سلسة دروس Hm فــ العمل المساحي ... الدرس الاول : مقدمة هامة

**Hassan Mohamed** · 10-19-2009, 05:13 PM

بسم الله الرحمن الرحيم

اقدم إليكم

سلسلة دروس HM فـــ العمل المساحي

والدروس دي هتبقي عبارة عن كل ما يخص العمل المساحي بالصورة النظرية والصورة العملية

مش هنسيب حاجة في العمل المساحي ومش هنتكلم عنها في الدروس دي

وخاصة ما يخص الاجهزة المساحية

الميزان والتوتل

والدروس دي ان شاء الله هتبدا من الصفر عشان الكل يقدر يستفاد منها ان شاء الله

ومن هنا بشكر كل من ساهم في اني اوصل للدرجة دي واقدر اقدم الدروس دي للمهتمين بعلم المساحة

واخص بالذكر استاذتي الاجلاء في قسم الجغرافيا ونظم المعلومات الجغرافية

والذي تربيت علي ايديهم ووصلت لهذه الدرجة

فشكرا جزيلا لهم

ودلوقت هتبدا معاكم اول درس في سلسلة الدروس

تحت عنوان

مقدمة هامة

إعداد وتنفيذ

حسن محمد عشرة

اخصائي مساحة وخرائط
دفعة 2009

**Hassan Mohamed** · 10-19-2009, 05:21 PM

الدرس الاول

مقدمة هامة

في البداية وكما ذكرنا في البداية اني هقدملكم مجموعة دروس فـــ العمل المساحي

وعشان نقدر نخوض بكل كبير في فـ العمل المساحي لابد من عمل مقدمة بشكل مبسط عن علم المساحة

ولو حبينا نعرف

علم المساحة
( Geomatics & Surveying)

هنقول ان هو جميع طرق الرفع والتوقيع

بس يعني ايه رفع ويعني ايه توقيع

فالرفع هو نقل معالم من علي سطح الارض المعالم دي ممكن تكون معالم طبيعية او معالم بشرية بننقلها إلي لوحة مستوية ( اللي هيا الخريطة ) بمقياس رسم مناسب ، وعمليات النقل دي بتتم من خلال استخدام الاجهزة المساحية واللي ان شاء الله هنتكلم عنها بالتفصيل في الدروس المتقدمة

اما التوقيع فهو عملية عكسية بتتم باخد ما هو موجود علي الخريطة من تصميمات ومعالم ثم توقيعها علي الطبيعة ايضا من خلال استخدام الاجهزة المساحية المتاحة

وقبل الحديث عن الاجهزة المساحية المستخدمة في العمل المساحي

لابد من تقديم مقدمة هامة يترتب عليها العديد من الاعمال التي نستخدمها في الاعمال المساحية

ودلوقت هنبدا علطول بعناصر المقدمة دي

الوحدات المستخدمة في المساحة

1-الاطوال

ولو جينا نتكلم عن الطول كوحدة مستخدمة في المساحة ممكن نقسمه إلي وحدتين

أ - الوحدات الفرنسية

1 متر = 10 ديسي متر

1 ديسي متر = 10 سم

اذن 1 متر = 100 سم

1 سم = 10 مللمتر

اذن 1 متر = 1000 مللمتر

1 كم = 1000 متر

ب - الوحدات الانجليزية

1 ميل = 1760 ياردة

1 ياردة = 3 قدم

1 قدم = 12 بوصة

1 بوصة = 2.54 سم

واكيد الوحدات الفرنسية هيا الاكثر استخداما فـ العمل المساحي

وخاصة في مجال المساحة الارضية

اما الوحدات الانجليزية ممكن يكون شائع استخدامها في المساحة البحرية

وطبعا لازم نكون علي خلفية كبيرة بكافة التحولات اللي ممكن تتم بين تلك الوحدات

يعني علي سبيل المثال

لو قولنا عندنا 5 متر وعاوزين نحولهم ل مللمتر

هنقول

ان كل 1 متر يقابله 1000 مللمتر

1 م: 1000 مللمتر

5 م : س

هنعمل طرفين في وسطين

اذن

1000 × 5 = 1 × س

اذن

س = 5000 مللمتر

واكيد في الدروس المتقدمة وخاصة في الدروس الخاصة بالميزانية هتقابلنا تحويلات مشابهه لذلك

2- الزوايا

والزوايا يكثر الحديث عنها عن الحديث عن التيودوليت والتوتل استيشن

ولو جينا نضع تعريف للزاوية

فالزاوية هي عبارة عن الفرق بين قراءتين او انحرافين او اتجاهين

ولو تكلمنا عن الانظمة الموجودة في الزوايا هنقول ان هما 3 انضمة او تقديرات

أ- التقدير الستيني ( انجليزي )

والنظام ده بيكون كل درجة فيه = 60 دقيقة

وكل دقيقة = 60 ثانية

بمعني ان

1 درجة = 60 دقيقة

1 دقيقة = 60 ثانية

وهذا النظام بيبدا من الصفر حتي 360 درجة

ب- التقدير المئوي ( الفرنسي GRD )

والنظام ده بيكون كل درجة فيه = 100 دقيقة

وكل دقيقة = 100ثانية

بمعني ان

1 درجة = 100 دقيقة

1 دقيقة = 100 ثانية

وهذا النظام بيبدا من الصفر حتي 400درجة

جـ - التقدير الدائري RAD

والنظام ده بتقل اهميته لكن هنذكره من باب العلم ليس اكثر

ومن خلال الرسم ممكن نوضح خصائص هذا النظام

وهذا النظام يبدا من صفر وينتهي ب 2Pie

اللي هيا بنرمز لها بالرمز ط باللغة العربية والتي تساوي 22/7

ولو حبينا نعمل تحويل بين الانظمة الثلاثة السابقة

يعني مثلا لو عندنا الزاوية 45 بالنظام ال ستيني

هنرسم الرسم التالية مع بعض

ومن خلال الشكل السابق نجد ان الزاوية المراد تحويلها تقع داخل المربع الاحمر المحدد عليه

لو قسمنا الصورة السابقة إلي قسمين

قسم ما قبل ال 45 درجة

وقسم ما بعد ال 45 درجة

واحنا بامكاننا التحويل علي اي قسم فيهم

لو تعاملنا مع القسم الايمن

سنجد

45 درجة : 90 درجة

س درجة : 100 درجة

ص درجة : ط/ 2

حيث ط هيا Pie

تعالو نحول الاول للتقدير المئوي

45: 90

س : 100

طرفين في وسطين

س = 100 × 45 ÷ 90

س = 50 درجة بالتقدير المئوي

اما بالنسبة للتقدير الدائري

45 : 90

ص : ط/2

طرفين في وسطين

ص = 45 × ط ÷ 2×90

ص = ط / 4 بالتقدير الدائري

3- المساحات

الفدان = 4200.83 متر مربع

القيراط = 1 /24 فدان

السهم = 1/24 قيراط

الهكتار = 10000 متر مربع

الدونم = 1000 متر مربع

ودي تعتبر اهم الوحدات المساحية المستخدمة في ايجاد المساحات

وبكده نكون وصلنا لنهاية الدرس الاول

ان شاء الله في الدرس القادم هنتحدث مع بعض عن اهم الاشكال الهندسية التي تهمنا في العمل المساحي وكيفية التعامل معاها

اتمني من الله اني اكون وفقت في اول درس

تحياتي

Hassan Mohamed

**محمود ابوالمجد** · 10-19-2009, 05:38 PM

ممتاز يا بشمهندس حسن ووحشتنا اووووووووي وربنا يقويك علي الشغل

**Marwa Magdy** · 10-19-2009, 05:40 PM

موضوع جاااااااااااااااامد اوى يا حسن
الف الف شكر ليك
اسلوب الشرح فيه كمان بطريقه سلسه اوى وسهله
تتفهم بسرعه بعنى
ان شاء الله اكيد حتابع معاك باقى الحلقات
لانى اكيد حستفاد من الموضوع ده
جزاك الله كل خير
وجعله الله ف موازين حسناتك

**Hassan Mohamed** · 10-19-2009, 07:06 PM

المشاركة الأصلية كتبت بواسطة محمود ابوالمجد

ممتاز يا بشمهندس حسن ووحشتنا اووووووووي وربنا يقويك علي الشغل

ربنا يخليك يا حودة

وانت كمان واحشني جدا

ويارب يكون الموضوع عجبك

**Hassan Mohamed** · 10-19-2009, 07:07 PM

المشاركة الأصلية كتبت بواسطة Marwa Magdy

موضوع جاااااااااااااااامد اوى يا حسن

الف الف شكر ليك
اسلوب الشرح فيه كمان بطريقه سلسه اوى وسهله
تتفهم بسرعه بعنى
ان شاء الله اكيد حتابع معاك باقى الحلقات
لانى اكيد حستفاد من الموضوع ده
جزاك الله كل خير

وجعله الله ف موازين حسناتك

جزاكي الله كل خير يا مروة

واتمني انك تستفيدي من الدروس دي وتتابعي باقي الدورس ان شاء الله