ماتقولش ايه ادتنا مصر؟؟!! ... قول انت عايز ايه من مصر...

[ميرا مار]

اولا بشكرك يا ميرا على الموضوع الجميل ده
ثانيا انا نفسى بجد الاقى حد بيحكم زى
عمر بن الخطاب ومش هقول رسول الله صلى الله عليه وسلم لانه افضل الخلق
لكن ارجو على الاقل المشى على منهاجه
هو والصحابه
وبتمنى كمان ان كل الشعب يكون متكاتف
يكون كتله واحده قوة واحده
شخص واحد
وبجد انا بحب البلد دى اوى اكتر من روحى

جزاك الله خيرا يا مى
وهو فى زى عمر رضى الله عنه..
بس نتمنى ييجى اللى يحبه ويقتدى به ويحكم بلدنا

[ميرا مار]

عايزة من مصر

التعليم مايبقاش حشو دماغ

لكن لازم يكون فى حد ادنى من التعليم وبعد كدا

يبقى فى اختبارات للمواهب والقدرات

والدراسة تبقى على الاساس دة

[ميرا مار]

عايزة من مصر ..رغيف عيش نضيف

:D:D

[محمد الفرارجي]

هييييييييييييييييييه

مميز

هقول ايه؟

برضه مميز ترد على تعليقاتي ما تردش عليها
برضه مميز


أنا بصراحة
وانتوا عارفيني صريح شوية


أكتر اغنيه بتستفذني جدااااااااااا وبأبقى عاوز اقفل الجهاز اللي مشغلها بسرعة أغنية

ما تقولش ايه اديتنا مصر قول هندي ايه لمصر



يا سلام دا امر طبيعي لازم ناخد من بلدنا عشان نديها مش كفاية نبقى مصريين وخلاص

ولما ندي نبقى فاهمين كويس احنا بندي لمين وهنكبر مين

واخدين بالكوا؟


أنا دلوقتي طوحي جاي من تجاربي


ومش هشطح وسوري مش باقلل كم طموحكوا بالعكس والله بس انتوا بتوصفوا في المدينة الفاضلة

احنا قابلينها على حالها مع التغيير ومش مشكلة


انا طموحي في الفترة الحالية واللي هشتغل عليه بجد

ورقة عمل مشروع توظيف خريجي شعبتي المساحة ونظم المعلومات عن طريق الرابطة "اختياري" بأكد آهوه عشان محدش يقول لي اجباري

وان شاء الله قبل ما انزلمصر ان شاء الله هكون بلورت عالأقل الخطوط العريضة للمشروع


وانا بس مستنيكوا تخلصوا امتحانات

ولازم وغصب عنكوا هتشتركوا في المشروع
عارفين ليه؟



عشان مش هتتغير إلا لما احنا نتغير


صحيح

هحط لكوا بيتين للراحل الجامد قوي صلاح جاهين في حب مصر


اسم مصر

على اسم مصر التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلاقيني جنبها في الكرب

والنبض ينفض عروقي بألف نغمة وضرب

على اسم مصر

مصر النسيم في الليالي وبياعين الفل
ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

على اسم مصر

أنا اللي اسمي حتحـور .. أنا بنت رع

مثـال الأمـومـة ورمـز الحـنـان

تفـيض حـلمـاتي وتمـلا الـتـرع

وتسـقـي البـشـر كلهـم والغـيـطان

نهايته يا مصر اللي كانت أصبحت وخلاص

تمثال بديع وانفه في الطين غاص

وناس من البدو شدوا عليه حبال الخيش

والقرص رع العظيم بقى صاج خبيز للعيش

وساق محارب قديم مبتورة ف أبو قرقاص

ما تعرف اللي بترها سيف والا رصاص

والا الخراب اللي صاب عقل البلد بالطيش

قال ابن خلدون أمم متفسخة تعيش ليش

وحصان صهل صحى جميع الجيش

على اسم مصر


النخل في العالي والنيل ماشي طوالي

معكوسة فيه الصـور .. مقلوبة وانا مالي

يا ولاد أنا ف حالي زي النقش في العواميد

زي الهلال اللي فوق مدنة بنوها عبيد

وزي باقي العبيد باجري على عيالي

باجري وخطوي وئيد من تقل أحمالي

محنيه قامتي .. وهامتي كأن فيها حديد

وعينيا رمل العريش فيها وملح رشيد

لكني بافتحها زي اللي اتولدت من جديد


على اسم مصر

مصر .. التلات أحرف الساكنة اللي شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

أسمعها مهموسة والا أسمعها مشخوطة

شبكة رادار قلبي جوه ضلوعي مضبوطة

على اسم مصر

وترن من تاني نفس النبرة في وداني

ومؤشر الفرحة يتحرك في وجداني

وأغاني واحشاني باتذكرها ما لهاش عد

فيه شيء حصل أو بيحصل أو حيحصل جد

أو ربما الأمر حالة وجد واخداني

انا اللي ياما الهوى جابني ووداني

وكلام على لساني جاني لابد أقوله لحد

القمح ليه اسمه قمح اليوم وأمس وغد

ومصر يحرم عليها .. والجدال يشتد

على اسم مصر

لللشاعر الكبير عم الشعراء صلاح جاهين

[ميرا مار]

الله الله الله

صلاح جاهين.. باعشق اشعاره جدااااااااااااااااااااااا

شكرا خاص عشان عزمته ع الموضوع;)


وشكرا ..:rolleyes: شكر اييه بقى؟؟:confused:

مانا مش لاقية كلام اشكرك بيه على مشاركتك الجميلة دى

ربنا يجازيك كل خير