::::... مكتبة شعر ( SaSa ) ...::::

**Mahmoud Slem** · 10-21-2008, 11:04 PM

::::... مكتبة شعر (SaSa) ...::::

اديني مطلع أغنية
إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

واحد أخينا من طيبته قاعد يصالح في خطيبته
جايب لها وردة يا خيبته قالت له أروح يا عنيه

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

وجارنا كان حتة فشار فهمني إن أبوه طيار
ده عربجي وأبوه حمًار وأمه اللي شادًه العربيه

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

وأخينا ده جاي مـ المنيا ويقولي جاااي من ألمانيا
ما بان عليه الكدب في ثانيه لابسلي كاب عـالجلابيه

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

وفي مرة باكل طبق الفول في شيء حصل كان مش معقول
أمي قالتلي كفايه بقول شاحتين شوية ملوخية

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

وسعيد صبارص كان صاحبي في الشدة كنت ألاقيه جنبي
ديتها سهره تراللًي ودماغي ترجع تاني عالية

إدينـي مطْلَــــــع أُغنية أغَني فيها للصُبْحِيـــــة

وتِسْمَعوا كُلُكُو جَنبي أحلى الأغاني الشبابية

أنا كنت يوم فاكر اللحمة فاكر كمان إنها طعمه
نحمدو ونشكرو عالنعمة ويارب خلي الطعمية

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

ومرة أخدوني تَحَرِي وقفايا كدة وَرَمْ دوغري
مهمنيش حاجة لأني جوز خالتي صول في الداخلية

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

وأول ما تدخل حتتنا تقابلك الريحه النتنه
مكتوب هنا على بابا بيتنا ممنوع دخول الحراميه

إدينـي مطْلَــــــع أُغنية أغَني فيها للصُبْحِيـــــة
وتِسْمَعوا كُلُكُو جَنبي أحلى الأغاني الشبابية

ورحت مرة أنا للجزار قلت أشتري فشة وممبار
بفلوسي جاب لي رجل حمار وقاللي تنفع تسقية

**Mahmoud Slem** · 10-21-2008, 11:06 PM

مسكين وحاله حال .....بكاني على حاااااله
غلبان وعنده عيال .....والصبر راس ماااااله
وليل نهار شغال .....زي الحمار حاله
ما الارض مش أرضه .....والمال مهوش ماله

شغال وبيحارب .....في الفقر من بيت بااااب
من الحزن ليه نايب .....وإن قال فرح كدااااب
ولربه جه تايب .....وربك التواااااب
رجع اللي كان غايب .....لأهله وعياااااله

مسكين وحاله حال .....بكاني على حاااااله
غلبان وعنده عيال .....والصبر راس ماااااله
وليل نهار شغال .....زي الحمار حاله
ما الارض مش أرضه .....والمال مهوش ماله

والله ماهو عايز .....غير ناس تفكر فييييه

أو حد يوم جايز .....يمسح دموع في عنيييه
غيره مفيش حاسس ..... باللي يبات يداريه
غير ربك الحارس .....والجنه باقياااااله

مسكين وحاله حال .....بكاني على حاااااله
غلبان وعنده عيال .....والصبر راس ماااااله
وليل نهار شغال .....زي الحمار حاله
ما الارض مش أرضه .....والمال مهوش ماله

**Mahmoud Slem** · 10-21-2008, 11:07 PM

نظره مستقبليه

إطلع بقه م المية العكرة وخد غطسين على بره
نضف مخك بص لبكرة وإنسى الماضي لمرة

لف ودور في الأرض الواسعة خد من غيرك عبره
علشان توصل لازم تسعى وتسيبك م الذكرى

كوم القش ده يبقى الدنيا وانت يدوب الإبره
كون الأول نط في ثانية وإطلع سلم بكره

خد بالك دايماً م الفرصه دي ما بتجيش غير مره
يتكون كده موكوس ميت وكسه يا هتكتشف الذره

إوعى تقول بكره هتتعدل ومتمشيش بالقدره
إسعى وربك يوم هيسهل واخرج بقه م القِدره

وأما هتوصل عارف دورك فاكر كنت البذره
ينزل دمعك يسقي جذورك يصبح اسمك شجرة

**Mahmoud Slem** · 10-21-2008, 11:08 PM

وطاويط

عايشين وطاويط
ساكتين علطول
وإن قلنا كلام فكلامنا عبيط

في نهار نايمين
بالليل صاحيين
ماسكين نبابيت علشان وطاويط

بنقول في كلام
ومهوش مسموع
وإن مره سمعته تقول ظغاريط

جناحتنا خفاف
بالرغم ده كله تشوفنا تخاف
وتخاف من إيه محناش عفاريت

قاعدين بنقول ونعيد ونزيد
بنقول شعارات
وكلام وحديت

وهنعمل إيه ماهو صووت مكتوم
طالع من جوه بحر غويط

وعددنا كبير
ملايين ملايين
والخمسين منا يِمْلُو غَبيط

يضربو لبنان
بغداد وجولان
محناش سامعين أصلنا وطاويط

بننام مقلوب
وعيشيتنا كلها بالشقلوب
وإن مره سمعنا رصاصه نطير
ونهيص ونظييط

بنقوم بالليل نفضل صاحيين
علشان بنخاف كده مـ الديناميت

نسمع في صراخ وعويل نايمين
بتزعقو ليه محناش فاهمين
والله وطاويط

يضربو لبنان يضربو حلوان
لو ضربو الكهف بتاعنا كمان
علطول هنطير
ونروح لبعيد
ونعيش وطاويط

**Mahmoud Slem** · 10-21-2008, 11:09 PM

مذكرات يائس

أنا لقمه بايته جنب حيطه في حته ضلمه أكلها كلب
أنا نكته بايخه أو عبيطه سمعها واحد مات وطب
أنا بيض ممشش ريحته وحشه ونحس دايم مستمر
أنا طير معشش في الترب فكر في مره يستقر
انا صوت بعيد دبحة وريد وشوكه في زور واحد جعان
انا طبعا غير فنان فريد وبيطلق لمشاعره العنان
أكيد هقول في مره لأ وأقوم وأقف على رجلي
لقيت طلعلي في رجلي شق وضعت وراح خلاص حلمي
فكرت في مره اكون شجاع وازعق بصوتي الناس تخاف
و طلعت في الآخر بتاع أو بير غويط جاله جفاف
هييجي اليوم أكيد هييجي وأزحزح الطوبه التقيله
وهبقى محمود المليجي وعمري ما اتنيل بنيله
وعمري ما أضعف أو أإن وهفتري عالخلق كله
ولا عمر يوم يركبني جن وهنسى ماضيه وذله
ولا هبقى طيب أو كريم بالعكس لازم ابقى عنتر
والناس هتبقى عب حليم والباقي يبقى عبله واكتر

**Mahmoud Slem** · 10-22-2008, 10:46 PM

هى المكتبه اليتيمه دى
محدش عايز
يبص فيها
خالص

طيب
شيلى المكتبه دى يا رانيا

**emu** · 10-22-2008, 10:56 PM

انا جيت اهو يا محمود ولا تزعل
بس بجد والله الموضوع جامد تسلم ايدك

**Mahmoud Slem** · 10-22-2008, 11:09 PM

ربنا يكرمك
يا شيماء
مصبرانى والله
ودايما بلا ريقى
هههههههههههههههههههه

الف شكر ليك
يا شيماء
بجد منورانى

**Hassan Mohamed** · 10-22-2008, 11:13 PM

جامده ايه بس يا شيماء انتي ليه بتخدعيه

ده بيقول

أنا كنت يوم فاكر اللحمة

هههههههههههه

والله الواحد معارف ده شعر ولا ايه ده بالظبط

**Mahmoud Slem** · 10-22-2008, 11:18 PM

جامده ايه بس يا شيماء انتي ليه بتخدعيه

ده بيقول

أنا كنت يوم فاكر اللحمة

هههههههههههه

والله الواحد معارف ده شعر ولا ايه ده بالظبط

ايه يا حسن
بتصبرنى
يا عم صبرنى انت كمان
وبعدين الموضوع
فى منتدى الضحك والفرفشه
يعنى لازم
يكون
شعر نص
كوم
امال انت عايز ايه يعنى

وبعدين لما تدخل تخبط
افرض حد خالع راسه
مش لازم
يركبها
هههههههههههههههههههه

الموضوع: ::::... مكتبة شعر ( SaSa ) ...::::

أدوات الموضوع

عرض

::::... مكتبة شعر ( SaSa ) ...::::

الكلمات الدلالية لهذا الموضوع

المفضلات

المفضلات

ضوابط المشاركة