يا ترى احنا مستعدين إزاى لعام 2009 ... عام جديد سعيد

**THE PHAROUH** · 12-25-2008, 01:10 AM

كلنا وإحنا بنقرب على نهاية السنة وبنستقبل سنة جديدة... دايما بيكون عندنا آمال وطموحات وخطط علشان السنة الجديدة...

فيه مننا ناس واقعيين... بيعرفوا يحلموا ويعرفوا يخططوا ويعرفوا كمان إزاى يحققوا أحلامهم وطموحاتهم.

وفيه مننا ناس كتير... أحلامهم بتكون خيالية شوية... أهدافهم طموحة بس بزيادة شوية... تخطيط...!! تخطيط ايه بس سيبها على الله...!

وفيه كمان مننا ناس كتييييييييير قوى... ماشيين بالبركة... إحنا هنعقدها ليه بس... ماهى ماشية أهية... وهو يعنى أنا لو حلمت ولا حتى خططت فيه حاجه هتتحقق...؟ كبر كبر... الناس اللى بتقول الكلام ده ناس فاضية ماعندهمش حاجه تشغلهم وهيوجعولنا دماغنا زى ما دماغهم تاعبهم...!

السنة دة هى كمان قربت تعدى من عمرنا... يعنى، فات الكتير مابقاش إلا القليل...؟

طب سألنا نفسنا عن اللى فات ده عملنا فيه ايه..؟ راح وعدا من بين ايدينا واتحسب علينا... طب بس ليه..؟؟

هو احنا يعنى اتكتب علينا ان الحاجات الحلوة تضيع من ايدينا ونقعد نعيط عليها..؟؟

2008 فات منها 51 أسبوع وفاضل أسبوع...
يعنى اللى فات من السنة دى لحد دلوقتى كانوا 359 يوم 8616 ساعة بس...! يعنى إلا كام ساعة كده...!

اللى فاضل يا دوب سبع أيام ... كل الحكاية نقدر نقول بتاع 170 ساعة... هيعدوا...؟؟؟

يا عم هيعدوا والله زى ما غيرهم عدى كتير...! انت تاعب نفس بس كده ليه...؟؟؟ مش كده يا إخونا...؟؟ الجدع ده والله تاعب نفسه على الفاضى...!

لأ مش كده... !!! مش كده... وألف مش كده كمان...!!!

طب علشان ما نتعبش بعض... نحسبها...؟ يلا نحسبها...؟ نحسبها

مش هأقول لا متوسط عمر الفرد فى العالم الثالث وفى البلدان النامية ولا دول حوض البحر الأبيض ولا حتى الأخضر ولا الكلام الكبير المبعجر ده. لا لا لا لا. إحنا بدأناها بلدى وخلونا كده حلوين ونكملها لحد الآخر بلدى... مالو البلدى... دا حتى البلدى يوكل وواحده واحده كده هنوصل مع بعض....

نسأل نفسنا سؤال بسيط.... احنا يعنى ممكن نعيش كام سنة كده..؟؟

نقول خمسة وستين ... ؟

يا راجل....!!

طب نخليها سبعين..؟؟

انت بخيل قوى على فكرة...! هو انت هتدينا حاجه من جيبك..؟؟

ماشى... طب نقول تمانين سنة وده آخر كلام عندى بقى...

لا لا لا لا ... كده ماينفعش... ايه الكلام اللى يزعل ده بقى..؟؟ هو انت كمان جاى تعد علينا عمرنا... يا راجل خليك بحبوح كده وبلاش اللى انت فيه ده... الموضوع كله كلام فى كلام... وهو يعنى لو انت قلت تسعين انت دافع حاجه من جيب أه...

لا لا لا لا لا... كله إلا كده

ماشى يا عم.... حقك عليا... هو لو قلت تسعين انت هتدفع حاجه من جيبك...؟

أيوه كده... ماشى هأعديها المرة دى وهأقول تسعين بس حاسبو على كلامكوا بعد كده

طيب 90 سنة فات منهم قد ايه لحد دلوقتى..؟ نقول 20 ..؟؟ ماشى..؟؟ يعنى اللى فاضل كام...؟؟

فاضل 70 سنة.

طب نقول نرتاح شوية فى الآخر كده ..؟؟ يعنى نقول كمان 10 سنين..؟؟ ماشى...؟

يعنى فايت مننا قد ايه كله على بعضه كده...؟؟

اتهيأ لى 30 سنه مش كده برضه..؟؟

ايوه تلاتين... بس انت عاوز ايه يعنى..؟؟

عاوز أقول ان تلث العمر ضايع ضايع غصب عننا... مش بس التلت دا حتى التلتين الفاضلين ماهماش صافى... ده لسه فيه تلتهم نوم وشوية أكل وشوية مهيصة يعنى الستين ما بقوش ستين ولا حاجه... دول بقوا أقل من أربعين...!!

أربعين....؟؟؟ تصدق ان انت راجل أى كلام... ! تقولى هأعيش 90 سنة وفى الآخر تضجك عليا وتطلعهملى 40... !! دول حتى ما حصلوش النص...!!

طب هو أنا أخدت منهم حاجه وحطيتها فى جيبى...؟؟ مش كله على إيدكوا...؟؟ على كل حال احنا حسبناها مع بعض.. واللى عنده حسبه تانية أحسن من كده يبقى يحسبها ويقولى عليها... المهم خلونا فى المهم... الأربعين سنة دول ممكن نضيعهم زى غيرهم ما بيضيع وممكن نعيشهم صح... الحكاية كلها مش أكتر من ان احنا ناويين على ايه...؟ ناويين نعيشهم صح ولا مش ناويين..؟؟ عاوزين ولا مش عاوزين..؟؟
لسه قدامنا أسبوع فى 2008 قبل ما 2009 تيجى.... ممكن نقعد ونستنى ونقول وهو ايه يعنى أسبوع ما فات أسابيع وراها أسابيع وما جاتش على أسبوع.... وممكن نبدأ دلوقتى حالا .... فى ايدينا نثبت لنفسنا إذا كنا ناويين ولا لأ.. تعرفوا إزاى...؟؟
أقول لكو إزاى.... دلوقتى حالا وقبل أى حاجة وقبل ما نقوم من مكاننا... نمسك حتة ورقة وقلم ونعمل فيها خطة صغيرة قوى.... خطة بتاعت أسبوع واحد مش أكتر... يعنى 7 أيام بس...

خلينا منطقيين وبلاش الأوهام وبلاش الأهداف الواسعة... خطة نحط فيها شئ واحد بس احنا كان نفسنا إنه يحصل فى 2008 أو على الأقل جزء منه بس يا خسارة ما عرفناش.... بس مافيش لسه خسارة ولا حاجة.... 2008 لسه ما خلصتش... لسه فيها أسبوع.... نقدر نغير فيه حاجات كتير.... ونقدر نختمها بشئ كنا عاوزين نعمله وعملناه.

يعنى...
اللى بيدخنوا.. مش ممكن برضه تحاولو تبطلو فى الأسبوع ده..؟ أنا بأقول نحاول...
اللى مش بيذاكروا.. مش ممكن برضه تحاولوا تعملوا بداية..؟ برضه بأقول نحاول...
اللى مخاصم حد... طب برضه ما نحاول نمسك التليفون ونقول حتى ألو..؟ كمان بأقول نحاول..

حاجات كتير قوى محتاجه مننا اننا نغيرها... تفتكروا الحاجات دى محتاجه مننا اننا نستنى 2009 علشان تتحقق..؟؟

حاولوا تعملوا حاجه واحدة ولو بسيطة قبل ما 2009 تدخل علينا أحسن أنا خايف ان 2009 تيجى وتمشى واحنا لسه رضه ما عملناش حاجه فى طريقنا لتحقيق أحلامنا.... مش بجد برضه الموضوع مستاهل مننا محاولة..؟؟

تحياتى وكل سنة وأنتم طيبين

**ميرا مار** · 12-25-2008, 01:56 AM

والله عرضك رائع للموضوع فى بدايته..
بس ياريتك تعمل جزء تانى تساعد الناس ازاى تفكر بايجابية وتحب نفسها ازاى
وازاى تستغل السنين الجاية
والله اعلم
ماحدش ضامن عمره..
احنا قدمنا ايه لانفسنا؟؟؟
هنقول ايه لرب العالمين..

قضينا عمرنا فى ايه
وعملنا ايه وعملنا كام يخلينا نكسب الجنة.. وقبلها رضا رب العالمين
شكرا لك ع الموضوع الجميل

**Wild_Angel** · 12-26-2008, 02:39 AM

موضوع فوق الممتاز

دخلت الموضوع وانا ممسكه قلبى بيدى يكون فيه طراطير وزمامير و"هابى نيو يير"

فتح الله عليك..يكفى انك نوهت عن هذه الفكره الجميله
وهناك جمله هامه: العبد فى التفكير والرب فى التدبير ، اى ان لابد ان يفكر الانسان حتى يدبر الله له امره ويرزقه

شكرا جزيلا وجعله الله عام ملئ بالخيرات

**Mahro** · 12-26-2008, 02:54 AM

موضوع جميل والله يا باشا

وانا كل سنه جديده بيبقى لها شكل تانى بالنسبه ليا

عشان انا مولود 1/1 وبكده بتبدأ سنه فى حياتى وسنه فى عمرى فى نفس الوقت

بس صح احنا نفكر وربنا عليه التدبير

**THE PHAROUH** · 12-26-2008, 11:34 AM

ياسيدي واعتبرني انا اول واحد بقولك كل سنه وانت طيب وعقبال 100 سنه
ويارب يكون عام سعيد عليكم جميعا

**mimo** · 12-26-2008, 09:39 PM

موضوع رائع جدا ولازم الانسان يخطط للمستقبل كى يحقق اهدافه لان الانسان بلا اهداف كانه غير عايش من الاساس

ميمو الطيب

الاحساس الجديد

الموضوع: يا ترى احنا مستعدين إزاى لعام 2009 ... عام جديد سعيد

أدوات الموضوع

عرض

يا ترى احنا مستعدين إزاى لعام 2009 ... عام جديد سعيد

الكلمات الدلالية لهذا الموضوع

المفضلات

المفضلات

ضوابط المشاركة