.... ناقص دبدوب ....

**mr.lonly** · 07-10-2009, 01:44 PM

الســـ عليكم ورحمة الله ــــلام

ارجو التعبير عما بداخلك بعد قرائتها

فتشت في شنطة هداياي الراجعة وملقيتهوش
دورت في كل هدية كتير بالطول والعرض
وقلبت الشنطة كمان علي الارض
ولقيت دبلة وجوبات وكروت
وجنيه مقسوم وصور وقلوب
لكن برضة ناقص دبدوب
كل اللى معايا في قلب الشنطة بيستنظر
وبجد الشنطة بدون دبدوب ملهاش منظر
كل الجوابات ممكن يكتبها حبيب غيري
والدبلة كمان موضوعها اتشال من تفكيري
والباقي حاجات بتكون وتكون بين اى اتنين وبتتكرر
وفي شنطة كل حبيب وحبيبة هتلاقى حاجات منهم واكتر
هتلاقى دموع وشموع وفرح
وأمل ساكن ....... ممكن لكن !
مش كل حبيب بيجيب دبدوب
...... وازاى انساه
وانا كل ايامى الحلوة معاكى معاه
ايام ما حلمتك قبل ما اطول
وايام ما عشقتك قبل ما انول
وايام وايام بتفوت علي طول
وانا وانتى بنبنى في كل دقيقة
جنينة حب وشوق وأمل
وانا قلبي الديب علي ايديكى
والله خلاص اصبح حمل
كنت اما ازعل ... الاقيكى بتجرى علي الدبدوب لجل يصالحك
وفي احزانك
كان بيمد ايديه علشان يمسح دمعة جرحك
وفي فرحك كان من فرحه يطير
وانا كنت بغير لما انا بعرف
انه امبارح كان بين دراعينك
وبحس ساعات انه حرس بينى وبينك
وبحس ساعات انه خلاص قرب منك وايديكى عليه وعنيكى عليه
فأجرى واطلع صورتك وانده
والله ياروحى انا اللى شاريه
فاكراه
والا انتى خلاص ناسياه
مع كل زمانى اللى عشقته
طب فاكره انا امتى زمان جبته
كانت اول مرة انطقها بحبك قدامه
وأبص في عنيكى قدامة
كانت اول مرة ادخل في عنيكى من غبر ما اخجل
سلمت كتير علي كل رموشك علي المدخل
ولقيتنى فى نن عنيكى خلاص بعد المشوار
ولقيت في نن عنيكى جناين فل ... ودار

عارفة....
مع ان عنيكى ماهيش خضرة
لكن .. مليانة أمل بتحاوطة الاحلام والخضرة
وأنا كل ما انام قلبي الحيران بيلوم رمشى
وأما اتحرك واعمل ماشي
بيقوللى حرام بس هاتمشي
وف لحظة لقيتنى خلاص مطرود
علي ناصية أول رمش بعيد
من غير دبدوب
قلبي الطيب
مش قادر ينسي سنين فاتت
مش قادر ينسي حكاية حبه عشان غلطة
ويقول ماتت
جايلك من تانى بحلم جديد
بأمل واشواق ولقي ومواعيد
ومعاه دبله وجوابات وكروت
وجنيه مقسوم وصور وقلوب
جي بيقولك ...........
خلي الدبدوب . !
خلى الدبدوب
انا عايز رأيكو بس بصراحة
__________________

**AHMED FTIHA** · 07-10-2009, 01:51 PM

بجد رائع اوى منقدرش نقول غير كدة يا باشا
مثلت معانى كتير فى كلام قليل الله عليك
والاحساس عالى برضة

الله ينور

**mr.lonly** · 07-11-2009, 01:51 AM

شكرا علي مرورك يا جميل وردك هو الاروع صدقني

**Sara Gamal** · 07-12-2009, 10:04 PM

أنا مش هقول أى حاجة خالص ليك

لأنك عارف رأيى فى كل مواضيعك من قبل ما اقراها

بس هقولك

كلامك وجع فيا قوى وشد دموعى من جوه عيونى ويمكن من جوه قلبى

شكرا يالونلى

**احمد عبد الحليم** · 07-13-2009, 03:26 AM

والله يا لونلي مواضيعك كلها جامدة مووووت وبتعجبني جدا
شكرا علي مجهودك الرائع دة .....

**mr.lonly** · 08-14-2009, 01:18 AM

شكرا يا سارة علي ردودك الجميلة دي ومرورك الرقيق دة

وشكرا يا احمد علي مشاركتك وبتمني افضل كدة دايما مواضيعي تنول اعجابكم

**حسبى من الدنيا رضاك** · 08-14-2009, 01:07 PM

جميلة جدا جدا بجد روعة بتعبر عن حاجات كتيرة جوانا منها اللى بنخبيها ومنها بنحلم بيها

**ميرا مار** · 08-15-2009, 11:22 PM

مش عارفة اقولك ايه..

فظييييييييييييييييعة مالهاش وصف يا لونلى

اصلها جديدة ودى حلاوتها

كتير بيعبر
وكتير بيوزن ويقفى الكلام

لكن البداع دا له ناسة

جميلة
وانا فى اولها قلت
يااه فى حد رقيق كدا؟؟

طب جاب الفكرة ازاى؟؟
وقعدت اسابقى السطور عشان اشبع الابتسامة اللى اترسمت على وشى من اول سطرين

بجد تسلم ايدك:o