"إختلاط الحضارات"

[MUHAMED SAMY]

"إختلاط الحضارات بين التوك توك و الطائرات"











إختلاط الحضارات بين


التوك توك




و الطائرات







قد يكون العنوان غريب !

لكن الاغرب منه انك تعرف انه حقيقي ,,

ووصلنا لزمان قد تكون ثقافة التكاتك فيه أفضل من ثقافة الطائرات

وصلنا لوقت إختلاط الثقافة او عشوائيتها !!






لما نظن ان الثقافة والاجتماعيات الي كلنا بنبحث عنها بين الناس الي مستواهم المادي عالي

لما نظن ان المراكز والشهادات بقت هي المقياس الأول للاخلاق والمعاملات

زمان كان النصّاب بيبان عليه والحرامي تعرفه من شكله

والانسان الي يصلح تقول عليه إبن ناس بتعرفه من شكله !

دلوقتي عندما يُصبح النصّاب والحرامي بيلبس أشيك الملابس وبيتكلم افضل الكلمات

لما نوصل اننا نحكم على سواق توك توك انه من بيئة أقل عشان فقره ونحكم على انسان بيركب طيارة ويسافر انه من فئة أعلى من الناس

بقا الي يغلط ويقول ( سوري ) أحسن بكتير وعنده ذوق أكتر واحد يغلط ويقولك ( لاموأخذة )



زمان كان المثقف معاه شهاده وعنده خلق

دلوقتي ممكن يكون دكتور في الجامعة او دكتور بشري او مهندس او وزير لكن أخلاقه ومعاملاته مع الناس أقل بكتير من أن نصفه بالآدمية

في حين ان ممكن يكون انسان غير متعلم أصلاً

لكن عنده من الخلق ما يكفي أن يُحبب كل من حوله في هذا الشخص !


الكلام ده مش توقع ولا نظريات ,, الكلام ده واقع أي انسان ينظر حوله بشيء من الموضوعية هيلاقي الي بقوله ده وااااقع متكرر كل يوم



ولسا من قريب واحد راكب عربية ( بي أم ) وماشي جنبه في إشارة عربية ( كارو ) يعني عربية بيجرها ( حمار ) وبيسوقها واحد بيتقال عليه ( عربجي )

العربية الكارو خبطت فيه ( وقد تكون تسببت له في خدش بسيط )


لما تجد ان اخلاق الراجل الي نازل من البي ام أحط وأقل بكتير من الـ ( العربجي )

لما صاحب ( البي أم ) ينزل ويشتم التاني بالأم والأب ويابن كذا وانا هحبسك واسوي فيك ..

والتاني لم يشتمه ولو مرة واحده ومقلوش غير الله يسامحك

ساعتها يتجسد قدامك بالفعل ازاي احترام الناس بيروح في غير مكانه

وقد ايه بننخدع بسهولة في مظاهر

مظاهر من المفترض أو من الطبيعي انها تأثر في صاحبها وتخليه يراعي مظهره

لكن لما تتساقط كل القيم دي وميبقاش في فرق

وتوصل لزمان متقدرش تحدد فيه مين محترم ومين مش محترم

مين يستحدق الإحترام ومين لا يستحقه !

وعشان تقدر تحدد لازم تتعامل مع الي قدامك وتكون حريص كل الحرص من الخيانة أو الغدر او النصب والإحتيال ,,



وكمان للاسف بنلاحظ سوء الاختيار ده في الجواز وان البنت تختار شاب يكون ( متريش ) وتظن انها هتكون سعيدة !

وتختار انسان شكله وظاهره غاية في الروعة ومتعرفش انها ممكن يعدي عليها ايام تتمنى فيها الموت ولا إنها تعيش مع شخصية زي دي !

متعرفش ان السعادة وقتها مش هتكون بمظهر لكن بمعاملات وبحسن الخلق

والعكس / الشاب بردو بيختار البنت على شكلها وده مش غلط لكن الغلط انه يكون للشكل وبس !

ولما تتعارض مصالح الشكل مع الشخصية والادب والتربية والدين

لازم تكون فاهم هتقدم إيه على ايه ؟ !





زمان كان ممكن تقول على البنت عادية

دلوقتي مفيش بنت عادية



يعني مبقاش فيه مفهوم الاحتشام ( الي هو وسط بين الصح والغلط )

ممكن بنت تكون من مستوى إجتماعي ضعيف جداً وتلاقيها عامله في نفسها عمايل تقول انها طالعة تعمل إعلان في الدُش او رايحة حفلة وتحس إنها بنت مليونير !

ليه بتعملي في نفسك كده ؟

وعشان مين بتعملي كده ؟

كان ليا صديق قريب بيقولي مفهوم ومصطلح البلوزة إنتهى

مش بنقول اسدال ولا نقاب
مع ان ده المفروض

بنتكلم في مفهوم البلوزة انها تلبس شيء واسع بس

سمعت كتير عن مفهوم تغيير الجلد عند الثعابين !

وبستشعره بقوة لما بقابل الفئات دي من الناس

الي بتنخدع بسهولة في مظهرها وتحس من كلامه او من مظهره انه ذو خلق رفيع ومرموق وتتفاجئ بسرعة جداً لما يغضب او يختلف مع حد

أو لما يبدأ التعامل في الماديات وحقي وحقك !

هتشوف العجب العجاب

وللاسف الثقافة دي مش بس في التعامل الناس العادية ما بينها وبين بعضها


للاسف امتدت الثقافة دي للمؤسسات والمنشئات

الي في الاخر بيتحكم فيه افراد مننا

يعني تكون ماشي في لجنة وشكلك على قد حالك يوقفك ويفتشك ويتلككلك

ويقولك مكنتش رابط الحزام ليه .. تقوله ياعم ما انا كنت رابطه وفكيته عشان اعرف اطلعلك الرخصة الي لسا طالبها

يقولك انا مشوفتكش انا مليش دعوة انت كداب !

في حين ان ممكن عربية فارهه حد من اللجنة يوقفها عن غير قصد ( وهو كان يقصد العربية الي وراها )

وصاحب العربية يقوله معلش مكنتش رابط الحزام يقوله يا باشا انا شوفتك رابطه بس انت ناسي !

وسع يابني عدي الباشا

وقد يكون الرجل الاول غلبان بيشتغل 16 ساعة في اليوم عشان يقدر يأكل عياله .

في حين ان الراجل الشيك ده ممكن يكون تاجر مخدرات او معاه خمور في شنطة العربية او رايح يقابل فلانة او علانة في اي كازينو !

تعالى مثلاً جرب تدخل من أي نادي

ويكون شكلك عادي .. يوقفك ويقولك الكارنيه

لكن لو لابس بقا لبس شيك وستايل .. وتدخل كده وتشاور بس بإيدك يقفلك ويقولك اتفضل يا باشا ..


كنت مرة في طابور لدفع قيمة ترخيص سيارة

والي واقف على الشباك تقريباً راح يفطر او ينام شوية

المهم فضلنا واقفين ساعة او ساعة ونص الطابور مش بيتحرك نهائي لحد ما عدد الطابور وصل اكثر من 100 واحد


أول لما الراجل جه والطابور بدأ يتحرك

فجه شاب لابس كلاسيك وماسك موبيله في ايده ونظارته الشمس

وراح دخل في اول الطابور !!

فالناس كلها محدش اتكلم قالوا ده اكيد وزير الداخليه بالي بيعمله ده

الناس خافت تتكلم !

فواحد قاله انت وقفت قدام ليه ارجع اقف في الطابور من اوله احنا واقفين من الصبح !

الشاب قاله
انت متعرفش انت بتكلم مين ؟

أنا ( مباحث )

طبعاً الناس كلها سكتت :)

المهم الشاب الي كلمه فاهم ان الموضوع مش بالمظاهر زي ما قلنا

قاله طيب وريني الكارنيه !

شدوا مع بعض في الكلام

طبعاً مرضاش يوريه الكارنيه لانه مش


مباحث

واول لما لاقوه بيماطل في الكلام واتاكدوا انه مش مباحث

نزل الـ 100 مواطن فيه ضرب ,,

الشاهد من القصة ان هو فاهم كويس جداً انه يقدر يخدع بمظهره كل الي حولايه

لاننا بالفعل بقينا ناخد الناس بالمظاهر !

وطبعاً مش كل انسان شكله شيك يبقى نصاب ووحش وكل انسان شكله وحش يبقى كويس وذو خلق

لاشك في ناس ظاهرها جميل وباطنها أجمل لكن كيف نعرف هؤلاء وكيف نخرج الإبرة من كوم القش ! ؟



إيه رأيكم في قضية والمعادلة دي ؟






مـــــــــــــــــــنـــقـــــــــول