ماذا تفعل لو كنت رئيس جمهوريه((شوفوا البراءه))

**م/ احمد فاخر** · 11-20-2008, 08:54 PM

ماذا يحدث لو حكم مصر مجموعة من الأطفال؟ وما القرارات التى سيبادرون بتطبيقها بمجرد وصولهم إلى الحكم؟.. تخيل لو أصبح رئيس جمهورية مصر العربية طفلاً فى الثامنة أو العاشرة أو حتى الرابعة عشرة من عمره.. سؤال طرح على مجموعة من الأطفال، بمناسبة عيد ميلادهم. «ماذا تفعل لو كنت رئيس جمهورية مصر العربية؟»، فكانت الإجابات مفاجأة.

قالت أسماء إيهاب (٩ سنوات): أول حاجة هاعملها لما أبقى رئيسة جمهورية أخلى كل المناهج الدراسية على «لاب توب»، وأوزعها على كل طلاب المدارس بدل لما يشيلوا الشنط وتوجع ضهرهم، وكمان هاسجن كل الناس الوحشة اللى بتضرب الحيوانات فى الشارع، وأبنى بيوت كبيرة وحلوة للناس اللى قاعدة فى الشارع، والمدرس اللى بيهين الطلاب هارفده على طول من المدرسة، وهاغيّر لون «لبس» المدرسة من النبيتى للبرتقالى.

وقالت نورهان حسام (١١ سنة): «هابنى مستشفيات ومدارس ومساجد وبيوت للناس اللى ساكنة فى الشارع، واعطف على الفقراء والمساكين واتبرع للمساجد والأيتام، وأخلى فى واجبات ودروس ومجاميع فى المدارس ما عدا الغش والضرب، ولو أى مدرس «مفترى» ضرب طالب هادخله السجن، وأخصص أماكن كبيرة قوى وأجمع فيها كل الناس اللى مش لاقية شغل علشان تشتغل».

وكان محمد شرف (١٤ سنة) أكثر حدة حيث قال: «هافصل وزير التربية والتعليم، وهاختار وزراء صالحين مش حرامية تسرق البلد، وأحارب الفساد عن طريق حكومة تقدر تحمى البلد، وأستصلح الصحارى وأبنى مستشفيات على أعلى مستوى علشان الفقراء يقدروا يتعالجوا».

بينما كانت إسراء محمد (١٠ سنوات) أكثر رفاهية حيث قالت: «هاعمل حدائق كبيرة جداً علشان الأطفال تتفسح فيها، وابنى نادى لكل الناس اللى مش قادرين يشتركوا فى نوادى، وابنى مستشفى كبيرة للأطفال، وهاجدد المدارس وأبسط المناهج على الطلاب وألغى كل الامتحانات والطلبة كلهم ينجحوا».

وقالت رقية حسن (٩ سنوات): أدى لكل واحد حقه ومش هاظلم أى حد، وهاتبرع بالفلوس للأطفال اللى مش قادرة تدفع مصاريف المدرسة، وأزور المستشفيات وأتبرع للمرضى علشان يعملوا العمليات ويخفوا، وأى وزير يظلم الناس أو يعاملهم معاملة وحشة هافصله من الوزارة، وأبسط المناهج الدراسية حتى لطلاب الثانوية العامة لأنهم بياخدوا حاجات صعبة، وأنا عايزة الناس تتعلم مش تتعقد.

وفى السياق نفسه، قال محمد عبدالباسط (١٤ سنة): أبنى مستشفيات كبيرة للأطفال المعاقين، وهاعيّن فى الحكومة ناس أمينة مش حرامية، نفسى الناس كلها تعيش فى سلام، مش عايز الناس تصحى تلاقى حد بيقولها اطلعوا بره بلدكم.

وقالت فاطمة فتحى (١٢ سنة): هاحكم البلد بالعدل وهاخلى كل الناس أغنياء، وأبنى مستشفيات ومدارس كويسة، وأفصل وزير التربية والتعليم لأنه بيصعب المناهج على الطلاب، أحتفل بكل أعياد ميلاد الأطفال، وأنظم الانتخابات الرئاسية كل سنة، وأخلى كل الناس تترشح قدامى، مش اختار المرشحين اللى على مزاجى.

أما محمد عمر (١٤ سنة) فكان أكثر اقتصاراً، حيث قال: هاخفض مصاريف المدارس الخاصة، وانضف المدارس الحكومية وأخليها أحسن مدارس فى مصر، عايز الناس كلها تعيش فى سعادة وما تكونش حزينة، أخفض الأسعار على الشعب، يعنى أخلى كيلو العدس بـ٢ جنيه بدل عشرة، وكيلو اللحمة بـ٥ جنيه، يلاّ خلى الفقير ياكل.

ملوحظه هذا التقرير نشر بجريدة شعبيه مستقله
وقررت انى انقله ليكون اوسع انتشارا
ولكى اعرف اراء اعضاء المنتدى فى هذه الردود
وعلى كل عضو ان يضع اجابه على هذا السؤال

ماذا تفعل لو كنت رئيس جمهوريه؟؟؟

**Mimi** · 11-20-2008, 10:06 PM

تقرير جميل جدآ واجابات بريئة وتلقائية فعلآ من كل الأطفال اللي اتسألو انا عن نفسي لو بقيت رئيسة

هغير الاستاف بتاع الوزارات دا كله وهشيل الوزارات اللي ملهاش اي لازمة في البلد مش كل واحد يقولك بم يطلعله وزارة يسميها بم

هبتدي أهتم بالمدن الجديدة لحد ما تخلص وأنزل أسعار الاراضي والعقارات اللي فيها وبعد ما اخلص هبدأ اهتم بمشروع ممر التنمية والتعمير او مصر الموازية او مصر التانية او مصر 2050 اللي طرحة فاروق الباز

أعدل كل قوانين البناء والمرور من جديد عشان أظبط حكاية الزحمة والهمجية اللي احنا فيها والشكل الجمالي المعدوم للبلد من حيث المباني والسيارات وحالة الشوارع

أعين وزير تعليم متخرج من كلية التربية عشان يقدر يدي المسألة التعليمية حجمها المناسب ويكون في كل مدرسة حمام سباحة ومكتبة للقراءة العامة

أعمل قوانين مشددة في وزارة الاعلام وخصوصا على الرقابة الفنية وعلى التلوث البصري والاخلاقي اللي بنتعرضله من السينما والاعلام المصري

اهتم شوية بكل شؤون الشباب من النواحي الرياضية والثقافية

**ميرا مار** · 11-20-2008, 10:28 PM

موضوع جميل يا احمد
انا هاعمل زى محمد شرف(14 سنة). بالضبط
والله المفروض يعملو مجلس اطفال زى الشعب والشورى وياخدو بارائهم

**Wild_Angel** · 11-21-2008, 12:41 AM

موضوع فوق الوصف جميل جدا

بس المشكله انه سؤال صعب
سيدنا عمر بن الخطاب رضى الله عنه كان يحمل هم لو تعثرت دابه فى بلد اخرى غير الموجود فيها
ولذلك موضوع الرئاسه هم كبيييييييير اوى
ولكن اول شئ اعمله احكم بالعدل وانظم الحكم واختار رئيس جمهوريه (رجل) يتقلد القياده ولكن يجب ان اثق فى نزاهته وعدله

وياااااااااارب نشوف العدل قريبا على شاشات التليفزيون المحلى والمملح بتاع بلادنا

**م/ احمد فاخر** · 11-21-2008, 02:23 AM

المشاركة الأصلية كتبت بواسطة judy

تقرير جميل جدآ واجابات بريئة وتلقائية فعلآ من كل الأطفال اللي اتسألو انا عن نفسي لو بقيت رئيسة

هغير الاستاف بتاع الوزارات دا كله وهشيل الوزارات اللي ملهاش اي لازمة في البلد مش كل واحد يقولك بم يطلعله وزارة يسميها بم

هبتدي أهتم بالمدن الجديدة لحد ما تخلص وأنزل أسعار الاراضي والعقارات اللي فيها وبعد ما اخلص هبدأ اهتم بمشروع ممر التنمية والتعمير او مصر الموازية او مصر التانية او مصر 2050 اللي طرحة فاروق الباز

أعدل كل قوانين البناء والمرور من جديد عشان أظبط حكاية الزحمة والهمجية اللي احنا فيها والشكل الجمالي المعدوم للبلد من حيث المباني والسيارات وحالة الشوارع

أعين وزير تعليم متخرج من كلية التربية عشان يقدر يدي المسألة التعليمية حجمها المناسب ويكون في كل مدرسة حمام سباحة ومكتبة للقراءة العامة

أعمل قوانين مشددة في وزارة الاعلام وخصوصا على الرقابة الفنية وعلى التلوث البصري والاخلاقي اللي بنتعرضله من السينما والاعلام المصري

اهتم شوية بكل شؤون الشباب من النواحي الرياضية والثقافية

اولا اتمنى ياجودى يكون الموضوع يكون عاجبيك

ثانيا رديك جامد جدا
واحلى حاجه عاجبتنى انيك هتشيلى الوزاره كلها

عشان كده انا برشحيك تكونى رئيسة جمهوريه