... هو حضرتك على راسك ريشة ...!!!!!!!!

**Marwa Mahmoud** · 04-15-2009, 10:52 AM

هوحضرتك على راسك ريشه ...!!!!

انت على راسك ريشه تعبير قديم يشير على انك بسلامتك مميزا وانسان من الدرجه الاولى الفاخره السوبر لوكس(مكيف من الداخل)
ولكن
عزيزى ايه اللى انت عاملته حتى تصبح فى مكانتك هذه ؟؟؟؟

وايه المانع فى ان انك تكون مثلا عم حسانين بواب العماره اللى حضرتك ساكن ومتانتك فيها وبتقعد فى البالكونه ومادد رجلك على الاخر

وايه المانع فى انك تكون متخلف عقليا زى الواد بسطويسى اللى دايما يجى ويهجم على عربيتك الهوانداى الفيرنا الجديده ويهذى بكلمات غير مفهومه وطبعا حضرتك مش طايقه ومفيش مانع فى سبه ولعنه

وايه المانع ان حضرتك يكون عند ابن مطلع روحك ومخلى ليلك زى نهارك وعينك فى وسط راسك وايدك على خدك ومستنى المحروس يجى من بره علشان تعرف تنام وطبعا المحروس اللى هو ابنك بيعمل دماغ كل يوم وحياتك معاه قطع من العذاب المتوهج دائما

وايه المانع ان حضرتك يكون عندك سكر وضغط وكام شريان تاجى مضروبينوفيهم سده تسد عين الشمس مش شريان قطره ثلاثه مللى تلهث مع كل نفس وتنتظر الموت مع كل لحظه ومفيش داعى لذكر ملايين الامراض اللى حضرتك ممكن تصاب بيها

وايه المانع ان حضرتك متزوج من عشرين سنه ولم ترزق اولاد يملوا عليك البيت ويونسوا وحدتك التى اصبحت حبل يتلف ويضيق حول رقبتك لتمل الحياه وتصبح مراره طعمها هو مذاقك اليومى

وايه المانع ان حضرتك متزوج من ست (عذرا للكلمه ) كلامها دبش وابتسامتها نكد وغم وانسها خناق وعراك وقربها لهيب مولع نار (واخد بالك من اللهيب اللى مولع نار ) وحبها كالبرق الخاطف يتبعه رعد حارق

وايه المانع ان حضرتك فقير دقه ومش لاقى حتى الهدمه اللى تغطيك فى صقيع شتاء بارد

قولى بقه بالله عليه هو انت على راسك ريشه ؟
طبعا لاه
طيب مالك عند الله حتى ينعم عليك كل هذه النعم ؟؟
لاشئ

طب انت قصدك من الكلام اللى فات دهه كله ؟؟؟ :confused::confused:

انا كان قصدى ان الله عزو جل قديم الاحسان وهو محسن بذاته من قبل خلق عباده
ان الله عزيز لايسال عما يفعل لماذا هذا لذاك ولماذا هذه لتلك
ان الله عزوجل نعمه عديده لاتحصى ولاتعد
ان الله عزوجل حكيم والحكمه لاتحكم على فعل الله وان كانت لنا حكمه
وان الله عزو جل ربما يعطيه ليمنعك وربما يمنعك ليعطيك
وان الله يقدر ما يقدره على عباده للخير لهم

ربما يبتليك بغيرك ويبتلى غيرك بك

مر احد الحكماء وصديق له على قوم لهم ما لهم من النعيم والجاه فقال للحكيم اين نحن يوم وزعت هذه النعم
وصمت الحكيم وبعد زمن ليس بطويل مروا بقوم عليهم ما عليهم من المرض والفقر والعوذ فقال له الحكيم :
واين نحن يوم وزعت هذه البلايا ...فهم جاهل ورد حكيم

اخى العزيز
احمد الله على ما انت فيه من النعم
وعظم ما انعم الله عليك
ومنع عنك الكثير والكثير من البلايا والامراض
ولاتنظر لنعمه الاخرين ربما تكون فتنه... ربما يكون استدراك.. ربما يكون عقاب... ربما .
.انت لاتدرى النعمه ماذا تلبسه من رداء
اذكركم واذكر نفسى بنعم الله علينا
ودمتم مؤمنين بالله وحده لاشريك له

مقرين بنعمته علينا معترفين بذنوبنا راجين ان يغفر لنا