سبب من مئات الاسباب فى صرف الشباب نظرهم عن الارتباط بهذا النوع من البنات

[mido777]

بسم الله الرحمن الرحيم

السلام عليكم


حتكلم فى موضوع واقعى وحقيقى ومحدش يقدر ينكره او يبرر انه مش بيحصل ومش موجود فى مجتمعنا المجتمع الجامعى.

كل واحد فينا فى حياته مبادئ حاططها لنفسه قبل اتخاذ اى قرار او قرار الارتباط باى واحدة ارتباط رسمى وجااد يعنى مثلا مثلا:-
واحد يقولك لازم تكون اصغر منى دة مبدا .. واحد يقولك لازم تكون محجبة دة مبدا تانى.

ودى اشياء مفروغ منها طبعا
انا مش جاى اتكلم عن المبادئ دى !!!

انا حتكلم عن سبب من اسباب كتيرة جدا ان كتير من البنات مش بتلاقى الشاب اللى يرتبط بيها فى فترة معينة حيث ان كل زميلاتها ارتبطوا مثلا

مش عارفة ليه والسبب هو الاتى:-

ممكن تلاقى واحد مصاحب بنات كتيير اوى بس مش بيفكر فى اى واحدة منهم
ليــــــــــــــــــــــــــــه؟

انا للتوضيح فقط حتكلم بصيغة انا

بقولك ايه يعم مترتبط بفلانة دى حلوة وكويسة وبنت حلال!

لا يعم هو انا ارتبط بواحدة بتقف تهزر مع دة شوية ومع دة شوية وكانت بتقف تهزر مع صحابى الاول حتى لو زمايلها مثلا لا يعم انا عايز واحدة مش بتتعرف على صبيان خالص ولا حتى لاى سبب انها تكلمهم

يعنى انت اللى شريف اوى ياخويا؟
يبنى انا اه بقف مع بنات كتيير وممكن الناس تفكر انى مرتبط بواحدة منهم او انى حرتبط بفلانة منهم
لا يعم انت بتتكلم فى ايه انسى
انت عايزنى زى مقلت قبل كدة ارتبط بواحدة بقولك كانت بتقف تهزر معانا يبنى وبتهزر مع صحابنا كدة من الشلة وبتاع
وبعدين بقى شوف زمايلها قد ايه من دفعتها بقى ومن برة
ومن هنا ومن هناك

المهم السؤال هنا بقى

عمر البنت فكرت فى الكلام دة قبل كدة؟؟؟؟؟؟؟

ليه الظاهرة دى انتشرت اوى بكثرة خاصة فى مجتمعنا الجامعى؟؟

او اللى هو بقى نظام الشلات دة شلة بنات مع شلة صبيان تقولطك دول زى خواتنا خواتك منين انتى حتستهبلى فيها؟؟
واللى تقولك دة مرتبط اصلا؟؟

وانتى مفكرتيش فى اللى حيرتبط بيكى؟؟؟

انا عايز كل واحد يقول رايه بجراءة
ومحدش يقول ان الظاهرة دى مش موجودة او مش بتحصل

لان انا عن نفسى اعرف ناس بتفكر كدة وناس عملت كدة فعلا ولو سالتونى عن رايى الشخصى



انا بفكر كدة !!!!

تقبلوا رايى بسرور
انتظر منكم مناقشة لطيفة

شكرا لكم

[ميرا مار]

شكرا يا ميدو

هنا للكل الحق فى التعبير بمنتهى الحرية عن ارائهم

اولا عايزة اقولك.. ان انت ليه مفكر ان البنت اساسا هتفكر ترتبط بزميلها؟؟؟؟؟؟؟؟؟:confused:

ثانيا وجهه نظرك جديدة فعلا اول مرة اسمعها ودى حاجة احييك عليها
لان بتنقل لنا فئة من الشباب بتفكر ازاى..وانتوا طبعا اخواتنا فى الله ونتقبل اى كلمة طيبة منكم

[A.H.D]

دة من وجهة نظرى انا شايفة ان الكلام دة صحيح جدا وان اللى بيفكر كدة دة راجل بجد لان مفيش راجل حيقبل على نفسة ان خطيبتة او مراتة تكون من النوع دة
معلش فى الكلمة انا من راييى ان البنت اللى بتهزر مع الشباب انا بنت اهو ببصلها بشكل مش كويس
يعنى بقول بينى وبين نفسى هى بتعمل كدة لية الغرض من الهزار والضحك بصوت عالى اية ؟؟ غير لفت النظر وطبعا مفيش انسان محترم حيبص لواحدة بتتعامل بالاسلوب الجرئ دة
لان المفروض البنت يكون عندها حياء وانا شايفة انة قل جدا فى الوقت الحالى
وممكن تلاقى الولد بيتكلم مع دى ويهزر مع غيرها ووو .... ويوم ماحيختار الانسانة اللى حتشيل اسمة ويديها سمعتة مش هيختار واحدة من اللى كان بيضحك ويهزر معاها
معلش طولت عليكم
والاختلاف فى الراى لا يفسد للود قضية دى وجهة نظرى وهى صح

[Youssef Mostafa]

انا متوافق جدا مع ميدو ومع راى
A.H.Dبصراحة كلام سليم مية المية وبيحصل كتيير اوى
بحييك على الموضوع دة بجد موضوع حلو اوى وقضية جديدة

[sweet girl]

اولا الموضوع حلو وطبعا بشكرك عليه .... انا شايفه ان اكيد طبعا فى فئه من الولاد بتفكر بالطريقه ديه بس انا شايفه ان اسلوبهم غريب ! طيب ممكن نفكر مع بعض بصوت عالى شويه يعنى ليه لما البنت بتتكلم مع الولد ده او بتهزر معاه تبقى بنت اى كلام او يتبصلها كانها بنت مش محترمه؟ واها عايزه تلفت الانظار ! طيب ليه الظن بيروح بينا لبعيد وتفكيرنا بيشطح بينا ؟ يعنى ليه ميكنش كل اللى بينهم مجرد صداقه او زماله وليه فعلا متكنش معتبراه اخ ؟يعنى انا لو هديك مثل فهتكلم عن نفسى انا فكليه علوم زراعيه وعندنا نظام المنظومه الزراعيه والتعلم الذاتى والكلام ده كله عايزه اقولك ان شغلنا وحركتنا فالكليه من غير الولاد حاجه مستحيله يعنى اول ما دخلت الكليه مكنتش بكلم حد من الولاد ولا حتى صباح الخير بس بعد الوقت ما عدى اكتشفنا كلنا بان لازم يبقى فيه تفاعل بينا وبين الولاد وكمان الدكاتره يعنى ده تقريبا سيستم فالكليه ومش شرط ان عشان البنت تبقى محترمه او يبقى فيه حد يفكر فالارتباط بيها انها ما تتعاملش مع الولاد او متهزرش ومتتكلمش معاهم!!صدقنى اللى بتبقى محترمه فعلا بتحترم نفسها فى اى مكان ومع اى حد سواء كانو بنات او ولاد ..انا اسفه اوى انى طولت عليكم بس كنت حبه انى اقول رايى فالموضوع ده لانه فعلا فى ناس كتير بتفكر كده وده طبعا رايك يحترم وهى وجهه نظر برده وياريت انك تتقبل رايى وشكرا ليك عاموضوع الحلو ده