مفيش حاجة ....

**احمد عبد الحليم** · 12-29-2008, 11:46 PM

[=]

مفيش حاجة

مانيش عايز خلاص حاجة
ولا محتاج انا لحاجة
ولو عايز صحيح حاجة
مخليتوليش ولا حاجة

عموماً بصوا فيه حاجة
هقولها بس محتاجة لعقول تفهم
ولو حاجة
مهيش مفهومة او حاجة
نفسرها بكام حاجة
نوضحها بكام حاجة
وأهى حاجة مع حاجة
هتظهر وتبان لنا حاجة

وانا ما بخفش من حاجة
مانيش مسنود ولا حاجة
لكن ما بخفش من حاجة
لكن فرضاً لو هقول حاجة
هيحصل إيه ؟؟؟ ولا حاجة
هيعملوا إية ؟؟ ولا حاجة

و بعد الشر بعد الشر لو واحد من القاعدين
من السامعين من الضالين
فِهِم حاجة هَيعملوا إيه ؟؟؟؟
اكيد برضُه ولا حاجة

فنتوكل على الستار لوجه الله نقول حاجة

فيه ناس بتعيش علشان حاجة
وناس بتموت علشان حاجة
وناس بتموت على الحاجة

وناس تديلك الحاجة
وتبقى ليها محتاجة
وناس تديلك الحاجة
و تاخد ادامها ميت حاجة

وناس تكبر تكون حاجة
و ناس تصغر علشان حاجة

وناس منظر ومش حاجة
وتلقاه كبيرحرس ونفير عليه منظر
وهو جبان وشيخ منصر
ولا يبـنش عليه حاجة

كلامى يا خلق فيه حاجة؟
لحد دلوقتى فيه حاجه؟

كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادر اقول حاجة

لأنى لو هقول حاجة
هييجى ناس بتوع حاجة
وياخدونى ورا الحاجة

وهو لو سمع حاجة
هيعملوهالى ميت حاجة

عموما بصو لو واحد من القاعدين
عاوزنى أبلغه بحاجة
يقول مايخفش من حاجة

نعم فيه إيه؟
لالالالالأ مافيش سرقه
ولا تهليب ولا تهريب ولا حاجة

وبتقول إيه
مصمصوا إيه؟ وخصخصوا إيه؟
ده كله كلام مفيش حاجه

قضية إيه؟
ياشيخ روح خلاص مافيش حاجه

حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة

وبتقول إيه؟لالالآلأ عـــيب

لافيه تدليسولاترقيص
ولا تدبيس ولا حاجه

سمع مع هووووس
انا حاسس انه فيه حاجة

دقيقة سكات لَتبقى حداد
انا حاسس انه فيه حاجة

زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسس ولا بحاجة
ولا متضايق ولا حاجة

سعادتك برضه مش زيـى مافيش حاجة ؟
أهـه بيقول مافيش حاجة

جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه

وعهد الله . وعهد الله. وعهد الله
ما خللولنا ولا حاجه

بقلك ايه خلاص خلص و فركش
يلا يا اخونا مفيش حاجه

[/]

**Mimi** · 12-30-2008, 12:36 AM

دا كان كلام للشاعرة المصرية الجامدة ايمان بكري

وطريقة القائها للشعر دا جميييييييييلة جدآ

شكرا يااحمد اختياراتك في مكانها الصح دايما

**ميرا مار** · 12-30-2008, 01:04 AM

والله هو المعنى جميل..
بس ماحدش يزعل من صراحتى
كاتب او كاتبة الشعر استخدم كلمة حاجة كتيييييييييييييييير
فاصبحت مزعجة وقعها مزحم للمعانى فى راسى
بس شكرا لك كتير يا احمد
على مشاركتنا لشئ عجبك

**محمد حمدى** · 12-30-2008, 01:27 AM

الله ينور يا ابو حميد ...
ممتاز والله العظيم..

**Mimi** · 12-30-2008, 01:41 AM

بالعكس ياميرا دا هو المقصود من شعرها

كلمة حاجة جايز تكون ازعجتك عشان شكلها الكتابي

بس لو تسمعيها في الالقاء هتحسي انها في كل مرة بتقصد حاجة تانية

ولو عايزه تشوفيها وهيا بتقوله

دا الفيديو بتاعها