برنامج •●• محــارة♥ قلــب •●• هديـــه من البرنامج لكل اللى شاركوا....ص 83

**Wild_Angel** · 08-07-2009, 09:34 PM

ميمي السؤال فوق

**Mimi** · 08-07-2009, 09:38 PM

وعليكم السلام ورحمة الله وبركاته

طبعا ياوايلد انا معاكي جدآآآ جدآآآآ في الموضوع دا

ومن الأسباب اللي تخلينا نعمل كدا ان للأسف بأه في خلل كبير في مناهج التعليم في وقتنا الحالي دا

فضروري أوي نأسس أطفالنا بطريقتنا المناسبة لأن الحاجات دي بنفتقدها بعد كدا في المدارس الطفل زي العجينة بنقدر نشكله براحتنا وهو صغير وكل ما كبر بيبقى صعب أوي الموضوع دا

وعشان كدا زي ما قلتي من الحاجات المهمة في تعليم الأطفال قبل المدرسة تحفيظهم للقرآن ومش بس كدا تعليمهم مثلا ع الكومبيوتر

وأنا شخصيا ضروري أعمل كدا مع أطفالي ان شاء الله في المستقبل ودايمآ لما كنت بشوف في برامج التلفزيون الأطفال اللي بيعرفو العواصم مثلا او بيعرفو يستخدمو عمليات حسابية أو اللي عندهم معلومات كبيرة عن الكمبيوتر ومبيكونوش لسة دخلو مدرسة بنبهر بيهم أووووووووي وبشوف فيهم أولادي ونفسي يكونو كدا

أنا عارفه اني طولت في الرد دا بس عشان فعلا انا معاكي جدآ في النقطة دي ياحبيبتي ومعلش طلع متأخر عشان كان معايا تليفون :(

**Mimi** · 08-07-2009, 09:39 PM

المشاركة الأصلية كتبت بواسطة Wild_Angel

ميمي السؤال فوق

منا كان معيا تليفون معلش والله :(:(

**Wild_Angel** · 08-07-2009, 09:41 PM

اوك يا ميمي

طيب هل انتى شايفه ان مثلا التععامل مع الاطفال باللغه الانجليزيه زى ما أمهات كتير بتعمل تقولى قول sorry قول thank u
وتقوله dont worry
وتعلمه قول dady قول mammy
هل شيفاه انه من الصح توجه دايما بالانجليش انا مش ضد تعليم اللغه بالعكس انا معاها تماما
ولكن انتى ايه رأيك فى الموضوع ؟؟

**Mimi** · 08-07-2009, 09:50 PM

لآلآلآلآلآلآلآلآ بالعكس بصي حبي

في نوعيات بيعملو كدا مع ولادهم مش بس على كم كلمة دول ساعات يلغولهم اللغة العربية وميخلهومش يكلم غير انجلش

والله اعرف ناس عرب ميعرفوش عربي خالص انتي متخيلة ومش هقولك عايشين برا في اروبا لاء عايشين في دولة عربية بس الغلط مش عليهم

الغلط على الأهل اللي حرموهم من أقوى وأفضل لغة في العالم لغة القرآن ولغة رسولنا عليه أفضل الصلاة والسلام

مفيش مانع نعلم ولادنا الانجلش وفيش مانع ندخلهم مدارس اللغات بس لازم نخليهم يتمسكو بالعربي مينفعش كدا والله

الرسول عليه أفضل الصلاة والسلام كان يتقن 7 لغات .. وكان بيستخدم لغة كل قوم مع ناس يعني مع اصحاب اللغة دي

بس متخلاش عن لغته دي لغة القرآن

يعني باختصار أنا مش مع اللي بيعملو كدا عشان يبقو متحضرين أو متمدنيين بالعكس أنا بحترم جدآ اللي بيجيد اللغة وملاقيش في كلامه كلمة انجلش

انتي عارفه ياوايلد في بريطانيا لغو الاحتفال بالهالوين عشان هو مناسبة أمريكية تخيلي مش عايزين شعبهم يتعلق باحتفالية او عادة بتعملها دولة تانية

والفرنسين أكتر ناس متمسكين بلغتهم مفيش أي دخيل عليها .. وبردو دول أروبا كدا مفيش دولة تلاقيها بتدخل لغة تانية على لغتها

يعني عمرك شوفتي أمريكي بيكلمك انجلش على فرنسي !! غريبة جدآ احنا اكتر لغة بيتلعب فيها ومعرفش ليه عايزين يقلبوها ويحرفوها

انا مش موافقة خالص على تعليم الاولاد الدمج بين اللغة العربية واي لغة تانية

وبنفس الوقت موافقة على ضرورة تعليمهم اللغات الاخرى

وشكرآآآآآآآآآآآآ

**Wild_Angel** · 08-07-2009, 09:58 PM

انا بشكرك بجد يا ميمي على ردك ده

طيب يا ميمي تعرفى ان كتير من الناس متمسكين بالحديث بتاع ضرب الاطفال لو متعلموش الصلاه
علموهم لسبع واضربوهم لعشر مع انه حديث ضعيف وده كان اتقال فى برنامج لاحد الدعاه(مصطفى حسنى)

ميمي مين من رأيك لازم يهتم بتعليم الصلاه الام ولا الأب؟؟ وهل شايفه ان ضرب الاطفال كعقاب حل؟؟

**Mimi** · 08-07-2009, 10:07 PM

الاتنين لو كانو ملتزمين الأولاد هيتعلمو لوحدهم بدون صعوبة

أنا بحب أوي أشوف الآباء اللي واخدين أطفالهم معاهم في صلاة الجمعة

هما بيلعبو وكل حاجة بس لو اتعودو على المشوار دا هيحاولو يغيرو تصرفهم كل مرة ويبتدو يقلدو مثلا حركات باباهم

الأم وهيا بتصلي هتلاقي ابنها أو بنتها بشكل تلقائي عمال يقلدها زي ما بيبتدو يتعلمو يقولو بابا وماما بردو بيقلدو الحركات

يكبرو شوية نحاول نخليهم يحفظو الكلام اللي بنقوله والحركات دي ونحببهم فيها زي مثلا نقولهم انهم بعد ما يعملو كدا ممكن يقولو لربنا كل اللي نفسهم فيه من لعب وحاجات حلوة ودي السلمة الأولانية للدعاء

هتلاقيهم بعد كدا يصلو في كل مرة بيشوفو مامتهم أو باباهم بيصلي ويزيد عندهم حتة الاحساس بتوقيت الصلاة انه بيتعمل خمس مرات في اليوم

وبعد كدا ان شاء الله هتلاقيها حاجة بالفطرة عندهم مش غصب عنهم خالص وهتكون دي حياتهم الطبيعية اللي مش هتريحهم الا ما يصلو كل يوم زي ما اتعودو

وزي ما بيقولو الصلاة عادة تتحول لعبادة كل ما كبرو هيزيد خشوعهم وتفهمهم للصلاة

في موضوع الضرب متهيألي الضرب بيختلف انا بيتهيألي العقاب عمومآ بيسبب رهبة في نفس الطفل فممكن يعمل الحاجة عشان خايف بس من العقاب لكن الموضوع دا ممكن يبقى خفيف بالتفاهم الأول والمسايسة أكبر سلاح للاقتناع والضرب عمومآ ممكن يبق خفيف خالص مش لازم اكسرله ايده ولا رجله عشان مصلاش هههههههههه

طبعا انا مش هقول رأي في حديث دي حاجة مسلم بيها مينفعش اقول ينفع ولا مينفعش بس انا بقد الضرب يكون خفيف والطفل اذا اتعود على اسلوب المسايسة من صغره هيمشي بيه طول حياته مش هنحتاج نوصل للضرب ان شاء الله

**Wild_Angel** · 08-07-2009, 10:10 PM

جميييل اوى يا ميمي

طيب سؤال مهم جداً وأجبارى :D

لو كنتى مدرسه فى مدرسه أبتدائى وكنّا فى شهر شعبان وعايزه تتكلمى مع الاطفال عن شهر رمضان وتحببيهم فى الصوم وقراءة القرءان
حتقوليلهم أيه؟؟

**Mimi** · 08-07-2009, 10:21 PM

يااااه لازم أبقى مدرسة ياوايلد دنا مش بعرف أدرس خالص

المهم أول حاجة هجيبلهم شوكولاته وحاجات حلوة عشان يبطلو دوشة ويسمعوني

بصي هقولك هعمل ايه معاهم لو كنت مثلا في شهر شعبان في أوله لسة

هنعمل غيمة كبيرة اووووي ونعلق عليها كذا هلال بعدد أيام الشهر وورا كل هلال في معلومة نسحبها كل يوم

وكل يوم نسحب هلال منهم ونتكلم فيه لحد ما شهر رمضان ييجي .. هيكون طبعا كل هلال فيه معلومات خفيفة عن رمضان عشان أطفال بأه

نعرفهم مثلا ان الصيام بدأ في السنة التانية من الهجرة اهو دا هلال وان الرسول عليه أفضل الصلاة والسلام كان بياكل عدد فردي من التمر زي 3 او 7 تمرات مثلا وان رمضان دا هو الشهر اللي نزل فيه القرآن وان في أواخر رمضان في ليلة القدر وأقولهم انه متحددش اي يوم عشان نفضل كل يوم نصلي وندعي ربنا وان سيدنا ابراهيم اتولد في شهر رمضان

وان بعد الشهر بييجي العيد عيد الفطر اللي بنشتري فيه هدوم جديدة وبنفلس بابا وماما ههههههههههههههههههه لالا طبعا مش هقولهم روحو خدو فلوس وكدا لكن ي المعلومات اللي ممكن أقدمهلهم ممكن نعمل أفكار تانية بردو زي مثلا أعمل طاقات تهنئة وابعتها مع الطفل يوديها لأهله وبكدا يعرف ان الناس بتهني بعض بالشهر دا

نعلمهم مثلا أدعية أو أذكار معينة وأعمل هدايا أوزها عن اللي يسمعهم وكدا وبكداالاطفال يتشجعو يعرفو معلومات بشكل ترفيهي ومفيد كمان وأكيد الواحد ممكن يطلع بأفكار كتير لو الوقت متاح

**Wild_Angel** · 08-07-2009, 10:26 PM

طب تصدقى والله فكره جميله اوى اوى

الاطفال نباتات الحياه وفى عمر الزهور بتحتاج لبذور جيده ليكون نبات قوى

ميمي كلمات المدرسين احيانا بتكون البذور دى
ايه اكتر موقف او كلمه اتعلمتيها من مدرسينك او عاده كويسه اتعلمتيها منهم ومش قادره تنسيها لحد دلوقتى؟؟

الموضوع: برنامج •●• محــارة♥ قلــب •●• هديـــه من البرنامج لكل اللى شاركوا....ص 83

أدوات الموضوع

عرض

الكلمات الدلالية لهذا الموضوع

المفضلات

المفضلات

ضوابط المشاركة