دعوة للحب : بعد 30 سنة أنت قادر تحب مبارك

[mohamed ortega]

كتير منا و يمكن انا واحد من دول منعرفش رئيس لنا غير مبارك
صحيح انا عاصرت السادات
سمعت عن جمال
بس معشتش و كبرت غير ايام مبارك
قريب قوي مبارك سامعين انه هيرشح نفسه تاني
بعد 30 سنة أكتر أو أقل
سألت نفسي انا قدرت في الفترة دي احبه كرئيس
أحسه كأب
كنت بقول هو المفروض انه الرئيس يكون أب زي ما بنقول ديما
و لا هو مجرد موظف كبير شوية برتبة رئيس جمهورية
او زي ما بيحصل بره صاحب سلطة كام سنة و بيسبها
حامل راية بيوصل لنقطة و يسلم لغيره
كنت بسأل لما الصحف تكتب انه أمر بتكسين مواطن غلبان و لا انه يخليه يحج أو لما يصرف فلوس لمنتخب الكورة
هي الفلوس دي بتاعته من جيبه و لا فلوسنا
كنت بزعل لما اسمع الناس تقول الاب الزعيم و انا شايف اننا متبهدلين في كل مكان
هو ليه الاب مش خايف علينا
ليه الاب مش بيحوط علينا زي ما نكون فعلا ولاده
زي ما نكون جمال
زي ما نكون علاء
ليه بعد 30 سنه مش قادر اني الاقي حاجة تخليني احبه كأب
اروح اقول أه انا موافق انه يكون الرئيس الجاي
ليه انا عاوز دلوقتي التغيير لمجرد التغيير
لمجرد اليأس من انه يكون في جديد تاني
مش لاني متاكد ان الباقي أفضل
انا والله بحاول اني افتكر حاجة
انا صحيح اتعلمت و اتجوزت و بتعالج
بس ما كل الدنيا بتعمل ده
دا اللي ملهومش وطن
ملهومش سكن
بيلاقوا تعليم
و بيت

انا عاوز أقول
أسأل
في حد يقدر يقولي علي حاجة ترجع لي حبي لرئيس عاش معانا 30 سنه
حد يقدر يرد عليا و يقولي انت لازم تحب الراجل ده علشان واحد اتنين ثلاثة
ياريت







المصدر: ahmed saeed