وظايف وظايف وظايف هيه هيه هيه

[محمد الفرارجي]

السلام عليكم جميعا من أرض الكاجو بين قوسين موزمبييييييييييييق

بعد الصلاة على النبي نخش في الموضووووووووووووووع

دلوقتي اقترحت كام اقتراح في المنتدى وبصراحة انتوا اديتوني الطارشة "ولا مؤاخذة"

فقلت بالرغم من اني مش باحب الإلحاح قلت لازم ألح ووالله الأخت ميرامار هيه اللي شجعتني على كدده ربنا يجازيها خير



الموضوع باختصار

؛ ليه الرابطة ما تبقاش واسطة خير بينا وبين رب العمل اللي محتاج ناس

إزاي؟

أرجو مناقشتها
وعندي شوية اقتراحات وبرضه نفسي نتناقش


1- الرابطة ما شاء الله مش حديثة دي بقى لها سنين يعني ليها علاقات سواء على المستوى الشخصي أو على المستوى الرسمي.
فليه ما تستغلش الرابطة العلاقات بتاعتها في منهجة التوظيف.


2- نعمل داتا بيز يكون فيها كل أسماء شركات المقاولات إللي في مصر وكمان المكاتب المساحية وحتى ماكتب الرسم والاستشاريين وبكده يبقى قطعنا نص المسافة
وده ممكن يتم من خلال الاستعانة بمصادر الاعلانات زي اليولو بيدجيز وكمان مواقع الشركات والمكاتب اللي على النت وكمان المعارف والجرايد وأي وسيلة تعارف
وما اعتقدش ان اي مؤسسة سواء شركة او مكتب بيفتح غير وله سجل تجاري او ملف ضريبي يعني زي ما اساتذتنا علمونا في جمع البيانات في الدراسات العليا والماجستير يدخلو على طول على الغرفة التجارية أو الضرائب العامة ودي اسرع وسيلة للحصول على البيانات الأساسية الخاصة بالعنوان والتليفون وفي المرحلة دي مش مطلوب أكتر من كده.

3- تتحط البيانات دي في قاعدة بيانات محترمة تتعمل عالأقل بالإم سيكويل مش هنقول أوريكال عشان بتوع المصنفات ههههههههههههه المهم بعد الداتا بيز ما تتعمل يكون عليها موظف "فاهم" يعني البيانات تتحدث أول بأول مش تتساب ويبقى وجودها زي عدمها دي بيانات توظيف يعني القديم فيها مالوش احتياج.


4- يتعمل كشف طويل عريض بكل أسماء خريجي الشعبة والجي آي إس على مستوى مصر

5- يتم الربط بين قاعدتين البيانات الخاصة بالشركات والمكاتب وبين القاعدة الخاصة بالطلبة.


6- بالتالي هتكون الرابطة هي مصدر التشغيل الأساسي "مش الوحيد" عشان محدش يفهمني غلط هتكون الوسيط الأساسي في التوظيف لأنها هتكون الواجهة اللي بتعبرعننا

7- من ثم سيتم الاعتناء بالرواتب والحيثيات الاجتماعية والصحية الخاصة بمن يتم تشغيلهم عن طريق هذا المشروع.

8- أساس المشروع خدمي لكنه ربحي في المقام الثاني لأن الرابطة في مصادر الدخل بتعتمد على حاجات مش من مقامها وانتوا فاهمين جو مصر الاقتصادي مفيش مشوار ولا مكالمة تليفون ما بتكلفش والمشروع كله تقريبا قايم على التليفون والاتصالات

9- يحذر على من يقومون على هذه الخدمة استخدام الوسايط ويجوز المقاضاة لصاحب الفرص الأفضل للرابطة "بشرط ان تكون الرابطة على علم بقدرات من فاتت عليه الفرصة لمن هو أقل منه".

10- مصر مش السعودية في مواردها النفطية ولا امريكا في تقدم الاتصالات مصر كده واحنا قابلنها كده وبنحبها كده يعني اللي هيشتغل عن طريق المشروع ده ما لوش الحق انه يتذمر على وضع الرابطة مالهاش يد فيها يعني ما تقعدش شهرين في شركة وترجع تقول اصل انا امكانياتي افضل وعاوز مرتب احسن والله دي مش مشكلة الرابطة دي مشكلة الشركة اللي انت فيها وبعدين ما تبقاش حديث التخرج وتعوز تقبض لي تلات الاف جنيه إنسى يا حسين.

11- زي ما قلت المشروع خدمي ربحي يعني سعادتك هيقتطع نسبة مئوية من راتبك كل شهر لمدة يتم تحديدها من الادارة "ودي ما اقدرش احسبها" كرسم وسيط بين سيادتك وبين صاحب العمل.

12- طبعا صاحب العمل المفروض انه يدفع فلوس وده في حالات السفر للخارج.

13- السفر للخارج طبعا لازم نعمل لينك مع وزارة القوى العاملة عشان نكون عارفين بالمساحين المطلوبين في الدول العربية وبكده انسى حكايات النصب وان حقك مش هيجي لك عشان هيبقى فيه ظهر تتسند عليه.

14- الدول العربية مليانة شركات مقاولات ومكاتب وكلهم طالبين ناس طيب ما نعمل معاهم لينك ويدخلو في الداتا بيز بتاعتنا .

انا بأعيد التركيز تاني


المشروع خدمي ربحي يعني محدش يزعل



احنا بندفع عشرات االألوف عشان نتوظف بعقد انت مش هتدفع مقدم انت سيادتك هتشتغل ومن شغلك هتسدد الخدمة اللي اتقدمت لك
وكمان يا شباب الله يبارك لكوا صدقوني احنا كرابطة اولى من مكاتب السفريات يشيلونا بقى كمساحين من دماغهم ويخليهم في التخصصات التانية


وارجو المشاركة


بصراحة بأحس بإحباط لما محدش بيعبر الموضوع
يا جدعان أخوكوا عايز يساعدموا



وللرابطة رجاء خدوا الاقتراح على محمل الجد وادرسوه وصدقوني مشروع مربح ان شاء الله والرابطة أكبر بكتير من المصادر اللي بتعتمد عليها في الوقت الحالي

وصدقوني انا عانيت على ما وصلت للإلي انا فيه ومحدش ساعدني والا وجهني غير ببركة ربنا سبحانة وتعالى
دا غير ان فيه ناس مش عايزة غيرها يوصل للإلي هيه فيه


المهم وكلامي للإدارة وده من وجهة نظري
إللي عايز صدقة جارية في اليومين دول يشغل شاب
لا هنشوفه على قهوة ولا مخدرات ولا فاضي اصلا للكلام ده
وكمان زي ما هنشغل شاب اكيد هيقدر بعد كده يفتح بيت
وبالتالي هنساهم في عملية الجواز واننتوا عارفين المشاكل والانحلال اللي بسبب قلة الجواز


ربنا يبارك لكم ويجعله في ميزان حسناتكم


وفي النهاية يبقى اقتراح





و يا رب اقدر اساعد حد انه يشتغل ان شاء الله


اه صحيح كنت هنسى



بأعتذر للإطالة
وبأعتذر عن عدم التنسيق

سلام عليكم

[Youssef Mostafa]

موضوع بحييك عليه وعلى تعاونك وعلى تجربتك اللى حضرتك جربتها وعانيت على بال موصلتللى حضرتك فيه وربنا يزيدك وبقول لحضرتك موضوعك مهم جدا جدا

واحب اقول لحضرتك ان الرابطة فعلا بتشغل ناس كتير بس مش لازم تعمل اعلانات انها وظفت فلان او كدة وبتجيب وظايف لناس كتير وفى ناس اشتغلت عن طريق الرابطة وبتخلص الشغل دة وبترجع للرابطة تاااانى عشان الرابطة تشوفلها شغل وربنا يوفقك فى حياتك ويجعلك من الشخصيات المرموقة فى المجتمع ويساعد الشباب وربنا معانا كلنا

[محمد الفرارجي]

يا يوسف باشا ربنا يبارك لك

وربنا يخليك عالمرور الجميل ده

اللي اقصده اكبر من اننا نقول شغلنا فلان والا علان وعلى فكرة لو قلنا شغلنا كام وفين مش هيبقى حرام ولا عيب
اللي اقصده هنا ما يقللش من المجهود والرعاية اللي بتقدموها لكن مجرد توسيع للإقتراحات والمدارك العامة مش أكتر ده من ناحية
من ناحية تانية صدقني كام واحد اشتغل عن طريق الرابطة؟ طب دول كام من الخريجين في مصر
طب كام واحد أصلا في مصر يعرف بموضوع ان الرابطة بتجيب واظيف
إذن اللي أقصده ان المجهود فردي


ودعوته للتنظيم

لأن دي رابطة ومرشح انها تكون نقابة فالعمل الفردي فيها مش أساسها .


لمحت في رد حضرتك انك متضايق وانا معاذ الله اني ازعل حد مني خصوصا في المصلحة العامة
ولاحظت ان حضرتك ركزت في مقولتك إننا مش لازم نعمل إعلانات

أستاذ يوسف انا مختلف مع حضرتك في النقطة دي


الإعلان مهم جدا خصوصا إن الرابطة في حاجة للتوسع والانتشار حتى ولو كانت مغطة كتير بس كطموح عام وتطوير المفروض يكون طموحنا أكبر من كده وما تتخيلش حضرتك فرحت قد إيه لما شفت الدكتور سيد الزغبي مع امين التنظيم في الحزب الوطني وقلت بدأنا نمشي في اتجاه النقابة

والاعلانات عن التوظيف مهمة
واللي بأكلم حضرتك فيه من علم الاتصال

وأرجو انك ما تكونش زعلان من المشاركة

وبأكرر على حضرتك مش عيب نعمل اعلانات
ومش عيب نقول احنا شغلنا كام واحد

وصدقني ده مقياس النجاح

وباشكرك جدا عالمرور

وربنا يبارك لك يا رب

[Youssef Mostafa]

انا طبعا مش زعلان بالعكس اسلوبك فى الحوار ممتع جدا وميزعلش :)
انا كدة فهمت من كلامك ان الرابطة تبقى مسؤلة عن كل المساحين الى فى مصر ومحدش يشتغل الا بواسطتها؟؟؟
ممكنت تجاوبنى وحكمل لحضرتك

[محمد الفرارجي]

يوسف باشا عود أحمد

والله العظيم انا قلت في اللي كتبته وأكدت إنها تبقى ‘نصر أساسي في التشغيل مش عنصر وحدي طب ثواني هجيب اللي كتبته اقتباس والله يا جو الكدب خيبة مش عارف الاقتباس ده بيجي منين؟هههههههههههههههههههههه
فلاح

المهم يا يوسف باشا راجع النقطة رقم ستة في اللي كتبته انا مأكد على ان الرابطة مصدر أساسي مش وحيد واخد بالك حضرتك وكمان على فكرة أكدت عليها قوي وقلت عشان محدش يفهمني غلط

وانا كده مسكت عليك واحده يا ريس بقى وحقي

وزعلان كمان


انت ما قريتش النقط كلها كويس


وعموما حتى الرابطة لو كانت المصدر الأساسي للتشغيل وده مش واقعي
صدقني ده اللي بنرجوه بس طبعا في ناس مش هترضى وبراحتها


يا جماعة المشروع ده مش عشان واحد شغال وبياخد حوالي ألف وخمسمية دولار وعايز يخليهم ألفين المشروع ده للإلي مش لاقي خالص وقاعد ومحبط ووالله العظيم كتير ومش لاقيين شغل
ومنهمناس اسمع انهم يا اما في التدريس او في المبيعات او في اي مجال تاني


والله مجرد مشروع لصدقة جارية للقائمين على الرابطة



وارجوك يا يوسف باشا اوعى تزعل احنا اخوات

ودايما ان شاء الله بينا الخلاف في الرأي لايفسد للود قضية


راجع نقطة رقم 6

[Mohamed Hashem]

والله يا محمد يا اخويا كلامك زين
هو طبعا محتاج كوبايتين شاى تقيل وترابيزة مدوره وقلم وشوية ورق ونقعد مع بعض
نبلور الفكره دى فى شكل قابل للتنفيذ
انت سيد العارفين الحاجات دى لها عوامل كتير لازم تتاخد فى الحسبان
بس الفكره ممتازة .. وباضم صوتى لصوتك ان اكتر ناس حيستفيدوا حديثو التخرج
بس هو محدش طنش ولا حاجه .. الموضوع بس ان فى امتحانات اليومين دول وربنا معاهم معلش اعذرهم
انا حاسس بحماسك طبعا ... ومر عليا اللى بتوصفه .. أصل اللى سمع غير اللى شاف وأحنا شفنا يا أخويا
ما علينا - نقول بقى الكلمتين بتوع كل مرة هههههه - أحييك على موضوعك .. ونتصل بقى سوا نكمل تفكير لحد ما يخلصوا امتحاناتهم
ونرتب لقاء بقى على الاجازة الجاية

[دكتور / السيد الزغبى]

الاخ العزيز محمد الفرارجى سعدت جدا باقتراحك وهو اقتراح ايجابى وممتاز ورائع وانا نفسى اصل بالرابطة الى هذا المستوى الكبير من المشاريع الخدمية وعندك حق ان المفروض ان العملية تكون منظمة اكتر من المجهود المبذول والغير محسوس لدى الاعضاء كما انه مربح جدا وسوف يكون مصدر دخل كبير للرابطة حيث ان الرابطة محتاجة الى موارد مالية كبيرة حتى تستطيع ان تقوم بدورهالان الموارد الحلية والمتمثلة فى اشتراك العضوية ومركز التدريب غير كافية ومش مقام الرابطة لكن انا ساحاول بكل جهد ان انفذ هذا الاقتراح لانه مهم جدا وراقى ومتقدم واتمنى ان اراك قريبا مباشرة وانك تساعدنى فى تنفيذ هذا الاقتراح ولك منى جزيل الشكر والتقدير

[Mohamed Hashem]

دكتور سيد
لك جزيل الشكر ... وانا يشرفنى اشترك معاكم ..
أنا قلت لمحمد الموضوع محتاج ورقة وقلم والفكرة تتبلور ... والشاى بقى حضرتك تعزمنا عليه
يارب ألحق .. اجازتى فى نصف شهر سبعه .. أنا حريص على المشاركة فى عمل زى دا والله
وربنا يجعلك دائما فى مساعدة الآخرين
مرة تانية شكرا جدا لحضرتك

[محمد الفرارجي]

يا خبر ابيض يا دكتور
حضرتك بنفسك اللي بترد
والله شرف كبير جدا

والله مش عارف اوصف احساسي وربنا الأعلم


بس والله انا مش عارف اقول لحضرتك ايه؟


انا اصلا مش في مصر خالص والله

انا باعمل شغل للشركة في موزمبيق وان شاء الله اجازتنا كل اربع شهور

واكيد لازم اتصل بحضرتك

يا افندم والله كل الي اقدر عليه هيتعمل ان شاء الله

وارجو المعذرة إني خارج البلد بس فعلا اللي هقدر عليه هعمله ان شاء الله ويكفيني شرف ان حضرتك رديت على موضوعي


ابنك محمد
السويدي للكابلات
مابوتو موزمبيق

[محمد الفرارجي]

ايه ده ايه ده؟

الله الله وكمان محمد باشا لالالالا

محمد باشا انا وشي سخن الابتوب ووداني مولعة نار

بس المشكلة اني دلوقتي

في مجاهيل افريقيا

هههههههههههه

أم زمبيق

ان شاء الله اجازتي خمسة تسعة

ووالله ان شاء الله بأوعد ان كل اللي اقدر عليه هيكون في خدكتكم ان شاء الله