هل طبعك ... الصمت لما تتألم ؟

[Mimi]

هل طبعك .. الصمت عند الألم ؟

تعمل ايه لو طبعك هو الصمت لما تتألم

بيقولو الصمت أبلغ لغات الكلام

وبيقولو اذا كان الكلام من فضة فالسكوت من دهب

كلام كتير اوي اتقال في الصمت ..وكتير مننا بيعانو منه



بس تعمل ايه لما يكون طبعك هو الصمت لما تحزن أو تغضب أو تتألم

لما يكون في حد غالي عليك اوي ويأذي مشاعرك بتصرف معين او حتى بكلمة

ساعتها يلازمك الصمت والسكون وشفايفك تتجمد لانها مش عايزه تقول حاجة تدايق الشخص الغالي دا رغم انه دايقك

وتتحجر الدموع في عينيك بردو خوفآ على مشاعره

هتعمل ايه لو تجاهلك الشخص دا ؟؟ وتجاهل ألمك ونسي اساءته ليك !!

وتابع حياته معاك ولا كأن في حاجة حصلت..ويفضل الصمت ملازمك طول الوقت دا بل بالعكس دا يتحول لطبع فيك !!

ويفضل الألم كل يوم يقتل فيك ..هتعمل ايه ؟

هتعمل ايه لو الموضوع موقفش عند تجاهل الحد دا عنك ..لاء دا التفت لأولويات واهتمامات تانية وبعد عنك ...سابك

وانت بتحاول تلاحقه وهو مش عايزك خلاص وفي الاخر تسيبه عشان ترضيه بردو وتفضل في الآخر مع ذكرياتك

ويرجعلك الشخص ( الغالي ) واللي لسه بردو غالي عندك ..وانت تنبسط برجوعه بس متلحقش تنبسط لانك هتتفاجئ انه بيتهمك بالتقصير والاهمال وبالبرود وبأنك سيبته !!

وانت بسكوتك وصمتك مش هترد عليه وتقوله ان هو اللي كان غلطان ولا هترد على اتهاماته وتفضل عايش مع تألمك دا لمجرد بس انك عايز يبقى قدام عنيك بس ومش عايزه يسيبك تاني

كل حاجة فيك اتجمدت لانها مقدرتش تتحمل الألم اللي وصلتله ...

--------------------- عايزين الشعور دا يخلص لحد هنا ؟ ------------------

دي حرية شخصية لقارئ الموضوع بس الحقيقة غير كدا

الحقيقة انك برجوعه ليك اتعلقت بيه أكتر وحسيت انه بوجوده معاك انك ملكت العالم كله بين ايديك

ويرجع يختفي تاني من حياتك وهو عارف ان تصرفه دا ممكن يقتلك من القلق والخوف من انك تعيش التجربة المؤلمة اللي فاتت دي تاني

بس هيسيبك بردو ويختفي بس المرادي هيسيبك تنهار وتتحطم وتتدمر ..ويرجع تاني ويسألك ليه سيبته ويعاتبك ويلومك وهيكون جواه علامة استفهام كبيرة عن سبب تصرفك كدا معاه




حد فيكم حس الاحساس دا قبل كدا ؟

حسيت ان قلبك بقى أضعف من انه يتحمل ألم تاني من اللي حواليك وانت مش عارف تتكلم وتعبر عن حزنك ومأساتك ومش عارف تلوم او تعاتب ومن قوة الطاقة المكنونة دي ممكن تطلع في صورة تانية خالص وهيا الضحك والمرح والتفاؤل والسعادة ..بس للأسف ظاهريآ بس قدام الناس بس !!

طيب ولو طلعلك قلب حنين وعايز يحتويك ..هتقدر تقوله وتعبرله عن كل اللي اتعرضتله؟ ولا صمتك اللي بقى طبع فيك هيمنعك بردو عن الكلام واللي بقت نقطة ضعف فيك

[Sara Gamal]

يااااااااااااااااااااااااااااااااااااااااااااااااا ااه ياجودى عارفة إنتى عملتى ايه بالكلام ده

كانك جيتى بايدك وضغطتى اوى على جراح بنتوهم انها طابت واتقفلت

بس تعرفى كلامك يمكن يكون مطهر يقضى على الجروح دى ...اتمنى ده

بس انا هكلمك عن نفسى ومش عارفة ممكن اتوصف ازاى بس انا زمان اتحطيت فى الموقف ده بس للاسف معرفتش ارجع تانى وقتها شبهت اللى حصل بشخص عنده تبلوه جميل غالى اوى كل يوم يصبح يلمعه ويزينه ومرة واحده وهو بيلمعه وقع اتكسر ورغم انه لو حاول يلزقه هيرجع تانى وممكن محدش ياخد باله من الشرخ اللى فيه الا انه هيفضل هو الوحيد اللى شايفه وهيفضل جواه خوف يقرب منه يقع يكسر تانى

عارفه كمان شبه بركه مايه صافيه وجميله بيتشرب منه بس لو اقل حاجه عكرتها عمرها مهترجع ابدا زى الاول

عارفة وقتها سكت يمكن كان عجز او صدمة او خوف انى ارد الجرح بجرح بس اقنعت نفسى بشىء وصدقته ومازلت مصدقاه الشخص اللى انت حبيته ده مات مات قبل ميجرحك بلحظه واحده وبالتالى انا كل اللى محتفظه بيه من صور جوايا مفهمش صورة الجرح ده بس فى نفس الوقت الشخص ده مات ومات للابد ......واللى بيموت مش بيرجع تانى ابدا

يمكن ده عشان انا فعلا طبعى الصمت مكنش ينفع ارجع وانا مش قادرة اكلم جايز ده صح جايز ده غلط.....بس من يستطيع ان يجرحك لا يملك ان يطيب هذا الجرح

بشكرك ياجودى على الموضوع ده

[Mimi]

انتي فعلا ياسارة أثرتي فيا وواضح ان الاحساس دا تملكك بقوة

بس انا بتمنى ان ميفضلش الطبع دا ملازمك عشانك انتي بس

انتي عارفه انتي بتعملي ايه في نفسك كل يوم بسكوتك على كل حاجة بتدايقك ؟ انتي بتأذي نفسك شر أذى وفي نفس الوقت بتتحملي الألم اللي بتسببيه لنفسك بسكوتك وتحملك

حاولي متديش نفس المكانه لكل حد دايقك لانه مش هيحس بيكي وعمره ما هيشوف اللي بتعمليه عشانه ولما تقل مكانته من قلبك هيخف ألمك وحزنك

وربنا يسعد قلبك دايما ياحبيبتي ويهدي بالك ميرسي بجد على مشاركتك

[خالد أبوسعده]

يااااااااااه يا جودى
و الله كأنك حاسة بالى جوايا
انا بجد من جوايا فاضلى شويه و انفجر
اول مرة اضعف قدام حاجة
و بجد عمرى ما كنت اعرف اتعامل مع الناس بغير الي جوايا
بس مش قادر
حاسس انى متكتف و مش قادر اتكلم
بهزر و بضحك قدام الناس
بس جوايا لا
بقيت بكره اقعد افكر مع نفسى
لانى كل مرة بوصل لدرجة تخلينى اعمل اى حاجة


معلش وجعتلك دماغك
شكرا علي موضوعك الجميل

[Mimi]

لالا خالص ياخالد موجعتليش دماغي ولا حاجة انا مقولتش الكلام دا الا لاني عايزه اسمع منكم ونفسي كل واحد يفضفض بالشكل اللي يحبه بدون اي حساب لكتر الكتابة او اختصارها

دا كان في الاول شعور جميل منك ياخالد انك تكتم جواك كل دا بسبب ضعفك على حسب وصفك للي قدامك واكيد ضعفك دا مش حاصل الا لانك بتحبه ومش عايز تخسره مهما كان وجيت على نفسك وكتمت زي سارة وزي ناس كتير هيبانو دلوقتي

بس دلوقتي بعد النتيجة اللي حصلت ..شايف انك لسه فيك طاقة تتحمل وتكتم ؟ ولا نستنى لما تنفجر وساعتها نراجع نفسنا؟

[خالد أبوسعده]

صح و الله يا جودى
لانى بجد تعبت
المشكله ان الى قدامى دا بيبقى غصب عنه برضه
بأمانه فيه الي مكفيه
بس انا مش قادر استحمل حاسس ان كل يوم بيعدى مشكلتى بتزيد
مع ان المفروض انها تتحل بمرور الوقت
بس الصبر بيخلص و قوه التحمل مره واحدة ملقتهاش
بعد ما كنت بعرف امسك نفسى عن اى حاجة
لقيت نفسى مش قادر امسك نفسى
و صح لازم نراجع نفسنا قبل ما ننفجر بجد
الموضوع تقيل جوايا حاسس انى شايل هم كبير
كلمه حتودينى الجنه و كلمه حتودينى النار
المشكله بجد
ان مصدر سعادتى هو نفسه مصدر تعاستى
فا يا اما اضحى بالموضوع كله و بسعادتى علشان محزنش و اعرف اكمل حياتى
يا اما استنى و يا اما حتبقى سعادة يا اما حتبقى تدمير
بجد تعبت
معلش يا جودى انا بحكى لانى بجد كنت محتاج انى اتكلم
نفسى ارتاح من جوايا زى الاول
بس زى ما بيقولوا كده الفاس وقعت فى الراس خلاص
يا امى اضحى من الاول بكل حاجة
يا اما استحمل حاجة مش مضمون نتايجها

[Mimi]

مهما كان اللي مخليك كدا ياخالد طالما انك مشيت في الموضوع معلش

اتحمل الشوك والعقبات اللي فيه لحد ما تخرج منه للنهاية

المشكلة انت فكرت في حاجة ليها سكك كتير للخروج وانت مصر تتوه نفسك عشان تحبس نفسك جواها ومش عايز تسيبها

عايز تشغل راسك بيها رغم انك مش واصل لنتيجة مرضية !!! بس راضي انك تبقى مستشعرها بس

دلوقتي جيه القرار الكويس اللي منه هتبدأ تتحرك وتروح لاقرب واقصر طرق الهروب اللي هتخلصك من الحوارات دي نهائيآ بحلوها ومرها وعلى رائيك هتضحي بسعادتك عشان تتخلص من تعاستك

ومتنساش هتفضل في انتظار حاجات يمكن يبقى فيها الاحسن من اللي شفته وساعتها تحتفظ بيها وتمسك بيها وحاجات جايز تبقى وحشة وساعتها هتكون عرفت ازاي تتخلص منها بسهولة

متنساش اننا في سن خبرات ..وكلنا بنمر باصعب لحظات ومواقف ممكن يتعرضلها الانسان بس بعد كدا بيهدى الموضوع ومش بتتعرض للضغوط النفسية دي وربنا يطمن قلبك ويهدي بالك للخير دايما والسعادة

[خالد أبوسعده]

الله ينور عليكى يا جودى
متعرفيش كلامك دا ريحنى اد ايه
بجد مش عارف من غير اصحابى كنت عملت ايه
بس هو الموضوع ملهوش غير سكة واحده لللخروج
و السكه دى هى الي حضحى فيها بكل حاجة
و ممكن اكون غلطان بس انا بحاول اخرج و مش لاقى غير الطريق دا
الا لو استحملت شوية كمان و ربنا يقدرنى علي الصبر

معلش وجعتلك دماغك بس غصب عنى
كأنى لما صدقت اتكلم

شكرا ليكى بجد

[Mimi]

اعتبر الموضوع دا مساحة غير محدودة للكلام

اتكلم براحتك ياخالد هو المطلوب اني اسمع منكم

والحمد لله انك ارتحت رغم اني عارفه ان الارتياح دا لمجرد فضفضة مش اكتر

فبتمنالك اللحظة اللي ترتاح فعلا فيها من مشكلتك اللي عاملة فيك كدا

[خالد أبوسعده]

شكرا ليكى انك سمعتينى و استحملتيى
و بجد مواضيعك هايله و استفدت منها فعلا
ربنا يخليكى للمنتدى