يوميات شباب خربان

**smart girl** · 08-25-2010, 01:22 PM

القصة عبارة عن خمسة اصحاب مع بعض من ابتدائى وبالرغم من اختلاف شخصياتهم بس عمرهم مسابوا بعض حياتهم مليانة بالاحداث المثيرة ...تعالوا نتعرف على ابطال القصة :

البرنس

اسمة الحقيقى: احمد زيدان

المؤهل : 3 كلية الهندسة قسم كهرباء

الشخصية : متأنتك اوى فنفسة اهم حاجة عندة لبسة ومنظرة وشعرة مجلجل وبيموت

فالتنفيض للبنات عشان كدة صحابة اطلقوا علية البرنس

حبوب

اسمة الحقيقى : محمد اسماعيل

المؤهل : 3 تجارة – محاسبة

الشخصية :رومانسى وطول الوقت هيمان صحابة طلعوا علية حبوب مش عشان هو محبوب من الناس عشان هو بيحب على روحة وبيتعلق بأى جزمة حريمى وكأنها حبة الاول والاخير

جعيدى

اسمة الحقيقى : محمد الدسوقى

المؤهل : مع حبوب 3 تجارة

الشخصية : من اصول صعيدية( اسيوط ) هربوا على اسكندرية وجعيدى صغير عشان كان عليهم تار و معندهمش غير ولد واحد وهو جعيدى وبالرغم انة متربى فاسكندرية الا انة لغتة صعيدى صرف والحروف كلها عندة مش مطابقة للمواصفات

شيخ

اسمة الحقيقى : ابرهيم السيد

المؤهل : 3 اداب – لغة عربية

الشخصية : متدين جدا وملتزم.. باباة مؤذن الجامع الى جنب بيتهم بيحب صحابة اوى بالرغم انة عارف انهم فاسدين الا ان نفسة ان ربنا يهديهم وطول الوقت بيحاول معاهم

عبقرينو

اسمة الحقيقى : على ممدوح

المؤهل : 3 كلية هندسة مع البرنس

الشخصية : ذكى جدا ومثقف وبيحب العلم بشتى وسائلة كمبيوتر – كتب – ندوات – اجتماعات - عامل زى

المخترع الصغير عشان كدة اطلق علية عبقرينو

(دول كانوا ابطال القصة )

الحلقة الاولى

(حبوب يتصل بالبرنس )

حبوب : الو ... برنس البرانس

برنس : حبوب ازيك يامان واحشنى ياحبيب البى

حبوب: وانت كمان والله اية اخبار العيشة معاك

برنس : بيس ياريس عايشين

حبوب :طب اية الكلام .. انا قولت اكلمك واكلم العيال ... بكرة الخميس هنعمل اية ؟؟

برنس : هنعمل اية يعنى ياحبوب هنعقد على قهوتنا المعتادة

حبوب : بقولك اية يامعلم ماتيجى نغير ونروح كافية دى لايت

برنس : اشمعنا يعنى اةةةةةةةةةة ياخبيث ياتيييييت عايز تروح الكافتريا دى عشان البت غادة بتعقد فيها هي وصحابها يوم الخميس

حبوب : غادة ... غادة دى قمر حياتى وعمرى كلة الى معشتوش ونور عنيا وو

برنس : خلاص ياعم الحونين ..يلا مش هكسفك انا تمام.. معاك

حبوب : طيب كلم انت بقة جعيدى وانا هكلم شيخ وعبقرينو

برنس: ادة ياعم انت حطيت جعيدى من نصيبى لية كدة

حبوب : مالة جعيدى انتوا ضاربين خناقة

برنس : لا ياسيدى بس مابيكولش معايا بصراحة بيخنقنى

حبوب : انجز بقة يا برنس وكلموة.. صاحبنا هنرمى فالشارع مسلا ؟؟

برنس : طيب امرى لله انا هقولة الكلمتين واقفل فوشة

حبوب :ماشى يلا سلااام

برنس : سلام ياريس

(البرنس بيتصل بجعيدى ... جعيدى حاطتت كول تون "ويابت جمالك هبشنى " للريس متقال )

جعيدى : ساموا عليكوا

برنس : عليكم السلام ايوة ياجعيدى

جعيدى : مين برنس الليالى فينك يا رادال

برنس : مع الردالة ياجعيدى ههههه اخبارك اية واخبار الزلوط اللى بتاكلة ؟؟

جعيدى : انى الحمدلله ادليت من البلد عشية ديت فالجطر ودولت مية المية العيال ولاد الرفادى حايدوا يأخدونى فالمحطة محدش دة

برنس : ادة اية اية ياجعيدى اللى انت بتقولة دة انا مش فاهم حاجة الله يحرئك يابنى انت عايز مترجم على نفس الشريط

جعيدى : دانى حتى دبتلكوا معاي بطاااو وحمام

برنس : اللى انا فهمتة انت كنت مسافر يعنى وكنت عايزنا نجى نأخدك وعموما بالغوتك دى فربنا موجود يريحنا منك انت الجيم عندك دال يا اض ؟؟

جعيدى : اكدية ماشى يابرنس

برنس : المهم يا جعيدى بكرة تقابلنا الساعة 8

جعيدى : ماشيى ايوة انى عايز أتشهيص

برنس : تتشهيص مانت بتعرف فالغتنا اهوة بتئرفنا لية ياجعيدى ماعلينا عارف لو اتخرت هرميك فالترعة بتاعت بلادكوا يلا سلااام

جعيدى : ماشييى يابرنس الليالى ساموا عليكوا

(هستنى ارائكوا فانى اكمل باقى الحلقات و تعرفوا اية اللى حيصل ولا لاء )

**MUHAMED SAMY** · 08-26-2010, 05:18 AM

3 هندسة
3تجارة
3اداب

صحابى صحابى
عجبتنى

كملى

**سهيله** · 08-26-2010, 08:02 AM

كملي انا عايز اعرف هيعملو ايه بالكافيه؟
بليييييييييييييييييز كملي

**Abdo Samy** · 08-26-2010, 02:53 PM

عجبتنى كملى
كملى

**KAREEM** · 08-26-2010, 05:25 PM

جاااااااااامدة جدا وجامعة بين
5 اصناف لاميين جميع اصناف الشباب الجامعى
تقرييييبا يعنى بس باين عليها يوميات تحفة
كملى كملى يا سمارت منتظرييييين الحلقة الجديدة
عشان نعرف حيعلمو ايه فى الكافييييية دا ؟

**smart girl** · 08-26-2010, 11:58 PM

بناء على طلب الجماهير اقصدى الاعضاء هتنزل
(الحلقة الثانية)

( حبوب يتصل بشيخ ..جرس ومحدش بيرد .. شيخ حاطتت كول تون دعاء للشيخ العفاسى )
شيخ : السلام عليكم ورحمة الله وبركاتة
حبوب : وعليكم السلام ياشيخ اية يابنى انت كنت نايم ولا اية بتصل من الصبح مابترديش لية ؟؟
شيخ : حبوب بعتذر سامحنى كنت بصلى عامل اية ياحبوب
حبوب : بتصلى ؟؟ احنا الساعة 6 صلاة اية دى التراويح هههههه
شيخ : يا اخى بطل تريقة كانوا ركعتين لله
حبوب : اةة ياحبيبى ربنا يقوى ايمانك.. المهم دلوقتى ياعم الحج انت
شيخ : نعم.. اتفضل ياحبوب
حبوب : بكرة تقابلنا الساعة 8
شيخ : لا حول ولا قوة الا بالله ..القهوة بردة ؟
حبوب : لاااا ماحنا اقولنا نغير
شيخ : بجد طب ربنا يكرمكوا يارب يلا بينا بقة نروح نحضر الحلقة اللى فجامع القائد ابرهيم وبعدين ممكن نجى عندى عالبيت نتفرج على حلقة الداعية عمرو خالد وبعدين ننزل نصلى العشا وبعدين..
حبوب : ايييييييية ياشيخ خريطة العلم والايمان اللى رسمتهالى فجأة دى بص بص احنا عندنا خريطة احلى اقابلنا انت بس وملكش دعوة
شيخ : لا الة الا الله هتودونى فين؟؟؟... مانا عارفكوا ؟؟؟
حبوب: لااااااا لالالا احنا وش ذلك ... يلا هنستناك سلام بقة عشان لسة هكلم عبقرينو
سيخ : فى رعاية الله اشوفك على خير السلام عليكم ورحمة الله وبركاتة

(حبوب يتصل بعبقرينو )
حبوب : عباقيرو حبيبى
عبقرينو : حبوب ازيك يابنى فينك
حبوب : تحت النظر انت اللى قليل الاصل و مش معبرنا ياعم ومستخبى ورا نضرتك دى
عبقرينو : انا هههههه لا والله بس كنت مشغول شوية
حبوب : اية خير
عبقرينو : بخلص كتاب د احمد زويل
حبوب : يادى النيلة يااخى ارحم ..عينك هتروح من كتر الثقافة
عبقرينو :دى احلى حاجة فالدنيا سدئنى
حبوب : المهم انا حانجز عشان خلصتولى رصيدى.. ربنا ينتقم منكوا
عبقرينو: اية فى اية
حبوب : تقابلنا بكرة الساعة 8 تمااااام يلا سلام
عبقرينو :انت يابنى استنى انا مش هينفع اجى انا عندى ندوة مهمة
حبوب : تسدء حسبى الله ونعم الوكيل فيك حتيجى ...غصب عنك هتيجى .. سامع ؟؟ الساعة 8 تستنانا مش هسمع كلام منك تانى لو مجتش هجيب العيال ونفضحك فنص الندوة ونشدك من هدومك
عبقرينو : خلاص خلاص دانتوا مصايب
حبوب : ايوة كدة ناس مابتجيش غير بالعين الحمرا يلا سلام
عبقرينو : سلام ياشجيع السيما

الخمسة اتقابلوا كلهم وطبعا لما شيخ عرف انهما رايحين الكافية دة اتخانق معاهم فالشارع وكانت حتحصل مشكلة .... بس شيخ عارف ان صحابة بيعتبروة المراقب بتاعهم لان طول ما شيخ موجود مابيعملوش حاجة غلط فاعشان هو خايف عليهم قال : امرى الى الله توكلت على الحى الذى لا يموت ربنا يهديكوا ويرشدكوا الى الصواب يلا اتفضلوا جى معاكوا
دخلوا الكافية .... حبوب بيدور على غادة صاحبتة ( لسة ماجتش )
شيخ ماسك سبحة وبيستغفر
عبقرينو حاطتت السماعات فاودانة بيسمع محاضرة عن كيف يتم تشريح الضفدعة
البرنس ضارب النضارة والانتكة
جعيدى بيقول (للمتر ) : انت يافندى شوفلنا مكان نجعد فية ولا اجولك معندكوش اعدة عربى اهنية ؟؟؟
برنس : انت ممكن تسكت ياجعيدى اية اللى انت بتقولة دة عربى اية وحساب
برنس :وانت يا حبوب اللى انت ماسكوة فايدك دة ؟؟
حبوب : اية يابرنس.. اةة..دى ؟؟ ... وردة عشان لما اشوف غادة ادهلها
البرنس : وردة ؟؟ وجى على نفسك لية كدة ماكنت تجيب فرع اخضر ..احسن
حبوب : انت بتئلس عليا هى الوردة وحشة ؟؟ طب اعمل اية دلوقتى ... ارميها ؟؟ ولا اعمل اية .. اعمل اية
جعيدى : شوف ياحبوب يابن عمى احنا حدانا فالبلد لو ياعنييى فى رادال مستحليى بت اكدة وشايفها لونة يجبلها دلبية اكدية احمر فاخضر فاصفر او منكن جزازة ريحة خمس خمسات وتبجى اية ياحبوب طايرة من الفرحة بالحدات ديى
حبوب : ( لونة )يا الفاظك يااخى والله يا جعيدى احنا من غيرك مش عارفين كنا عملنا اية بصراحة لاء افدتنى فعلا
ماتساعدينى ياعبقرينو وسيب الى بتسمعوا دة
عبقرينو : بص ياحبوب نظريا ان س * ص = س ص ولو ع تربيع تحت الجذر ..( ماسك الة حاسبة وحيبدأ يحسب)
حبوب : اية ياعبقرينو هو انا هشترى ياميش رمضان ارحمونى ربنا يخدكوا انتو بتعملوا معايا كدة لية ..
عبقرينو : ياسيدى انا اقصدى ان البنت الذكية اكتر حاجة ممكن تعجبها فالشاب هو تفكيروة دة لو كانت ذكية اما اذا كانت غبية ..
حبوب : لا مسمحلكش غادة فيها كل الصفات الحلوة
شيخ : اهدى بس ياحبوب انت استعين بالله اولا وبعدين انت لازم تعرفها كويس يعنى هل عندها استعداد تتنقب مسلا ... بتصلى ...بتشاهد حلقات دينية بتحفظ قرءان .. كدة ياحبوب
جعيدى :ألا صحيح يا اض يا حبوب هى البت دى شكلها اية
حبوب : مش عارف
برنس : نننننننننننننننننننننننننننننننننننننننننننننننعم ياخويا مش عارف يعنى ائرفنى من اول الاسبوع غادة غادة وغادة دى حب حياتى غادة الحاضر والماضى والمستقبل غادة بتروح الكافية يوم الخميس غادة مش عارف اية و مرمطنا معاك عشان واحدة انت مش عارف شكلها اصلا ...يلا عيال قوموا دة عيل سيس اساسا واحنا كلاب اننا سمعنا كلامة
حبوب : استنى بس يابرنس انا شوفت غادة فالكلية كنت اقاعد وراها فالمدرج وسمعتها وهى بتتفق مع صحابها وصوتها كان حلو اوى والله يابرنس حاولت اشوفها اول ماالمحاضرة خلصت العيال ولاد الذين زحموا المدرج عشان يطلعوا وعقبال ماجيت اطلع كانت اختفت ...بس انا احساسى بيقولى لا دانا متاكد انها عسولة ..المهم دلوقتى اجبلها اية
برنس : مش لما تعرف شكلها اصلا اعد على جنب بقة
وفجأة

( انتظروا الحلقة القادمة )

**Abdo Samy** · 08-27-2010, 03:04 PM

يلا كملى حطى حلقة يوميا

**smart girl** · 08-28-2010, 12:43 PM

(الحلقة الثالثة )

وفجأء

دخلت بنت الكافية و شيلة بيبى على ايديها وفضلت تبص يمين وشمال ومشيت فى اتجاة التربيزة اللى اقاعد اصحابنا الخمسة

عبقرينو : ادة ياشباب البنت دى جية علينا ولا اية ..حد يعرفها ؟؟؟

حبوب : ادة ممكن تكون دى غادة لاء لاء بس غادة مش مجوزة

برنس : هههههههه وانت عارف منين يا فقيق اكيد هى دى ههههههه ...وبعدين ياااا راجل تجيب حلموس الصغير
ومتعزمناش على سبوع ينفع كدة ؟؟؟

حبوب : برنس.. انا مش مستحمل اى هزار من فضلك وبعدين ..( حبوب سكت لان البنت جت ووافقت عند تربيزتهم )

البنت : ازيك يابرنس

برنس : (بيبص يمين وشمال ) نعم ...حضرتك بتكلمينى ؟؟

البنت : ايوة بكلمك انت

برنس : حضرتك تعرفينى ؟؟؟

البنت : طبعا اعرفك

برنس : منين حضرتك ؟؟

البنت : فى حد ميعرفش جوزة

برنس : افندم ... جوزة ..جوز مين.. لا لا انتى غلطانة

البنت : كدة يا برنس سايب مراتك وابنك ... دة كل شوية يعيط ويقولى بابى بابى خد شيل ابنك يابرنس

برنس : ابن مين يامدام

البنت : كمان يعنى سايبنا وبتتنكر لمراتك ياااااااة مكنش العشم ابدا

برنس : ركزى بس انتى اكيد عندك مشكلة فى زهايمر مسلا ولا حاجة

البنت : ايوة فعلا انا عندى مشكلة انك سايبنى انا وابنك ...دانا حتى استلفت فلوس مصاريف الحضانة من

الجيران عشان انت مسبتلناش فلوس لما مشيت

( البرنس بدأ يتعصب )

برنس : ابن مين يا ست انتى مجنونة انتى ولا اية ؟؟

حبوب : اهدى بس يابرنس

عبقرينو : اللللللة ادة الموضوع كبر ولا اية استنى يا بروس

شيخ : اية اللى انتوا فى دة عيب اوى كدة لا حول ولا قوة الا بالله اتفضلى حضرتك استريحى احنا اسفين اكيد فى

سوء تفاهم حصل .

برنس : انت حتقولها اعدى ...

البنت : يرضيك ؟؟ يرضيك يا شيخ يسبنى انا وابنة الفترة دى كلها

برنس : بص بردة هتقولى ابنة يا ستى انا معرفكيش

جعيدى : ماهو جلك مايعرفكيش يا ست الحدة يبجة هيجوزك ازاى وراء الكواليس مسلاة

عبقرينو : استنى يابوب بس ... هو اية الحكاية بالظبط يا مدام

حبوب : ايوة احنا عايزين نفهم اية الموضوع

برنس : انتوا هتعوموا على عومها انتوا كمان

البنت : اطلبلنا يابرنس حاجة انا وابنك نشربها هتلوا عصير... انت عارف انة بيحب العصير

برنس : ( قام واقف و صوتة بدأ يعلاة والناس اللى فالكافية بدأت تبص) انا محترمك لاخر لحظة ماتسفزينش اكتر
من كدة ياست انتى

شيخ : لا اله الا الله اقعد يا احمد استنى بس لما نشوف الموضوع اية

برنس ( لحبوب ) : عجبك ياسى زفت شايف افكارك جبتنا الكافتريا المنيلة دى

حبوب : انا اية علاقتى بس يابرنس

البنت : انا حقولكوا على الحقيقة كلها بس هاتلى عصير لابنك الاول

برنس ( لعبقرينو ) : هتغابى عليها والله

البنت : ربنا يسامحك القصة بدات ......

( تفتكروا اية قصت البنت دى ...انتظروا الحلقة القادمة )

**KAREEM** · 08-28-2010, 12:56 PM

اوباااااااااااا
انا مكنتش اعرف انك نزلتى الحلقة التانيتة
عموما انا شوفت الحلقتين
والشغل اللى بجد بدأ من الحلقة التالتة
والبت دى اكييييييد اكييييييد بتتبلى عليهم
او بتحاول تطلع بسبووووبة منهم
والله اعلم

منتظريييييين بفارغ الصبر