احلام بلا سقف

**Horiaa Swedan** · 04-19-2009, 12:15 AM

السلام عليكم ورحمه الله

احلام بلا سقف

على أد لحافك مد رجليك
اللي يبص لفوق يتعب
احلم على قدك

دايما نسمع الأمثال دي في حياتنا .. لكن حد مننا فكر فيها قبل كده؟؟
هل كل حاجه بنسمعها تبقى صح؟؟
هل كل حاجه اتعودنا على سماعها, لازم نصدقها؟
طيب.. عايزين نتكلم في الموضوع ده شوية وندردش مع بعض

*********

إستراتيجية تحقيق الأهداف
عشان تحقق هدفك لازم يكون ليك حلم.. لازم الحلم ده بيكون هو الوقود اللي بيحركك وبيديك الدوافع انك ماتيأسش
ايه مواصفات الحلم ده؟
القاعدة المهمة هنا هي: ماتحطش سقف لأحلامك
احلم براحتك.. خليك طموح.. خليك متطلع.. لو حلمك صغير هاتفضل صغير.. لو حلمك كبير ومؤمن بيه.. يبقى لازم هاتحققه وتكون كبير

*********

أحكي لكم قصة تانية؟
كان فيه ولد في مدرسة دسوق الإعدادية إسمه
أحمد حسن.. كان مؤمن بحلم.. هو إنه يكون عالم كبير ويحقق اكتشافات علمية تسجل عالميا باسمه
شايف الحلم ده كبير ازاي؟ الولد ده فضل مؤمن بحلمه ومايئسش من الظروف
استطاع أحمد حسن زويل أن يحصل على جائزة نوبل في الفيزياء ويكون واحد من أعظم العلماء في التاريخ
توماس إديسون كان بيحلم انه يخترع حاجه تنور بالكهرباء من غير وقود.. وعمل 999 تجربة فاشلة لحد ما الناس سخروا منه و منحلمه.. دلوقتي اللمبة في كل بيت
بيل جيتس كان حلمه ان الكمبيوتر يكون في كل بيت.. الناس سخروا منه ومن حلمه .. دلوقتي بقى فيه حاجه اسمها الكمبيوتر الشخصي

*********

هي إيه الحكاية؟؟ عايز تقول إيه؟
الحكاية إن الباحثين درسوا سلوك الناجحين في جميع المجالات.. اكتشفوا إن كل واحد فيهم كان له حلم إيجابي كبير وكان مؤمن بيه جدا لدرجة إنه مالتفتش لكلام الناس إللي حاولوا يحبطوه
الحلم ده لازم يكون إيجابي وهدفه نبيل.. رسالة بيحملها الشخص ده وبيحاول يحققها
لو استطاع أي شخص أن يحقق شيء ما.. ففي إمكانك أن تحققه.. كلمة لريتشارد باندلر
يبقى إياك تحط سقف لحلمك.. إياك تيأس.. خلي إيمانك بحلمك الإيجابي هو القوة اللي بتخليك تتخطى أي عقبة
خلي إيمانك بحلمك قوي لدرجة إنك تقف وتتخطى أي صدمة.. لأنك مؤمن تماما إنك هاتوصل لهدفك في النهاية
كل الناس لديهم من الخبرات التي تؤهلهم لتحقيق تغيير إيجابي في حياتهم.. كلمة لريتشارد باندلر
الأمثال اللي قلناها في أول الرسالة اياك تعمل بيها.. لو كانت تنفع زمان يبقى أكيد ماتنفعش في العصر اللي احنا فيه ده.. كل شيء ممكن طالما عندك هدف نبيل وحلم عايز تحققه

*********

خلي الأمثال اللي فوق كالتالي
على أد لحافك مد رجليك
حوله إلى: جيب لحاف على أد رجليك
والمثل الخاطئ اللي بيقول: اللي يبص لفوق يتعب
حوله إلى: إللي يبص لفوق.. هايوصل فوق
والجملة اللي بتقول: احلم على قدك
خليها: ماتحطش سقف لأحلامك

*********

الحلم الكبير هو اللي بيصنع نجاحك.. احلم براحتك وتخطى كل الظروف ولازم تؤمن انك هاتحقق حلمك ده.. لو حلم إيجابي يبقى أكيد أكيد هاتعرف تحققه.. مفيهاش كلام
بتحلم بإيه دلوقتي ؟؟؟
إبدأ حالا بالعمل على تحقيقه

*********

بقلم /د.شـريف عـرفة

**Marwa Mahmoud** · 04-19-2009, 09:15 AM

شكرا ليكى على الموضوع الجميل ده

إحنا سعداء جداا بنضماك لينا

موضوع موفق ويا رب دايما متحرميناش

من مواضيعك الحلوة

**Hassan Mohamed** · 04-19-2009, 10:43 AM

النجاح جزء من احلام اي انسان ... فده شئ طبيعي جدا اننا لازم نحلم بالنجاح وبتحقيق الذات بس المهم اللي يصمم ويكون عنده ارادة في تحقيق حلمه

شكرا علي الموضوع الجميل

**Ma7amed Adel** · 04-19-2009, 02:28 PM

شكرا ليكى على هذا الكلام الجميل وانا رائى من راى حسن

**alaa eid** · 04-19-2009, 04:04 PM

جميل جدااااااااااااا
تسلم ايدك

**Horiaa Swedan** · 04-20-2009, 12:46 AM

اشكركم على مروركم الكريم ومتابعتكم

ولكن لا احب ان تشكرونى قدرما احب ان تفيدونى

ياريت ندعم ردودنا بنقاش فى الموضوع قلولى ايه وجهه الاستفاده منه بالنسبالكم وانطباعكم عنه

**مي القاضي** · 04-29-2009, 08:31 PM

الموضوع جميل جدا

**Horiaa Swedan** · 08-01-2009, 11:26 AM

مرورك كريم اخت مى اشكرك عليه

**S2AH** · 08-01-2009, 08:55 PM

تسلم ايدك يا ريموندا موضوع بجد رائع
وفعلا مش لازم نحبط نفسينا لما نيجى نحلم اى حلم لانة ممكن بعزميتنا احنا يبقى حقيقة ومنديش فرصة لحد لنة يستهزىء باحلامنا
شكرا ليكى

**Horiaa Swedan** · 08-02-2009, 06:15 AM

العفو اخى فى الله اشكرك على مرورك واتمنى ان يكون الموضوع قد نال اعجابك وافادك بشئ ولو صغير

الموضوع: احلام بلا سقف

أدوات الموضوع

عرض

احلام بلا سقف

الكلمات الدلالية لهذا الموضوع

المفضلات

المفضلات

ضوابط المشاركة