¶¶ஊდطرائف المعلقينდஊ¶¶

**Night Moon** · 12-14-2010, 12:32 AM

طرائف المعلقين

دى تعليقات المعلقين فى كرة القدم

مرة مجدي عبدالغني قال
كده مصر خدت كاس أفريقيا 5 مرات ,, و طبعاً احنا عارفين إن الكاميرون خدته 4 مرات ,, و غانا 4 هي كمان ,, و ما شاء الله كلهم أفارقة.

مرة محمود بكر كان بيعلق على ماتش فى فريق يابانى و للحظ ان الفانله كان عليها اعلان سوزوكى فوق ارقام اللاعيبه و فضل محمود بكر يقول
ماشى سوزوكى بالكورة و اداها ناحيه الشمال ل سوزوكى و ماشى و بيعدى و بيصلحها لسوزوكى اوبا ههههههههه جون جون لسه بقولكم ايه دة و الجون كمان اسمه سوزوكى دة باين اسم سوزوكى دة شائع فى اليابان زى محمد عندنا ههههههههه

على زايور كان دائما يقول ونازل الاهلى بلباسه التقليدي الفانلة الاحمرة واللباس الابيض

مرة واحد كان بيعلق على ماتش نسائي قال
لفاول ده بقى هتلعبه سارة .. و سارة بالمناسبة شايلة مادتين فى ثانوية عامة ان شاء الله ربنا ينجحها و تدخل الكلية

مباراة لمصر وليبيا
كان الكابتن مدحت شلبى المعلق
كورة جت فى القائم للمنتخب المصرى
وقال : هوبا وتضرب فى القائم اليميين تضرب فى القائم اليميين ملكش حق ياقائم ملكش حق ياقائم
كورة تانية لميدو جت فى العرضة قال : ياااه فى العارضة ملكش حق ياعرضه ملكش حق ياعرضه
وبنهاية المباراة قال مع جهازنا الفنى ومنتخبنا الوطنى اللى بيثبت يوم بعد يوم ان مفيش احلى من السَمنة البلدى

محمود بكر كان بيعلق على مبارة فى كأس العالم وكان التشيك بتلعب قعد ربع ساعة كل ما يقول جمهورية التشيك يقول جمهورية شبين فضحنا

كان ابراهيم يوسف بيعلق على مباراة وكان ليه افيهات كدة تضحك
فى بداية المباراة راح قايل اعزائى المشاهدين والمستمعين
ليه بنقول المستمعين .. يمكن يكون فى حد كفيف قاعد بيتفرج على المطش

في تعليق مجدي عبدالغني على ماتش البرازيل و تركيا في كأس العالم 2002 ..
كنت حاسس أن مجدي عبدالغني قلب الماتش فيلم كوميييدي .. و الله الماتش مكانش جامد .. بس أنا ضعت من مجدي عبدالغني و تعليقه اللي تحس أنه بيتكلم من ع القهوة اللي قدام التليفزيون من ناحية رمسيس هيلتون .. مش ممكن يكون قاعد في ستوديو ..!
و ادي كافو بيعدي بواحدة حلوة .. واحدة من بتوع احمد عبدالباقي " يعني كافو بتاع البرازييييل بيقلد أحمد عبدالباقي!
التانية بقى .. اتحسب بنالتي للبرازيل .. و اللاعب بتاع البرازيل شاطها في نفس الزاوية اللي حطها مجدي عبدالغني في ايطاليا 90 .. و النجم معدهاش طبعا .. و قال "بتفكركم بايه ركلة الجزاء دي؟ .. هاه؟ .. ايوة ضربة جزاء مصر في كأس العالم 90 .. عارفين مين اللي جابها جون؟ .. هااااه؟ .. مييييين؟ .. أنا! .."

عبد السلام الحمامصى
فى ماتش
انبى واتصالات بنى سويف من كام سنه
لاعيب من انبى شاط كوره اى كلام
كان تعليقه عليها
وشوطه حلووووووووووووة بس وحشه
وايضا كان ماسك لازمه طول المباره على اى اوفر يترفع من الجنب
يقول
وواحده عرضيه بالطول
يعنى ايه عرضيه بالطول

في معلق على مودرن سبورت عليه عادة غريبة
حلوة حلوة حلوة
جميلة جميلة جميلة
يللا يللا يللا
مفيش كلمة غير لما يعيدها 3 مرات

مباراة العام الماضي بين الاسماعيلي وبلدية المحلة - في المحلة كان مذيع القناة الرابعة طول الشوط الأول يقول حسني (عابد ربه) وانتهى الشوط الاول 0/0 وبين الشوطين غيروا المذيع بواحد معروف وفاز الاسماعيلي 2/0

كان فى ماتش من سنتين كده
بس كان احمد فوزى الجون بيوقف الحيطة فبدل ما يوقف الحيطة وهو على القائم لاء راحلهم يوقفهم
قام الواد اللى هيشوط الفاول حطتهالو والجون فاضى والجون ده كان فى اخر دقيقة
قعد يتفرج عليها احمد فوزى وهى جوه الشبكة والحكم حسب الجون لانه كان صفر
اللى كان بيعلق على الماتش كان محمود بكر على النيل للرياضة
فى عاده فى قناه النيل تستنى شويا بعد ما المذيع ينهى الماتش
محمود بكر افتكر ان الارسال خلاص انقطع قام شاتم احمد فوزى
وبيقول للمساعد اللى جانبه الجون ده تيت
حد يروح للحيطه يوقفها . يستاهل

الكابتن محمد لطيف
كانت مباراه للمقاولون العرب في بطوله افريقيا وقال جول جول جول جوووووووووووووووووول
والتفت لمن يجلس بجانبه وسأله ..هو مين اللي جاب الجول
وفي بطوله افريقيا التي اقيمت في ساحل العاج 1984 عندما شكر مسؤلي الامن ومحافظ ابيدجان علي التنظيم
اتذكر لميمي الشربيني انه كان يذيع مباراه للاهلي وقال
ماشي بيها مجدي عبدالغني 26 سنه ليسانس اداب وعازب

علاء الحامولي الله يرحمه كوم تاني
الزمالك يلاعب الاسماعيلي والاسماعيلي متقدم بهدفين لهدف ثم يتعادل الزمالك ونسمع صراخ الحامولي ثم يسنتر الاسماعيلي وينطلق خالد القماش ويحرز هدفا ثالثا للاسماعيلي فيقول الحامولي كلمته الشهيره والتي قالها اكثر من 3 مرات في تاريخه
ا....جون

علاء الحامولي بيذيع مباراة للمنتخب وعادل المأمور حارس المرمى ووصلته كرة سهلة جداوطبعا رتم المذيع هادي ..والكرة مع المأمور يا مأمور جون يا مأمور

إبراهيم الجويني في كأس العالم وكان باقي 25 دقيقة كان بيقول بطريقته باقي 25 سنة...واحد جنبه لفت نظره يقوم يقولآه آسف ..فات 20 دقيقة وباقي 25 سنة ...

علي زيوار بيذيع مباراة للمنتخب الأليمبي بتاع خالد القماش وطاهر أبو زيدالقماش جاب بنلتي وحب هو يشوطه ..لكن المذيع عاوز طاهر أبو زيد هوه اللي يشوطالقماش سجل هدف لكن الكرة لمسة يد الحارس على زيوار ساب الماتش والدنيا كلها وفضل يهاتي ويزعق بصوته كلة اللاعب ده ما بيسمعش كلام المدرب ده لازم يتعاقب ..المفروض يغيره لمفروض يودوه القسم ..

كروان الإذاعة محمد لطيف بيذيع ماتش للمنتخب وفيه فاول قرب المنطقة تقدم ليها طاهر أبو زيدطاهر أبو زيد ...وشاط طاهر تيجي في طاهر ..تيجي في ظهره وخلاص

وكان مرة فى كاس العالم بيذيع مباراة للبرازيل وكان هناك لاعب اسمة فالكاو وكان مصر يقول اسمة فالساو وقال ان انا الوحيد اللى فى المذيعيين اللى بقول اسمة صح حتى مذيع البرازيل بيقوله غلط

موضوع فلكاو وفالساو ده كان مضحك جدا
وحصل في بطوله كأس العالم في اسبانيا 1982 وكانت في رمضان تقريبا
وساب الماتش خالص وقعد يحكي هو فطر ديك رومي شكله ايه وفرق التوقيت ودخل في حاجات تانيه كتيره

من الأشياء المضحكة لما ابراهيم حسن سجل هدف و أراد أن ينسبه لأخيه حسام ليفوز بلقب هداف الدوري ، اللعيبة راحت لابراهيم لتهنئته فأشار لهم على أخيه حسام فذهب اللاعبون لحسام لتهنئته ولكنها كانت تهنئة باردة بلا حرارة
المهم بعد المباراة الاعلام أراد أن يلبـّسها لنا فذهب المذيع لحسام بالميكروفون و سأله :- انت سجلت الهدف ازاي يا كابتن حسام ؟ فرد العميد : الكورة كانت كورنر واترفعت وأنا دخلت بدماغي فيها وسجلتها في المرمى
لكن الكدبة مكشوفة من الأول ولم تنطلي على أحد ، وتم تسجيل الهدف باسم صاحبه ابراهيم وضاع لقب الهداف من حسام

طارق يحيى كان بيعلق على متش مش متذكره المهم المحاور قال له تتوقع النتيجة ايه يا كابتن ؟ فرد يحيى وقال : اتوقع التعادل أو فوز احد الفريقين

عبدالسلام الحمامصي فتى التعليق الأول .. كان بيعلق على ماتش لجنوب أفريقيا سنة 96 .. و جت الكرة لجو موشوي .. و طبعا الاسم كان بالانجليزي .. و الأخ الحمامصي خريج لغات اصلا .. و لما جه ينطق الاسم تخيلوا نطقه ازاي؟ .. قال .. و الكورة دلوقتي مع جون مشوي

عبد السلام الحمامصي: كان بيعلق علي ماتش للزمالك و الزمالك كان مغلوب و فجأة واحد من الجمهور اللي وراه قال " وشك نحس يا عبد السلام يا حمامصي يا ابن ال ...... " فضل ساعتها يقول الله الله الله و انا مالي انا ياريت الجمهور يكون ملتزم . بس كان شكله وحش قوي

حماده إمام ..
دلوقتى .. أى كوره .. انشالله يكونوا لسه بيسنتروا .. تبقى " خطراااااااااااااه " و " حلوااااااااااااااااه " و" مين يقابل " و " ياااااااااااااااااااااااا ااااااااه " و " الله الله الله على الحاجات اللى بتعجب الجماهير " .. طول الماتش .. لغايه ما يجيلك هيستريا .. والماتش لسه (صفر- صفر) ..

مجدى عبد الغنى ده فى التعليق كل ماتش لازم يقولك إنه بيعرف برتغالى عشان كان محترف هناك .. وان مش عارف أيه .. يعنى "ازيّك" بالبرتغالى .. وايه .. يعنى "إتمسوا بالخير" .. و .. (خلاص ياعم احنا فى حصه لغه ؟) ..
وأى ضربه جزاء تيجى .. بتفكّره بضربه الجزاء اللى جابها فى كاس العالم .. ويا ترى اللاعب هيحطها زيه .. ولا هيطلعها بره ..

مره كان فيه ماتش البرازيل وتركيا فى كاس العالم 2002 و رونالدو جاب جون .. قالك "ياسلالالالام .. حطها كأنه طاير فى حمام سباحه" !!

* اللواء مدحت شلبى ..

"وينهار ابيض .. ينهار ابيد .. ينهار ابيد"
"يا سلام عليك .. يا سلام عليك يا واد يا مجرم .. "
"وهالله هالله هالله .. هالله هالله هالله هالله هالله هالله .. "
" ويلعب كوره .. مش منضبطه"
"حطها والنبى .. والنبى .. والنبى .. والنبى حطها ياراجل .. حرام عليك .. حرام عليك .. " ..

* سيد الثعلبى .. بتاع " ياسلام عليك .. تسلم رجليك " ومرّه لما حسام حسن جاب جون قاله: " تسلم صلعتك يا كابتن " ..

دي باقة كرة سله

أيام مدحت ورده و الجيل الذهبى لكرة السله
كنا دايما بننافس على البطوله و كتير كسبنا
فى مره المذيع كان متحمس جدا جدا
و الماتش صعب و الإسكور قريب
و فى أخر تلاتين ثانيه إحنا متقدمين بفارق نقطتين
و هو سخنان و بيحمس اللاعيبه بصريخ هستيرى:
- خدوا بالكم خلوهم بره المنطقه الخطره
- قفلوا المنطقه الخطره ماحدش منهم يخشها
- ياااااه حاسب يا ساتر لألألألأ أنا بأقول مافيش أى خ** منهم يخش المنطقه الخطره

منقول