َ۩ كيفــــ تتـرجــــمـ َ۩

[Mimi]

أعزائي أعضاء منتديات الرابطة

يسعدني أن أستكمل معاكم الجزء التالت من سلسلة تعلم الانجليزية بدون معلم



طبعآ العنوان من برا كان كيف تترجم لأني فكرت أضيف جزء مهم في المرحلة التالتة دي

فخليته موضوع منفصل تمآمآ عما سبق

يعني باختصار الجزء دا كان هيبقى مخصص لعدد من الدروس اللي بتشمل محادثات مختلفة في شتى المناسبات والأماكن ومعاها ترجمتها

بس تراجعت عن الفكرة دي أو حبيت أعدل فيها شوية والفضل يرجع للباشمهندس محمد هاشم لأنه لفت نظري لحاجة مهمة أوي وهيا اننا نتعلم ازاي احنا نترجم النصوص دي



كيف تترجم ؟




طبعآ في أي مجال دراسي لو جبنا كل المعلومات جاهزة مش هتبقى متأكد اذا كنت قدرت تحسن مستواك أو لاء ولكن اذا عملنا كدا مع تعلم الاعتماد على النفس في الحصول على المعلومات دي أكيد هتخلي عندك ثقة في انك متبقاش محتار أو خايف من أي صعوبات تواجهك

أنا مش عايزه أزهقكم مني وأطول أنا بس قلت أدردش معاكم شوية قبل ما نبتدي الحلقة الجديدة دي باذن الله عشان هتتقسم على كذا مرة ان شاء الله وهنمشي مع بعض واحدة واحدة وأوعدكم كلكم هتستفيدو باذن الله
يبقى تاني باختصار الجزء دا هيعلمك ازاي تترجم وازاي تفهم النصوص الانجليزية ومن ثم الكتب والمراجع الانجليزية



ليه بأه نفهم الكلام دا ؟

لأن المراجع الانجليزية مصدر قوي جدآ في مختلف الدراسات ودا ميقللش أبدآ من قيمة اللغة العربية بس بجد جرب تحط سؤال عايز اجابته على جوجل وشوف نتايج البحث اللي بالعربي .. هتلاقيها محدودة جدآ وياريتها بتجيبلك اللي انت عايزه ..جرب تحط نفس السؤال بالانجليزي هتلاقي النتايج مرضية جدآ وهتستفيد بيها ..بس هتجيلك بأه مشكلة الكلام دا مدايقك كدا انت عايز ترجمته ..فتروح عامل ترجمة للصفحات فيترجمهالك يطلعلك طلاسم !! صح ؟ ليه بأه ؟ لانه بيترجم كل كلمة لوحدها بيترجم المفردات بس وبالتالي مش بيطلعلك بجملة مفيدة .



اذن اللي عايزه أقوله الترجمة ليست تحويل المفردات من لغة الى لغة أخرى ... الترجمة هي نقل الأثر والقيمة الثقافية بنفس القوة على قد ما نقدر من لغة لـ لغة أخرى .. ودا اللي هنحاول نعرفه كلنا من خلال هذا التوبيك

ان شاء الله هنقسم شغلنا على 3 أجزاء :



أول جزء : مفهوم الترجمة وكيفية الترجمة

ودي هنتكلم فيها عن استراتيجية الترجمة وعن أساليب وقواعد الترجمة

الجزء الثاني : صعوبات الترجمة ومشاكلها

ودي هنعرف فيها ان شاء الله ازاي نلاقي المعنى الملائم للكلمات أو المفردات وعن الاختلاف الثقافي والبيئي لأن دا بيأثر على الترجمة .. بردو هنتكلم عن الزمن والعدد في اللغة والتعبيرات الاصطلاحية والاختصارات ..الخ



الجزء التالت : هيبقى عبارة عن نصوص وحوارات بالانجليزي مع الترجمة بتاعتها للتدريب



وأخيرآ وليس آخرآ أرجو ان الجميع يستفيد من هذا التوبيك وطبعآ انا مستعينة بأكتر من مصدر في عمل هذا الموضوع يعني الكلام الجاي مش من عندي ولا من دماغي أنا بحاول بس أبسط المواضيع وأغير الفورمة بتاعتها عشان نستوعبها بسهولة

وشكرآ جزيلآ .. انتظرو القادم فهو أكثر افادة

[ALY ELSAYED]

الله ينور عليكي يا ميمي

انا مستني باقي الدروس

جزاكي الله كل خير

[Mohamed Hashem]

برافو برافو برافو
فتحتى نفسى والله
ربنا يبارك فيكى ايتها الأخت الكريمة
انا داخل والله اتعلم كمان

[Mimi]

شكرآ شكرآ على تشجيعك ياكارمو انت وباشمهندس محمد

ان شاء الله هكمل معاكم بس اعذروني لو اتأخرت لأن عندي لسه مشروع تخرج لحد نص يوليو ومشغولين اوي فيه الايام دي

[AYMAN GAMAL]

ميه ميه عليكي

هوه ده الكلام و برافو عليكي

فعلا الناس كلها محتاجه دروس في الترجمة و حقيقي Excellent

[Mahmoud Slem]

جزاكى الله كل خير وجعله فى ميزان حسناتك
ربنا يوفئك فى هذا العمل

[محمد الفرارجي]

ايه ده؟

مين ده؟

اسمك ايه؟

ايه الحلاوة دي؟

لالالالا

الشغل ده جامد جداااااااااااا


تعرفي قليل قوي الناس اللي بتقدر تفكر صح

وقليل في الناس اللي بتفكر صح إللي بتقدر تحاول تفيد الناس

وقليل من الناس اللي بتحاول تفيد الناس همه إللي بيوصلوا لهم المعلومة بسلاسة

إنتي بقى

قليل
من قليل
من قليل

وربنا يجعلك من الصفوة ان شاء الله

موضوع هايل

ومش بس موضوع
ده
مشروع

م موضوع
حقيقي بجد

موضوع تعليم الترجمه مهم جدا

خصوصا لطلبة الدراسات العليا والناس إللي عايزة تشتغل وتبحث عن التميز

تسلم ايدك يا جميل

شكرا جدا

على رأي الكبير

فتحتي نفسي

تسلم ايدك

[Mimi]

شكرآ أيمن على تشجيعك

وان شاء الله كلنا نستفيد



شكرآ يامحمود بارك الله فيك

وربنا يوفقنا كلنا



باشمهندس محمد شكرآ جدآ لحضرتك

فعلا عندك حق في كل كلامك

وميرسي على تشجيعك الجميل دا وربنا يوفقنا كلنا

[Mimi]

ورجعنا مرة تانية عشان نبدآ مع بعض أول جزء من سلسلة دروس كيف تترجم

وزي ما قلنا الجزء دا هنتكلم فيه عن استراتيجية الترجمة وكيفية ترجمة النصوص وأساليب وقواعد الترجمة وغيرها من الدروس



كبداية للموضوع دا في 3 نقط أساسية لازم تتوفر عند ترجمة النصوص وهي

1.لازم تكون الترجمة مطابقة تمامآ للأفكار في النص الأصلي وناخد بالنا من كلمة أفكار مش مفردات
2.النقطة التانية لازم الأسلوب وطريقة الكتابة تكون محافظة على نفس الخصائص للنص الأصلي
3.النقطة الأخيرة هيا أن الترجمة تعكس كل عناصر السهولة والوضوح في النص الأصلي



هنتكلم بأه عن مفهوم الترجمة ..يعني ايه ترجمة

في التوبيك الأولاني قلنا حاجة مختصرة كدا وهيا أن الترجمة هي نقل للأفكار من لغة الى لغة أخرى بنفس الأثر والقيمة الثقافية وليس بالضرورة تكون نقل حرفي للمفردات والكلمات



وتحت مفهوم الترجمة أحب أوضح الصورة هنا أكتر خلينا نشبهك كمترجم بالرسام ..الرسام مش بيقتبس كل حاجة في الطبيعة بتفاصيلها .. هو بينقي العناصر المهمة في لوحته واللي من خلالها بيوصلنا فكره وبينقلنا ما يدور في خاطره .. نفس الشئ منطبق على الترجمة فهي الروح وليس المعنى الحرفي .. هي أصدق احساس للنص الأصلي

المعنى الحرفي ممكن يقتل النص المترجم ويضيع قيمته ودا اللي بيحصل معانا كلنا لما بنترجم نصوص كتير تطلعلنا طلاسم في الآخر وللأسف كل القواميس الالكترونية تترجم بالمعنى الحرفي .. عشان كدا كلنا هنحاول نحول القاموس الالكتروني دا لقاموس بشري عشان ننقل روح المعنى وليس المعنى الحرفي .



آخر حاجة ممكن أقولها في الجزئية دي هيا جملة قالها Prochazka وهي : " الترجمة يجب أن تحدث في ذهن القارئ نفس الانطباع الذي يحققه النص الأصلي على قراؤه "

يبقى نستخلص من الجزئية دي 4 نقط أساسية وهيا أن الترجمة الجيدة لازم تحقق :

1 – تعكس المعني بوضوح
2 – تنقل روح النص الأصلي وأسلوبه
3- تصاغ بأسلوب تعبيري وسلس
4- تولد استجابة مباشرة في ذهن قارئها



( أنا عارفه ان لحد دلوقتي ممكن كتير ميكونوش استفادو بس عشان نمشي واحدة واحدة مع بعض أنا كنت بتكلم بس في مفهوم الترجمة ولسه هقول كيفية الترجمة )



كيفية الترجمة ( استراتيجية الترجمة )

وخلينا نقول اننا هنتكلم دلوقتي عن استراتيجية الترجمة Transfer Strategy لان المعنى دا أدق ..فالاستراتيجية هتدينا معادلة نمشي كلنا عليها في ترجمة أي نص

خلينا نبسط الأمور الأول .. هنعتبر أن عندنا نص بلغة ما هنسميها لغة المصدر أو Source Language هنرمزلها بـ SL واحنا عايزين نترجمه الى لغة اخرى هنسميها اللغة المستهدفة أو Target Language هنرمزلها بـ TL في أثناء عملية النقل دي هنستخدم ما يسمى باستراتيجية النقل ( اللي هيا عباره عن استخدام القواعد ومعرفه معنى المفردات واهم حاجة الاحساس بروح النص الأصلي ونقل هذا الاحساس للغة المستهدفة )

طيب يبقى نمثل الكلمتين دول بمعادلة وهيا

SL → RETHINK → TL



ودلوقتي خلونا نطبق الاستراتيجية دي .. طبعا أسهل طريقة للفهم هو ضرب الأمثلة ..هضربلكم مثال بالمفردات كبداية عشان أوضح الفكرة بس مش أكتر

لو خدنا مثلا كلمة رياضة كمثال ..هنلاقي ان في أنواع كتير للرياضة ممكن تبقى رياضة بدنية أو رياضة روحية أو رياضة بمعنى ترويض أو رياضة بمعنى مادة الرياضيات ..لو طلبت مني أترجم مثلا كلمة رياضة لوحدها للغة الانجليزية هحتار لأني مش هعرف المعنى المقصود ايه لكن لو وضحت أكتر نوع الرياضة دي مثلا رياضة بدنية ساعتها هنلاقي المعنى الملائم ليها في اللغة الانجليزية وهيا Sport

ناخد مثال تاني في كلمة كاتب مثلا .. كاتب لوحدها ممكن تديك انطباع انه مفكر او كاتب في مكتب موظف يعني ..أو نسّاخ مجرد بينقل وينسخ وخلاص .. لو حددت المعنى المناسب كمفكر مثلا يبقى المعنى المرادف ليها هيكون Writer



احنا دلوقتي خدنا مثالين بس بترجمة كلمات عربية .. خلينا نعكس الموضوع وناخد المثال على مفردات انجليزية

كلمة مثلا Bank ممكن تبقى بنك أو مصرف ودا المعنى الشائع وممكن تكون منحدر أو صف أو شاطئ .. لو حددنا معناها أكتر وقلنا انها Land a long Side of a river جزء من الأرض بامتداد جانب النهر يبقى عرفنا كدا ان معناها شاطئ

بردو مثال تاني لو قلنا مثلا كلمة Book هييجي في بالك معاني كتير ممكن يبقى كتاب أو كتاب مقدس أو تسجيل أو حجز أو دفتر تجاري ..الخ .. لو حصرنا المعنى في حجز مقدمآTo Reserve يبقى عرفنا كدا ان معناها حجز



ودلوقتي عشان قلنا هنمشي براحة وواحدة واحدة هديكم ريست ونكمل الحصة الجاية ان شاء الله عشان نقدر نستوعب بسهولة وبدون ارهاق .. المرة الجاية هنكمل تطبيق الامثلة دي بأه على جمل وهنشوف ازاي نحللها عشان نترجمها بشكل صحيح وبعد كدا هنطبق على فقرات وفي الآخر هقدملكم استنتاج للجزئية التانية من الجزء الأول زي ما عملنا في مفهوم الترجمة

أشوفكم على خير ..انتظرو القادم فهو أكثر افادة

[Mohamed Hashem]

بجد دا اكتر من رااااااااائع
ارفع القبعة احتراما لأسلوب الشرح المحترف
واسمحى لى عملت لينك لموضوعك
فى مقالات تعلم المساحة البحرية ... بالانجليزية
سدد الله خطاك .. ومتابع داااائما