َ۩ كيفــــ تتـرجــــمـ َ۩

[hemdan00]

لاء بجد الله ينور علي مواضيعك يا mimiانا متابع مواضيعككلها لاني في اللغة مش قوي اوي وبجد استفادت كتير من مواضيعك سواء كان الكلمات او الترجمه ومنتظر بقيت مواضيعك بالتوفيق في الموضوع وفي المشرووووووووووووع

[Wild_Angel]

ماشاء الله يا ميمي

موضوع ممتاز

أنا بس عايزه أضيف حاجه هامه جدا
لو أحنا عايزين مثلا نترجم مقال جيولوجى فأى قاموس عادى ممكن ميفدنيش أوى
ولكن الترجمه الاصح حتكون لو استخدمت قاموس جيولوجى بالاضافه لقاموس خاص بمصطلحات استخراج البترول

اتمنى تكونى فهمتى اللى قصدى عليه

وهو أن استخدام قاموس خاص بالدراسه التى نجريها والتى يخصها الموضوع المراد ترجمته ده بيوفر وقت وجهد كبييييير جدا

[Mimi]

شكرآ لكل الردود الحلوة دي من باشمهندس محمد وحمدان ووايلد

وأكيد ياوايلد كلامك صح جدآ أكيد في قواميس ومصطلحات كتير خاصة بكل مجال دراسي

واحنا كلنا بنحاول على قدر الامكان نخلي القواميس دي جزء مننا عشان منحتاجهاش علطول

وان شاء الله كلنا نتقدم ونحسن مستوانا من خلال القسم دا

ميرسي ليكي حبيبتي ووجهة نظرك وصلت وسليمة مية في المية

النهاردة ان شاء الله اكمل على اللي فات

[ميرا مار]

الله ينور حبيبة قلبى

الكلام مش يقدر يكفيك قدرك

ربنا يجازيك كل الخير ويوفقك

[sweet girl]

ميمى انتى بجد رااااااااائعه

مواضيعك كلها هااااايله

تسلمى وجزاكى الله كل خير

وان شاء الله اتابع معاكى

[Mimi]

ميرامار حبيبتي ربنا يجازيكي كمن كل خير ياحبيبتي

دا مفيش كلام يوافيكي حقك انتي والله

سويت حبيبتي ميرسي اوي على كلامك الجميل دا

وانا والله هكون مبسوطة اوي بمتابعتك في القسم وميرسي مرة تانية لتعليقك اللذيذ

[Mimi]

أهلآ بيكم مرة تانية جميع زوار وأعضاء ومشرفي واداريي منتديات الرابطة


انا طبعا اقل حاجة اعملها دلوقتي هو تقديم اعتذاري الكامل لعدم استكمال باقي الموضوع لمدة طويلة

وذلك لانشغالي كثيرا في الكلية فأرجو تقبل اعتذاري



هنكمل كلامنا بأه في تاني جزئية من الجزء الاول وهيا كيفية الترجمة

احنا فهمنا من المشاركة اللي فاتت ان الترجمة الصحيحة بتتم عن طريق توظيف الكلمة بشكل صحيح في الجملة وشفنا أمثلة على بعض المفردات اللي كانت غامضة في ترجمتها ولكن بتوضيح المعنى بيسهل علينا ترجمتها

توضيح المعنى دا اسمه توظيف الكلمة .. يعني أشوف الكلمة وظيفتها ايه في الجملة وبالتالي هنستغنى عن التخمين ونترجم بشكل واضح وسلس ان شاء الله



دلوقتي هناخد بعض الأمثلة لترجمة جمل قصيرة

وهنبدأ بجملة معقدة وهي كتالي

قامت اللجنة المكونة من سبع دول بمناقشة مشروع القرار

ليه اخترت الجملة دي ؟

لان فيها نقطتين مهمين اوي هنشوفهم دلوقتي مع بعض

هنعمل ايه بأه في جملة زي دي ؟

نحللها

عبارة ( اللجنة الحكومية المكونة من سبع دول ) معناها هو ان اللجنة الحكومية دي بتخص السبع دول كلها يعني هيا مش مقتصرة على حكومة دولة واحدة .. يبقى أقرب مرادف لها هو inter-governmental committe انا عارفه دلوقتي ان لسة المعنى دا موصلش واحنا بادئين بحاجة معقدة بس معلش هشرحها تانية واحدة واحدة

طبعا احنا عارفين ان كلمة حكومة معناها government وكلمة حكومية أكيد هتبقى governmental تمام وكلمة لجنة معناها committe طيب دلوقتي ازاي نوظف الكلمتين دول لتحقق اقرب معنى للجملة دي ..

لو في واحد عادي عارف ترجمة المفردات فقط ممكن يترجم الجملة دي كدا

The governmental committe which consist of seven countries..

حلو بس على ايه كل الجملة دي اذا كنا فهمنا ان اللجنة دي بتخص كل الدول دي فالاسهل نقول

The seven-state inter-governmental committee

وانا هنا مش بتكلم عن طول الجملة قد ما بنتكلم عن قيمتها .. أقصد ان الاتنين صح بس الاقيم والاشمل هيا التانية وهنا بتيجي مهارة المترجم في ايصال المعلومة بنفس القوة بل وممكن يديها قوة في المعنى اكتر من الاصل

يبقى كدا خلصت النقطة الاولى اللي هيا ( لو عرفت تترجم بأكتر من طريقة اختار الطريقة الاقوى والاشمل والاقيم )



نيجي للجزء التاني من الجملة ..هكتبها تاني اهو


قامت اللجنة المكونة من سبع دول بمناقشة مشروع القرار

نمسك عبارة ( مناقشة مشروع القرار ) .. ميجيش واحد بأه يقول دي مش محتاجة اصلا مناقشة يعني discussion ومشروع يعني project والقرار يعني decision وهنا باه تيجي النقطة التانية ..

ينفع نكمل الجملة بالمفردات دي ؟ كلمة بروجكت معناها مشروع فعلي مشروع فيلا مشروع مول مشروع متحف وليها معانا تانية دي حتة معناها بالعربي ممكن نختلف عليه .. في واحد يقولك المشروع هو مشروع الزواج وواحد يقولك المشروع هو سيارة اشبه بالميكروباص ههههههههه فمينفعش كدا تمام ؟

يبقى احنا ناخد الكلمات مع بعض ونشوف وظيفتها ايه الجملة .. كلمة مشروع القرار في لغة المؤتمران واللجان والجو دا معناها مسودة اللي هيا الـ draft

يبقى النقطة التانية تتلخص في : توظيف المفردات مع بعض الاول وبعدين مع الجملة وفهم المقصود منها بالعربي قبل ما نترجم عشان نعرف نختار اللفظ المناسب ليها للترجمة

يبقى في الاخر ترجمة الجملة هيكون كالتالي

قامت اللجنة المكونة من سبع دول بمناقشة مشروع القرار

The seven-state inter-governmental committee has discussed the draft resolution



معلش هناخد مثال تاني على جزئية الجمل دي عشان نكون على استعداد للي بعد كدا وهيا مرحلة ترجمة الفقرات
هنمشي بالعكس بأه هنجيب جملة انجلش واحنا نترجمها بالعربي وبنفس الطريقة اللي استخدمناها في الجملة اللي فاتت

نشوف الجملة دي

I move the adoption of the following resolution

نعمل ايه ؟

هنحللها زي ما اتفقنا

كلمة move اول ما نقراها ييجي في بالنا ايه ؟ اكيد هنقول معناها ( يتحرك ) لكن في الحقيقة هي معناها في الجملة ككل عملية اقتراح يعني I move معناها أنا اقترح تبعا لسياق الجملة



نيجي للكلمة اللي بعدها اللي هيا adoption بتيجي على معنيين : الاول هو عملية الاعتماد يعني كأني بعتمد قرار والمعنى التاني اللي هوا عملية التبني لطفل مثلا..فطبعا هنستبعد المعنى التاني والاولاني يكسب

وبالتالي تكون ترجمة الجملة كتالي

I move the adoption of the following resolution

اقترح اعتماد القرار التالي



كدا كفاية على الجزئية دي والمرة الجاية هكمل معاكم الامثلة على فقرات وبعدين نقدم استنتاجين من كل الجزء دا

وانا عارفه انه رخم جدآ بس دايما بداية اي حاجة بتكون رخمة وبعدين بناخد عليها ونندمج فيها

النهاردة باذن الرحمن هكمل عشان التقصير اللي حصل مني المدة اللي فاتت

شكرآآآآآآآآ جزيلآلآلآلآلآلآلآلآلآلآلآلآلآ لكل المتابعين

[M A I - S K Y:::]

شكرا اوى على الموضوع المفيد ده.

[Mimi]

العفو ياحبي على ايه

ان شاء الله تتابعي باقي الدروس وتستفيدي

[Mimi]

ورجعتلكم مرة تانية وبضغط المرادي في الدروس معلش عشان لو حصل وغبت تاني لاي ظرف تبقى موجودة في اي وقت وانتو معاكم طبعا كل الوقت تشوفوها في اي وقت تحبوه

هنتابع بأه بعد تحليل المفردات وتحليل الجمل .. هنشوف ازاي نحلل فقرة بأكملها

دلوقتي هنشوف فقرة ونحاول كلنا نحللها ونترجمها



ويتأكد ذلك على وجه الخصوص بالنسبة للعنصر البشري، الذي يعتبر سلوكه وشعوره بالانتماء – ومن ثم اتفاق صالحه الفردي مع الصالح الجماعي – محددا رئيسيا لفروق الإنتاجية بين المجتمعات المختلفة.

هنا لازم نحلل كل كلمة في الفقرة ونشوف المقصود منها .. يعني نعمل الاول تحليل باللغة العربية للمعنى المقصود من كل كلمة عشان يبقى سهل عليها في الاخر نترجم

يلا نبدأ مع بعض

يتأكد --- > يثبت أو يصح

على وجه الخصوص --- > خصوصآ

بالنسبة لـ --- > فيما يتعلق بـ أو بشأن

العنصر البشري --- > العامل الانساني

يعتبر --- > يُنظر إليه

سلوكه --- > تصرفه

شعوره --- > احساسه

الانتماء --- > العضوية أو الانتساب

من ثم --- > هكذا أو بالتالي

اتفاق --- > انسجام أو تناسق

صالحه --- > مصلحته

الفردي --- > الشخصي

الجماعي --- > المجتمع العام أو المجموعة

محددا --- > معيارآ أو مقياسآ

رئيسيآ --- > أساسيآ

فروق --- > اختلافات

الانتاجية --- > القدرة على الانتاج الوفير

بين --- > فيما بين

المجتمعات --- > المجموعات

المختلفة --- > العديدة



وبالتالي نقدر دلوقتي نترجم سياق الفقرة دي كتالي

ويتأكد ذلك على وجه الخصوص بالنسبة للعنصر البشري، الذي يعتبر سلوكه وشعوره بالانتماء – ومن ثم اتفاق صالحه الفردي مع الصالح الجماعي – محددا رئيسيا لفروق الإنتاجية بين المجتمعات المختلفة.

This is particularly true for the human element. Behavior and awareness of affiliation – thus his individual interest is suited with the common interest – are considered main determinate of productivity
differentials between various communities



خلاص كدا الدرس دا خلص .. شوفتو صغير ازاي

من كل اللي فات دا بأه اللي هوا درس 2 ودرس 3 ودرس 4 نستنتج ان الترجمة تنقسم لمرحلتين أساسيتين

المرحلة الأولى : تهتم بتحليل النص المكتوب من لغة المصدر أو اللغة الاساسية وبعدين نعمل اعادة تفكير عشان ندخل في المرحلة التانية

المرحلة التانية : واللي هيا بتهتم بصياغة معنى النص المترجم للغة التانية للتوصل الى احسن اسلوب من خلال يوصل المعنى بنفس قوة معنى النص الاصلي

خلاص كدا خلصنا الجزء بتاع كيفية الترجمة وهندخل على جزء جديد المرة الجاية ان شاء الله

شكرآآآآآ جزيلآلآلآلآلآلآلآلآ على المتابعة