينا ومن رحمة ربنا إننا بننساها.

ياتري عرفت ووصلت للمنتدي ازاي ؟

سألت المهندس رشاد الدفراوي على شرح يكون كويس لطريقة الشغل على توبكون دا أول ما نزل في ايدينا تقريبا. واداني فايلات كان فيها اللينك بتاع المنتدى. وأنا من طبيعتي بأحب أشوف مصدر المعلومة عشان أستفيد أكتر ودي كانت البداية.
كفايه كده النهارده


تحت أمرك يا علي
جزاك الله كل خير

وإياكم إن شاء الله

[Youssef Mostafa]

حبيب هارتىىى منور البرنامج والله وواحشنى جدااااا

[spider girl]

1- لو حضرتك تختصر تجربتك فى الحياه تقولنا ايه عنها ؟

2-امتى حسيت انك ضعيف(موقف حسيت فيه انك صعيف)؟

3- مين اكثر شخصيه اثرت فى حياة حضرتك؟

4-ايه اكتر موقف عدى على حضرتك واتصدمت منه سواء فى الشغل او حياه حضرتك الشخصيه؟

مستنيين الاجابات الصريحه يا بشمهندس محمد وربنا يوفقك ديما