10 طرق تعكنن على مراتك

**zoro313** · 10-03-2008, 07:53 PM

1-
الصبح وانت رايح على شغلك وهى نايمة تعمد اسقاط اى شيئ او خبط الباب بصوت عالى علشان تصحيها هى كمان 00 اشمعنى انت ؟ ولو حاولت ترجع تنام تانى قالها مادام صحيتى حضري الفطار بقى

2-
اذا كنت بتتفرج على التلفزيون وهى عايزة تغير القناة 00 قالها معلش الحلقة دى مهمة جدا واحد صحبى شافها على القناة الفضائية وقالى ان الحلقة دى هى المسلسل كله 00 ولو كنت بتتفرج على ماتش كورة هيبقى الموضوع اسهل 00 كل ما حد من اللاعبين من اى فريق يمسك الكورة قالها معلش ثوانى بقى انا حاسس ان الكورة دى جون حتى لو كان حارس المرمى ماسك الكورة والماتش واقف لان فى واحد مصاب

( ملاحظة : اغلب النساء ذو ثقافة كروية ضعيفة )

3-
اصح يوم الجمعة بهمة ونشاط وجهز الافطار لزوجتك بس متنساش انك تستخدم 15 طبق واكبر كمية من الملاعق والشوك و 5 حلل من اللى عندكم فى المطبخ و 10 كوبيات لاعداد طبق بيض وسندوتش جبنة

طبعا يراعى ترك اثار سمنة على الارض مع ترك التلاجة مفتوحة وقشر البيض فى الحوض

4-
فى عيد ميلادها زينلها تورتة عيد ميلادها بخمسين شمعة ولو سألتك لية خمسين رغم ان عندها 15 سنة بس ؟ اتحجج بضعف الاضاءة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء خفيفة

5-
لو عملة ريجيم اجرى على السوبر ماركت ومحلات الحلويات واملى التلاجة شكولاتة وحلويات وجاتوهات 00 يرعى التجول وانت مستمتع بأكل الجاتوة امامها

6-
متنساش رأيك فى طبيخها لو عاملة لحمة قالها حلو اوووى الفراخ دى 00ولو طبخة بامية 00 جميلة اوى الملوخية دي ياحياتي حطة عليها اية ؟؟ ولو عملة كيكة قالها انا بحب
اشرب شاى مع البسكويت الحلو دة !!

7-
لو طلبت منك تنشر الهدوم قالها حاضر مع ابتسامة حانية وبعد ما تخلص نشر الهدوم ادخل عليها وقولها انا نازل اجيب الهدوم اللى وقعت منى فى الشارع ولو سألتك هو اية اللى وقع ؟ اذكر لها كل هدومها اللى كانت مغسولة مع فردة شراب من بتوعك علشان متبقاش مقصودة منك !

8-

لو الزوجة قررت مسح الارضيات فى البيت حاول انك تروح وتيجى على المناطق المبلولة متحجج بأنك محتاج تتصل ضرورى بواحد صحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية

9-
لو كانت مشغولة فى نظافة البيت او مع الاولاد وطلبت منك تغسل كوبتين الشاى بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوبية من الاتنين وهى مكسورة واسألها فى براءة ارمى دى فين ؟؟

10-
وانت قاعد تتفرج على التلفزيون
وهى طالع عينها فى تنظيف البيت وبعد ما تخلص وتيجى يدوبكك تقعد تستريح جنبك بصلها وقالها حبيبتى معلش ممكن كوبية مية علشان ضهرى بيوجعنى

محمد حليم

**ahmedko** · 10-03-2008, 08:24 PM

لو الواحد بجد بيعمل الكلام دة مع مراتوا
حيكون مصيره سكينه فى ضهره او
كباية شاى فيها سم فيران

او يتحدف من البلكونة على غفلة منه

**Mimi** · 10-03-2008, 08:31 PM

وعلى ايه دا كله يازورو

لعلمك باه احنا بعون الله مش محتاجين ارشادات ولا طرق عكننه زي ما بتعملو

في ايدينا نعكنن عيشته او نخليه ملك زمانه : p

**Rania Ismail** · 10-03-2008, 09:25 PM

اللى اقدر اقوله ومش حقول غيره ان كيدهن عظيم لو عملتو ايه انتو اللى حيتعكنن عليكو فى الاخر

**zoro313** · 10-03-2008, 09:30 PM

هههههههههههههههههههههههههه
طبعا انتو الاصل فى العكننه واحنى نتعلم منكم

**Rania Ismail** · 10-03-2008, 09:37 PM

ايون علشان كده انا بنصح اى ولد ميعملش كده مستقبليا علشان ده حيتقلب عليه محدش يسمع كلام حليم

**ahmedko** · 10-03-2008, 10:24 PM

على فكرة ممكن باردوا الزوج يصبحها بعلقة سخنة
و يمسيها بعلقتين
فكرين فيلم الشقة من حق الزوجة
فاكرين محمود عبد العزيز عمل اية

**Mahro** · 10-03-2008, 11:11 PM

على فكره احنا فى غنى عن ده كله والله اجدع حاجه تعكنن الست انك تنفضلها او تصدر لها الطارشة زى ما بيقولوا بس مش فى كل الحالات يعنى تقولك النهارده جارنا فلان عاكسنى تقولها والله راجل بيفهم وبيقدر الجمال او الجزار النهارده قالى اجى اوصلك تقولها راجل عنده زوق والله يعنى مش للدرجة دى بس فى الأخر الراجل لازم يكون جنتل مع مراته يعنى كتر خيرها انها مستحملاه اساسا شباب اليومين دول والله ما تطاق .

**samomran** · 10-03-2008, 11:32 PM

الله عليك يا حليــــــــــــــــــــــــــــــــــم بس انا لو عملت كده مصيرى حيكون انى اترمى من الشباك و انا شقتى فى الدور 12 و بعدين الحكايه مش مستاهله ده صنف اخد بطوله العالم فى النكد و العكننه على خلق الله دول ابطال اولمبياد