تسمح تولع لي ؟

**mr.lonly** · 03-14-2009, 03:36 PM

CENTER]

((التدخين ضار جدا بالصحة ))
الجملة دي أثرت فيك؟
هل هاتفرق انهم يكتبوا تحذير واخد نص العلبة؟
ولا الهوا طبعا
دانت بتدفع فلوس وبتشتري العلبة أصلا
إيه العالم دي يا جدع؟
التدخين آخر تمام
*******
بيقولوا إن التدخين مفيد بيني و بينك بقى.. فيقال إنه بيخفض الوزن وإن النيكوتين مضاد للإلتهابات وكمان بيعدل المزاج وبيزود التركيز
حد يبطل التدخين يا جدعان؟
ده كلام برضه؟
بس بيني وبينك كده.. ومش هاقول لحد
بذمتك.. عايز تبطل؟
*******
بتشرب ليه يا كبير؟
لو سألتك عن السبب مش هاتقول لي السبب الحقيقي, لأنك مش مصارح نفسك بيه أو مش عارفه أساسا.. غالبا هاتكون الإجابة
يا عم باطلع همي في الدخان
يا عم لو حلال أدينا بنشربها, لو حرام أدينا بنحرقها
يا عم أنا باشرب تفاريحي
أو العبارة الذهبية: أنا لو عايز أبطل هابطل
مش دي الأسباب يا صاحبي..الأسباب الحقيقية للتدخين غالبا بتكون واحدة من الحاجات التالية دي
*******
السجاير للجدعان
موافق تشرب حشيش أو هيروين أو كوكايين؟
طبعا لأ.. ليه بقى؟
غالبا هايكون السبب هو الصورة السلبية اللي انطبعت في ذهنك عن العالم دي.. انهم مدمنين ومدّهولين وحالهم منيل بستين نيلة.. صح؟
السجاير بقى مافيهاش الحتة دي
المدخن ده جه الدنيا لقى -مثلا- أبوه بيشرب سجاير.. أو بطل فيلمه المفضل بيشرب سجاير.. أو أعز صحابه بيشرب سجاير.. أو حتى الجماعة الكاو بويز بتوع إعلانات السجاير, بيشربوا سجاير
لأ وممكن تشوف المدخن على إنه
الشخص المهم قوي.. بيكون معاه سيجار
الشخص الجذاب جدا.. بتوع السيما بدون ذكر أسماء
الشخص المفكر الكبير.. زي العباقرة اللي بيدخنوا و يبصوا في الهوا في انتظار الوحي
الشخص الأرستقراطي المهم.. في بيبقى معاه بايب أو غليون و حاطط رجل على رجل
فعندنا تخيل للناس المدخنين انهم ناس كويسين و عادي جدا و الحياة بيس
ده سبب مهم جدا للتدخين خلي بالك
صورة المدخن في نظرك
*******
عادة.. عادي
يا سلام على أول سيجارة في اليوم
يا عيني على السيجارة بعد أكله دسمة
يا لروعة السيجارة مع كباية الشاي
أصبحت السيجارة من الطقوس اليومية المعتادة.. ماعدش ينفع تعيش من غير سيجارة تحبس بيها, أو سيجارة تصطبح بيها, أو سيجارة بعد الـ
السيجارة بقت عادة انت صنعتها لنفسك بانتظامك عليها طول الوقت ده
السيجارة بقت من نشاطاتك المعتادة اللي مش متخيل تعيش من غيرها أصلا
*******
التمرد
لما الواحد مننا بيكون عيل صغير أو مراهق لسه بيراهق.. بيدخن عشان يحس إنه زي الكبار...أو بيتمرد على سلطة الكبار
وقتها بيحس إنه جامد قوي و محدش بيهمه
و زي ما بيقول محمد عفيفي الكاتب الساخر الشهير: التدخين نوع من العربدة النفسية
يعني أنا بادخن عشان مفيش حاجه بتهمني.. أنا الجامد قوي
ده لما كنا عيال.. انت عيّل؟
*******
جلد الذات.. آي
على عكس الشخص اللي فات.. ممكن الواحد يكون بيدخن عشان بيعاقب نفسه إنه عمل حاجة غلط.. بطريقة لاواعية طبعا
زي اللي بيدخن بعد ما بيخسر صفقة ,أو بيحل وحش في الإمتحان ,أو فسخ خطوبته
بيطلع همة في السيجارة يعني
*******
القعدة الحلوة
أنا قاعد في قعدة و الناس كلها بتشرب سجاير واتعزم عليا.. ماشربش ليه؟
الشلة كلها على القهوة بتشيش.. هاختلف عنهم ليه يعني؟
ساعات الواحد بيدخن لأنه مع ناس بتدخن.. كده ببساطة.. وقتها لو دخنت هاتحس إنك طبيعي زي الناس اللي حواليك
*******

بحبك يا نيكوتين
من كتر التدخين الواحد دماغه بتتكيف مع النيكوتين.. عدم اللامؤاخذة المخ بقى مشعشع نيكوتين.. بقى عايز نيكوتين عشان الطاسة تتعدل
مش لما بتتضايق بتبقى عايز سيجارة؟
مش لما بتتوتر أو عايز وقت تركز أو تفكر.. مش بتبقى عايز سيجارة؟
الفكرة مابقتش مجرد عادة يا معلم.. انت عايز النيكوتين عشان تعرف تتعامل مع الحياة
أهلا بيك في نادي المدخنين
صباح الفل
*******
كيف تبطل السجاير؟
دي كلها أسباب التدخين
تقول لي عرفت منين الحاجات دي؟
أقول لك ماهو أصل سيادتك, أنا كنت بادخن.. وبطلت
بطلت؟
أيوه بطلت
عادي كده؟
أيوه عادي كده
ازاي؟
قربوا كده عليّ يا جدعان نشوف الموضوع مع بعض
*******
الصورة الذاتية
من أهم الحاجات اللي بتخلينا نوصل لأهدافنا الحقيقية هي صورتنا الذاتية
زي ما قلنا في رسالة سابقة, إن أهم أسباب الفقر إن الشخص شايف نفسه فقير !! هو كده
الأغنياء حرامية والفقراء شرفاء.. وكمان 5 سنين مش متخيل نفسي وأنا مليونير
هي دي الصورة الذاتية
لو غمضت عينيك وتخيلت نفسك, بعد أسبوع
هل هتشوف نفسك مدخن ولا لأ؟
هو ده سبب عدم إقلاع الكثيرين عن التدخين
إنهم يرون أنفسهم مدخنين أصلا
*******
أعمل إيه؟

الفكرة هنا هي أن تغير نظرتك لنفسك
لا تنظر لنفسك على أنك مدخن وأن هذه طبيعتك
قبل أن تنام مباشرة
اجلس في مكان هادئ..لا يزعجك فيه أحد
ثم أغمض عينيك
ركز في تنفسك واسترخ تماما
وشاهد نفسك وأنت تجري على السلم دون أن تتلاحق أنفاسك
شاهد نفسك وأنت تتناول طعاما صحيا.. وجسمك الرياضي خال تماما من السموم
تخيل.. ما تتمنى لنفسك أن تكونه
تأمل التفاصيل حولك في الصورة.. عش هذه اللحظة وكأنك تعيشها فعلا
تأمل
الصورة التي تراها بتفاصيلها
الأصوات التي تسمعها بتفاصيلها
الأحاسيس التي تنتابك في هذه المواقف
اندمج تماما في هذه اللعبة, حتى تستطيع فعلا أن تشعر أنك تعيش هذا الموقف في هذه اللحظة
ثم افتح عينيك
هذا التدريب البسيط يساعد على تغيير نظرتك الشخصية لنفسك
كي تكون ما تريد لنفسك أن تكون
*******
السر الخفي
بص بقى.. م الآخر السر الخفي وراء التدخين هو التعود.. التدخين مجرد عادة لا أكثر ولا أقل
التوقف عن التدخين ليس بهذه الصعوبة أبدا.. فالنيكوتين ليس المادة الفظيعة التي لا يمكن للجسم الاستغناء عن تعاطيها
الجسم يتخلص من النيكوتين تماما في 72 ساعة فقط... يعني مش زي الهيريوين أو الكوكايين, وأعراض انسحابه من الجسم بسيطة للغاية
البعض يبالغ في وصف إدمانه للتبغ.. على اعتبار أنه مسلوب الإرادة وأن الأمر ليس بيده
إلا أن السبب الحقيقي للتدخين هو أنه قد اعتاد عليه
التدخين مجرد عادة .. خليك فاكر
لذلك تقول إحدى الإحصائيات إن التنويم الإيحائي يعطي نتائج فعالة, أكثر من النتائج التي تعطيها لاصقة أو لبانة النيكوتين
التنويم الإيحائي.. أي مجرد تغيير نظرتك لنفسك.. واعتقادك أنك غير مدخن بطبيعتك
بس خلاص
الطريقة دي كفيلة تماما بتغيير تعاملك مع السجاير
جرب تعمل كده كل يوم قبل النوم.. تمرين بسيط قوي زي ما شفنا
وعلى فكرة.. عمرك ما هاتغير حياتك حتى لو كتبت لك مليون مقال
لو عايز تغير حياتك.. ابدأ بتغيير حياتك
وأديني قلت لك خطوة أبسط من البساطة
بس يا ترى هاتعملها?

انا مش بشرب خلاص دلوقتى بقالى كتير

لو عشان الصوره الرمزيه اللى حاططها يعنى[/CENTER]

**ميرا مار** · 03-14-2009, 04:00 PM

جزاك الله خيرا يا لونلى

موضوع مميز جدا

وصفك وتحليلك للموضوع ولتفكير المدخن

والطريقة السهلة للتخلص منه

حاجة ممتازة الحقيقة

اتمنى ان الناس تقراه وتعرف ان كل شى ممكن بالارادة

شكرا لونلى

**Wild_Angel** · 03-14-2009, 06:51 PM

موضوع جميل جدا
شكرا ليك
بارك الله فيك وفى شباب المسلمين
بأتمنى ان جميع المدخنين يبطلوا...

**free eagle** · 03-14-2009, 07:08 PM

الله ينور يا لونلى

بجد موضوع جامد

والحمد لله انك مبطلها من يامة

ربنا يكرمك

**lolaa fahmy** · 03-14-2009, 07:25 PM

جزاك الله خيرا يا مستر لونلي

ربنا يهدي جميع المدخنين ويبطلوا التدخين

**abdoitthad** · 03-14-2009, 08:58 PM

شكرا ليك لوتلي على الموضوع الجامد

بس ياريت تغير لون الخط

**احمد عبد الحليم** · 03-15-2009, 12:10 AM

تسلم ايدك يا مستر لونلي وفعلا موضوع مهم جدا وبارب يهدى كل المدخنين ويعملو زيك ويبطلوا

**mr.lonly** · 03-15-2009, 01:49 AM

بشكركم جميعا ويارب يكون الموضوع مفيد بالنسبة للمدخنين واللي يعرف حد بيدخن وعاوزه يبطل
وخصوصا انه عن تجربة شخصيه

**Marwa Mahmoud** · 03-15-2009, 07:36 AM

بشكرك مستر لونلى موضوع جميل جدااااااااااااااااااا

ومهم جداااااااااا ربنا يبارك فيك

**mr.lonly** · 03-18-2009, 02:09 AM

بشكر مرورك وتشجيعك يا مرمر وربنا يعزك يارب

الموضوع: تسمح تولع لي ؟

أدوات الموضوع

عرض

تسمح تولع لي ؟

الكلمات الدلالية لهذا الموضوع

المفضلات

المفضلات

ضوابط المشاركة