هل تفتكر؟

[Mimi]

هل تفتكر انت كنت فين و بتعمل اية في وقت حدوث هذه الحوادث؟؟؟؟

مواضيعك حلوة اوي بجد ياسلمى وبتحمسنا كلنا للمشاركة

دية عبارة عن بعض المواقف حدثت خلال فترة طفولتنا
هل ممكن تفتكر انت كنت فين و كنت بتعمل اية و كنت مع مين ولما سمعت الخبر اية كان رد فعلك و شعورك وقتها؟؟؟؟

وفاه الشيخ الشعراوي؟

اتعودنا زمان نشغل دروس الشيخ محمد الشعرواي الله يرحمه في شهر رمضان ولما مات حسيت بافتقاده جدآ رغم اني عمري ما فهمت كلامه بس مفتكرش اني عيطت لكن اتأثرت

زلزال 1992؟

كان عندي فكرة عن الزلزال دا لكن مكنتش عايشة في مصر بس كنت بشوف حالة القلق اللي في البيت من خوفهم على اهلنا

وفاه ديانا و دودي؟

فاكراها جدآ وعيطت عليها اوي اوي بجد ومن شدة تأثري انا وأخويا كنا بنمثلهم وبنركب الدفاية على انها العربية ونقع بيها ونموت بس انا بموت الاول وبعدين اخويا ( دودي ) يحط حوليا الورد ويزعل عليا وبعدين يموت جنبي

سقوط مبنى التجارة العالمي؟

كنت بتفرج عليه مباشرة الساعه 5 ونص طبعآ ملحقناش الضربة الاولى لكن شفت الضربة التانية وقت ما حصلت وكأني عشت حالة الهلع في أمريكا وطبعآ كلنا عارفين قد ايه كان موقفنا حرج من العالم بسبب اللي حصل

وفاة سعاد حسني؟

كنت متابعة سلسلة التحقيقات في وفاتها الغامضة بس بصراحة متأثرتش لكن مامتي اللي كانت بتبكي عليها كأنها أختها

السيول التي اغرقت مناطق كثير في الاسكندارية 1997؟

معنديش فكرة بصراحة ياسولي وبالتالي مش عارفه كنت فين

ظهور السلعوا في الاسكندارية؟

دي بردو معنديش فكرة عنها آسفة

في أحداث تانية حضرتها في طفولتي زي الهجوم الكيماوي اللي كانت بتهدد بيه العراق 2001 وحرب عاصفة الصحراء 1990 ودي متذكراها جدآ بس هيا مش في نطاق الموضوع

بجد شكرا ياسلمى موضوع جميل فعلآ ياريت اشوف مشاركتك فيه باسرع وقت