أزعل يعني؟
الطنطاوية يقولوا كده!
بص يا سيدي
الموضوع باختصار ان شاء الله
1- فكك من النظرة التشاؤمية دي خالص.
2- حاول تنزل تدريب في الصيف ده بأي شكل وبأي طريقة وبأي وسيلة إن شاء الله تدفع فلوس.
3- أول ما تنزل تدريب بإذن الله حاول تاخد خبرات الموقع والتعامل مع الناس وخليك صبور خالص عشان تتعلم إن شاء الله.
4- حاول وإنت في الدراسة لما تدخل رابعة إن شاء الله تاخد دورات عالتوتال استيشن وتحاول تطبقها في أي حتع شوف إن شاء الله حتى لو لاقيت ناس شغالين بالتوتال استيشن في الشارع اقف جنبهم واتعلم (بعد استئذانهم طبعا).
5- مستعجل عالسفر ليه؟ وهتسافر بايه وتشتغل ايه؟ هتتمرمط زيادة وتحبط أكتر. أجل السفر لحد إن شاء الله ما تخلص كليتك وبعدين تتدرب في مكان كويس وبعدين تفكر في السفر إن شاء الله.
6- شغل المساحة كبير ومفتوح ومش في مصر بس في الخليج كمان.
7- مستقبل الشغل في المساحة حقيقي وبعد توفيق ربنا رائع والحمد لله وأعرف زمايل لينا ما شاء الله وصلوا لمناصب مرموقة في شركاتهم.
8- تخصصات المساحة كتير ومتنوعة وكل فترة فيه جديد. (أرضية- جوية- بحرية - نظم معلومات جغرافية وغيره طبعا) يعني من دلوقتي ركز على الأرضية مثلا وتجتهد في التدريب.
9- انت لسه صغير وقدامك فترة كبيرة ان شاء الله تثبت نفسك أكتر من كده وعموما يا سيدي لو بدأت تدريب من دلوقتي صدقني هيبقى قدامك فترة كبيرة قوي عشان تشتغل. وهتشتغل ان شاء الله وبكرة تفتكر ان شاء الله.
10- أخيرا إوعى وحسك عينك تفقد الأمل في كرم ربنا أبدا ربك كريم وبيرزق الكافر وبيرزق الدود في الحجر مش هيرزقك إنت؟ اتقي الله وراجع نفسك ونحسبك على خير إن شاء الله وادعي ولح على ربنا في الدعاء وان شاء الله ربنا هيفرجها وياما والله شفنا وحاسس بيك بس برضه ما تقلقش ولسه بدري ان شاء الله.
يا رب يكون كلامي خفيف ولو عايز أكتر راسلني عالخاص أو الايميل وربنا يوفقك ان شاء الله.
سلام عليكم
أخوك
محمد الفرارجي
مابوتو موزمبيق
المفضلات