حوا+ ادم = اسره " متجدد"

**Horiaa Swedan** · 06-25-2009, 08:43 PM

بسم الله الرحمن الراحيم

اندهشت لما لفيت قسم حوا وادم وملقتش اى موضوع عن الاسره على الرغم من ان حوا + ادم = اسره

ليه اهتمينا بحوا على حدى وادم على حدى وناقشنا الصراع بينهم لنثبت مين الاحسن ومهتمناش بان المزج بينهم يعطى حياه جديده لابد من الاهمتمام بها

كتير مننا في سن 20-30
وكتير مننا لسة ماتجوزوش
وفي منهم بيفكروا ومحتارين
وخايفين ليفشلوا بعد كدة
ايه رأيكم نتناقش هنا خطوة بخطوة ازاي نبني اسرة سعيدة على اساس قوي من الحب والتفاهم
ويكون رضا الله وفايدة ديننا اهم اهدافها؟
يلا نبتدي مع بعض:

واول خطوة:
اختيار شريك الحياة

:

- فلانة
-نعم ياماما
-فلان متقدملك, هو كذا وبيشتغل كذا و.........
ها ايه رأيك؟ فكري براحتك وردي عشان اقول لوالدك رأيك
-بس أنا خايفة, اوافق ولا ارفض على اساس ايه؟

- يابني ياحبيبي, مش هتتجوز بقى عشان اطمن عليك؟
-ربنا يسهل يا امي
-طب ايه رأيك في فلانة؟
-طب افكر

ايه رأيكم في حيرتهم؟
تعالوا نشوف سوا ايه هيا اسس الاختيار الصح:

اول حاجة واهم حاجة:

الدين:

هو دة اهم اساس للاختيار:
فالرسول صلى الله عليه وسلم قال:
(ان جاءكم من ترضون دينه وخلقه فزوجوه)
وقال:
( فاظفر بذات الدين تربت يداك)
النصيحة هنا موجهة للطرفين انهم يخلوا الدين اساس لاختيار الطرف التاني
لما يكون شريك حياتك يعرف دينه كويس هيراعي ربنا فيك, وهتقدري تأمنيه على نفسك, وهتقدر تطمن انها هتربي ولادكم صح

تاني حاجة:
القبول:
ومش بقصد بيه القبول الشكلي فقط وانما لازم يكون معاه ارتياح نفسي كمان
بمعنى: ان ميكونش في نفور بين الطرفين
يوم مايروح الخاطب يتقدم للبنت, ويراها, لو اي طرف منهم شعر بعدم ارتياح للطرف الثاني دة بيكون سببه ايه؟

هنشوف سوا:
لما بتشوف حد لأول مرة, مش ساعات بتحس كأنك مرتاحله وتعرفه من زمان مع انك اول مرة تشوفه؟
وأوقات لما بتشوف حد لاول مرة بيبقى نفسك يمشي من قدامك بأسرع وقت لأنك مش طايقه؟
نفس الموقف بيتكرر في الحالة دي
اوقات لما بيشوفوا بعض لأول مرة بيحسوا كأنهم مش طايقين بعض, أو بمعني آخر مش قابلين بعض, مع انهم مش عارفين بعض.
ساعات بيكون الانطباع دة صحيح, وساعات بيكون غلط, عشان كدة مش المفروض نحكم من اول لحظة وانما نفكر كويس قبل ما ناخده دليل على ان الجوازة دي ماتنفعش

تالت حاجة:
التكافؤ:

مش لازم يكون تكافؤ علمي وانما تكافؤ ثقافي لان مش كل واحد معاه درجة علمية عالية بيكون مثقف, ولو كان الفرق بينهم كبير هيكون كل واحد فيهم كأنه ف وادي تاني ومش هيعرفوا يتواصلوا مع بعض

كمان لازم ننتبه لنقطة: التكافؤ المادي:
مش دايما بيكون مهم, ولو ان البعض بيهتم بيه جدا, لكنه اساس غير صحيح للاختيار, اه لازم يكونوا قريبين من بعض لكن مش لازم يكونوا متساويين تماما صح؟

نسينا حاجة مهمة قوي وهي التكافؤ العمري:
بمعنى انه لازم يكون فرق السن مناسب, طبعا الاغلب بيفضل انه الشاب يكون اكبر من البنت وتقريبا كل البنات تفضل كدة
لكن لازم ميكونش فرق السن كبير قوي عشان يكون تفكيرهم قريب من بعض, ولانه لو كان الفرق كبير قوي هتحصل مشكلات كتير بينهم
كمان حاجة مهمة
لكل واحد فينا مواصفات معينة وصفات يتمنى انه يلاقيها في شريك حياته
مهما كانت الصفات دي لازم يكون اول حاجة فيها الدين والاخلاق
بعد كدة اي صفات تاني لازم مانكونش مبالغين فيها
وكمان مش لازم نتمسك بيها كلها يعني لو لقينا ان معظم شروطنا متوافرة يبقى ماندقش على صفة واحدة مالقينهاش الا ان كانت حاجة جوهرية
وفي صفات كلنا متفقين انها لازم تكون موجودة ف اي حد يقدم على خطوة الزواج:
واهم حاجة هي القدرة على تحمل المسئولية:
لازم الشاب او البنت يكونوا قادرين وفاهمين يعني ايه مسئولية بيت وزواج
وانها مسئولية كبيرة ومشتركة بينهم هم الاتنين
يعني ايد لوحدها ماتسقفش ولازم يتعاونوا سوا عشان المركب تمشي
ونخلي بالنا من حاجة مهمة جدا: ( كلكم راع وكلكم مسئول عن رعيته)
لازم الشاب ينتبه ان مسئوليته مش فلوس وانه يزعق في البيت وصوته يكون عالي وبس
ولازم البنت تفهم ان مسئوليتها مش طبخ وتنضيف وخلفة وبس
لازم نفهم ان اسرة معناهها كبير
اه دي جزء من مسئولياتهم لكن كمان مسئولين انهم يكونوا نموذج لاسرة مسلمة مفيدة لدينها ومجتمعها
لازم ينتبهوا انهم من اهم مسئولياتهم تربية جيل قادر على انه يخدم دينه وبلده
ومن مسئولياتهم انهم يخافوا على بعض ويهتموا ببعض
وانهم يساعدوا بعض في قيادة سفينتهم لغاية ماترسي على بر الامان
هي دي اهم الاسس ومنتظرة مناقشاتكم عشان نشوف ايه تاني ممكن يكون اساس للاختيار؟

**AHMED FTIHA** · 06-25-2009, 10:03 PM

بجد بجد موضوع جميل جدا جدا

وخصوصا انة واقعى

**Horiaa Swedan** · 06-26-2009, 01:01 AM

اشكرك على مرورك اخى الكريم واتمنى تكون استفدت منه

**Wild_Angel** · 06-28-2009, 12:16 PM

ريموندا الموضوع بجد رائع جدا وخصوصا انك فعلا اتكلمتى ان آدم و حواء = أسره
جزاكِ الله خيراً
نصائح من ذهب واتمنى أن أرى منكِ المزيد

**Horiaa Swedan** · 07-01-2009, 02:57 AM

اشكرك اختى فى الله ويلدا واشكر الله حقا ان الموضوع قد افادك واتمنى ان يفيد باقى الاعضاء

**ALY ELSAYED** · 07-01-2009, 05:51 AM

الله ينور عليكي يا ريموندا

اسلوب جميل وموضوع مميز

جزاكي الله كل خير

**Mohamed Hashem** · 07-01-2009, 06:55 AM

برافو ريموندا
برافو عليكى انك تدورى على الفكره اللى تنقصنا
وتناقشيها
اشكرك جدا وبجد اتمنى كتير من الاعضاء يشوفوا
موضوعك ويستفيدوا منه
اما انا فعملتها من زماااااااااان ههههههه
والحمد لله رب العالمين الذى تتم بنعمته الصالحات
عايش فى تفاهم وود

**شهاب بودا** · 07-01-2009, 02:18 PM

مشكور على الشغل

**Horiaa Swedan** · 07-02-2009, 04:59 AM

اشكركم على مروركم الكريم حقا اسعدنى مرورك اخى فى الله كريم واتمنى ان يكون الموضوع قد افادك

كما اشكرك اخى محمد هشام وانتظر منى باقى السلسه لتظل حياتك باذن الله فى ود واسال الله ان يديم عليك رضاه وان يرزقك بالذريه الصالحه ان شاء الله

وشرفنى مرورك اخى شهاب وانار موضوعى متابعتك

واسال الله العظيم ان يفيد موضوعى الجميع