تعرفها هى مين...؟

[Sara Gamal]

مصر...إحساس هز قلبى وانا واقفة فى الطابور لمحت بطرف عينى العلم بيطير لفوق مفهمتش وقتها لكن حسيت بعظمة ورهبة وقلق وخوف !!

مصر....فرحة كبيرة وندا بصوت مسموع وضحكة من القلب طالعة لما اشوفها أولى فى اى حاجة حتى لو كان ماطش كورة!!

مصر...توهان اروح فيه وانا قاعده عند عمى ويسرح يحكيلى عن 73 وازاى حربوا فعلا بقلوب متعرفش خوف!!

مصر...دمعة على خدى تنزل معرفش رايحة فين لما اودع مكان موجود على أرضها!!

مصر...أم قاعدة تدعى على سجادة صلاة ووراها ميت آذان!!

مصر...أب صابح من الفجر يجرى على عيشه وعيش عياله متوكل على الاله!!

مصر...هى صحبة هى لمة حلوة ننزل على البحر نمشى حبة او نقعد على النجيلة او حتى نجيب هدوم!!

مصر...دى ارض خضرا يزرعها فلاح بسيط وجمبه صبية بيضة شعرها ضفاير حرير!!

مصر...جدة على الارض قاعدة حواليها لمة عيال بتحكى حدوتة حلوة عن ايام القرش ساغ!!

مصر...دى زفة اسكندرانى وحنة نوبى ومزمار صعيدى وريحان وعود بخور!!

مصر...وردة بلدى عقد فل وياسمين على إيد طفلة شقية بتبعها فى الإشارة!!

مصر...دى دعوة صافية تسمعها على الطريق من حج عجوز مكحكح لكن وشه برئ!!

مصر...زحمة شوارع تلاميذ وطلبه ...موظف بسيط رايح على بيته شايل كيس جوافة وبطاطا وكام رغيف!!

مصر...بنوتة حلوة مع واد حليوة شيك ماشين يغنوا غنوة نغمها مستقبل رقيق!!

مصر...صرخة قوية وغضب من كل جيهة على اى ايد عفية على الناس مفترية!!

مصر...دى انا وانت ابويا امك وأخوك ....دى جدى وجد جدى وأهل اللى خلفوك!!

مصر ..دى يابنى أرضك وعرضك ودمك وحتة من الجنة عايشة لنهاية الوجود!!