انا محجبه ليه

**Marwa Magdy** · 09-03-2009, 01:39 AM

أنا محجبة ليه ؟:confused::confused:

أنا محجبة - بعد إيماني بأمر ربنا إن الحجاب فرض على كل مسلمة

علشان الأسباب التالية:

1 - علشان انا حرة

مش من حق حد يشوف مني اللي مش عاوزاه يشوفه إلا بإرادتي … ومن حقي اختار مين اللي يشوف مني أجمل ما عندي .. واللي علشان يشوف ده ويبقى حقه وحلاله بلاله عن طيب خاطر.. لازم هو كمان يديني مشاعره واللي باقي من عمره عن طيب خاطر…

2 - علشان أنا غالية

مينفعش أقلل من قيمة نفسي واخليها عرضة لكل العيون .. ويبقى خروجي مكشوفة ضوء أخضر لكل من هب ودب يسرق مني ولو نظرة لأي جزء مش متغطي مني .. حتى لو مكنش ده قصدي … بس مش حقدر امنعه … (كامل اعتذاري لغير المحجبات.. ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب .. علشان ميطمعش الذي في قلبه مرض) … مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع .. ده يتضمن اي حد معدي شاب محترم او رجل او طفل او عجوز او امراة او فتاة .. كل دول بقى من الممكن انهم يبصوا لي … لأ ده كمان يمكن ماعجبهمش ويدوروا وشهم إعراضاً …

))))

3- علشان أنا باحترم نفسي

وشايفة نفسي كبيرة قدام نفسي .. ومينفعش أنزل سوق المنافسة في الأنوثة علشان أفوز في الآخر بنظرة شهوانية أو كلمة غزل رخيصة أو عرض صحوبية

4- علشان انا جمالي مش خارجي وبس

ومن حقي ان اللي ييجي يتجوزني .. واللي حاديله الباقي من عمري .. واللي حديله كل مشاعري .. واللي حاقاسمه أحلامي وأفكاري .. واللي حخلف منه ولادي ... وحاربيهم معاه .. مايختارنيش على مقاييس شكلية وبس .. أو تبقى هي دي العامل الأساسي في أختياره ليا … علشان كدة مش ضروري يشوفني في كامل زينتي وجمالي قبل ما يتجوزني .. الأهم انه يحب روحي ويعجب بشخصيتي ... ويرتاح معايا نفسياً.. (أصل في بنات بتأجل الحجاب لحد ما تتجوز.. على أساسا انها تكون شنكلت واحد وضمنته.. مع إن مفيش حاجة مضمونة في الزمن ده .. واللي اختارها علشان جمالها .. ممكن قوي يتجوز عليها واحدة أجمل منها.. لأنه أكيد في الأجمل منها يعني.

5. علشان أنا باخاف على أخويا في الله

اللي بيشوفني في الشغل أو في الكلية أو في المواصلات أو في الشارع .. ويمكن يكون عاوز يقرب من ربنا .. وبيجاهد نفسه علشان يغض بصره.. فمرضاش لنفسي اني اكون سبب في اني افتنه..

6. علشان أنا باشيل هم أخويا فيالله

اللي نفسه يتجوز ومش قادر لضعف إمكانياته المادية .. فمش ضروري يعني ازود عليه همومه… وأخيله في الرايحة والجاية ..

7. ده غير حاجة مهمة كمان …
الكفن بتاع النساء..

فيه حجاب.. فاللي مش حتلبسه وهي حية بإرادتها طاعة الله.. حتلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى التكليف … ومحدش حيشوفنا تاني ولا حد حيطمع فينا .. يبقى مفيش معنى اننا نمشي مكشوفين لكل العيون واحنا أحياء نرزق... يبقى الأولى اطيع ربنا بإرادتي وأقابله وهو راضي عني واخد أجري كامل.. ولاّ اني ملبسوش غير وانا جثة واقابل ربنا وهو غضبان عليا؟

والأسباب اللي فوق دي ..
هي اللي فهمتني ليه ربنا فرض علينا الحجاب.. مش تعسير ولا تضييق .. الحجاب فعلا عزة وكرامة.. ميعرفهاش غير اللي داق طعم الستر..

ربنا يهدينا ويهدي بنات المسلمين

**AYMAN GAMAL** · 09-03-2009, 01:48 AM

جزاكي الله كل خير

فعلا الحجاب فرض على كل مسلمة

و ربنا يهدي الى الطريق القويم

شكرا جزيلا ليكي

**عبد الرحمن** · 09-03-2009, 01:48 AM

جزاك الله كل خير يا مروه
الموضوع فعلا اسعدنى
و الله اعلم اد اه الواحد بيفرح لما يشوف واحده لبس حجابها صح
و يفتخر بان هذه هى المرأه فى ديننا انها غاليه
و اسأل الله ان يرزق بنات المسلمين اجمعين بالحجاب

**Wild_Angel** · 09-03-2009, 03:16 AM

رائع جدا جدا جدا يا مروه
ربنا يمن على كل بنات وسيدات المسلمين بالحجاب
جزاكِ الله خيراً

**Mohamed Hashem** · 09-03-2009, 03:31 AM

1 - علشان انا حرة

مش من حق حد يشوف مني اللي مش عاوزاه يشوفه إلا بإرادتي … ومن حقي اختار مين اللي يشوف مني أجمل ما عندي .. واللي علشان يشوف ده ويبقى حقه وحلاله بلاله عن طيب خاطر.. لازم هو كمان يديني مشاعره واللي باقي من عمره عن طيب خاطر…

وبتسألى محجبه ليه ...... علشان انت عاقلة وست البنات

بارك الله فيكى
ويهدى الله بناتنا ونسائنا الى الحجاب الصحيح الشرعى

**S2AH** · 09-03-2009, 03:36 AM

جزاكى الله كل خير يا ميرا
وجعلة الله فميزان حسناتك

**sweet girl** · 09-03-2009, 03:42 AM

هايل يا ميرو
التوبيك جميل فعلا
وكلامك كله صح 100%
ربنا يبارك فيكى يا حبيبتى
(( عجبنى اوى مثال المصاصه اللى حاطه البشمهندس هاشم ))
بجد الله ينور
جزاكى الله كل خير