ما معنى الصداقة؟ وكيف تتخذ صديقك؟؟

[Mimi]

نظرآ لأهمية الكلمة دي عندي فأنا مش هخليه مجرد اسم محطوطله مجموعة من الاسئلة لانه أقيم من اننا نتعرف على كلمة صديق من خلال مجموعة اسئلة


الصديق هو اللي يديك وميسألكش ازاي وليه ولمين وكم وايه المقابل ؟

يشيل على ضهره كل همومك ويدعيلك قبل ما يدعي لنفسه

اللي يشاركك احلامك وطموحاتك حتى لو عارف انها في الاحلام ومن رابع المستحيلات

ياخد من ابتسامته ويرسمها على وشك

الصديق هو اللي يقرأ عينيك قبل لسانك

يصدقك في الوقت اللي كل الناس تكذبك

وهو اللي يغير من دموعك لو لمست خدودك

يرشدك ويوجهك لو ضيعت طريقك مش يهاجمك ويطلعك كلك غلط في غلط

الصديق هو اللي بيخلي ودانه ملجأ لغضبك وبيخلي قلبه قبر لاحزانك

مش بيخليك محتاجله ابدا لانه دايما معاك

خايف عليك تبقى حاسس بالوحدة وانت قاعد مع واحد تاني ، اصل الوحدة عمرها ما كانت انك تعد لوحدك بس

الصديق هو اللي بيشوفك عظيم وناجح لما تحس انك فاشل

ويقسى عليك لما انت تقسى على نفسك

فياخد من روحه ويزرعها فيك

اذا لقيت انسان بالمواصفات دي صدقني

سلمله قلبك وسرك وانت مطمن


أنا من حسن حظي لقيت اللي فيه كل الصفات دي وهي صديقتي اللي عمري كله فداها والحقيقة هيا مش واحدة هما اتنين

لو جمعت قلوب الدنيا كلها عشان اعبرلهم عن حبي مش هتكفيهم

كل يوم بشكر ربنا اني طلعت بيهم هما الاتنين ..وجودهم يهونلي اي مشكلة واي ازمة بعدي فيها

بالنسبة للسؤال بتاع الصديق والاخ ... الواحد مش بيختار مين يبقى أخوه ..لكن يقدر يختار صديقه ويبقى اكتر من اخوه وانا عن نفسي مليش اخوات بنات واخترت اصحابي دول يبقو اخواتي واصدقائي وكل حاجة في حياتي

بالنسبة لاخر سؤالين ..انا منزعجة منهم اوي لاني عمري ما احط اصحابي تحت اختبارات معينة او كدا لالالا وبعدين كلمة خيانة متعرفش كلمة صديقتي الاتنين دول ميعرفوش بعض ابدآ

شكرا ليك يااحمد وآسفة ع الاطالة بس بجد موضوعك جميل اوي ومنتظرة رائيك انت وميرا وباقي المشاركين