مــاذا تفعل لـــو كنـــت مكــانى.×.×النهاردة.. حيرة المراة امام سى السيد

[Mimi]

موضوع هايل ياباشمهندسة واكيد في حياتنا مشاكل كتير منها الخاص ومنها العام وممكن اذا كنا متحفظين نتكلم عن اي مشكله عامة ياجماعة

انا حصلي موقف مؤلم جدآ من سنة بالضبط كان أول يوم رمضان السنة اللي فاتت ، انا بدرس في مدينة تانيه غير مدينتي وبعدين كان حد من قرايبي عازمني اول يوم في رمضان على الفطار فرحت مسافرة اليوم دا

مكنتش لاقيه اي سوبر جيت متوفر في الوقت دا وخفت أتاخر فرحت راكبة عربية بيجو ..انا بكرهها بس كرهتها اكتر بعض الموقف دا .. واحنا ماشيين المفروض اننا بنعدي على بلاد اللي هيا بتكون في الطريق يعني المفروض يخفف من سرعته لما يمر بمكان فيه سكان

بس هو السواق كان مستعجل ..وكان محافظ على نفس سرعته داخل البلاد اللي بتقابلنا دي ..المهم عشان مطولش كان في طفل لا يتجاوز عمره 6 او 7 سنين بيدحرج كوتش عربية وبيعدي بيه في الشارع والمنظر كان قوي جدآ والله وانا بكتب شايفة الاحداث كأنها بتحصلي دلوقتي والله شعور مؤلم

السواق خبط الولد لدرجة انه طار في الهوا قدام عنينا ،، احنا حسينا بخبطة العربية بالولد بس موقفتش على كدا ، الولد لما طار لقدام من الخبطة السواق من توتره رجع مشي عليه تاني وحسينا ان العربية طلعت على حاجة يااااااااه على كدا شعور ، البنت اللي كانت جنبي داخت وغابت عن الوعي وانا بصيت ورايا اشوفه لقيته بيدحرج على الأرض كذا مرة بس حسيت ان قلبي الوقت دا اتشل والله

عايزه اقول حاجة من الموقف دا ، مشكلة السرعة في السواقة ، هل ممكن تسبب حاجة اكتر من انها تزهق الارواح او انها تسبب حالة نفسية ، تخيلو أم الطفل دا هتكون عاملة ازاي في اليوم دا ..كل دا حصل عشان ايه ؟ عشان الفطار ؟ مع ان في ناس بتقف في الشارع بتوزع تمر وميه

انا بقول حسبي الله ونعم الوكيل فيه ، لانه كمان نزلنا في الطريق عشان مندلش عليه وسابنا ، يعني حتى هدفه من السرعه كان مجرد هدف شيطاني ، أكيد حاسسين بألم الموقف دا ،، يعني المشكله اللي بعاني منها في مصر كتر الحوادث اللي بتحصل

وعلى فكرة عملو احصائية على أكبر عدد وفيات في العالم لقوها حوادث السيارات ومصر مصنفة ضمن أول عشر دول في الحوادث في العالم سواء حوادث سيارات او قطارات او حوادث سير ،، ليه في فوضى في المواصلات وليه السواقين بيرمو قلبهم بمجرد ما يركبو عربيتهم ؟

آسفة اني طولت بس انا اندمجت ومن قوة المشكلة دي كتبت بالتفصيل