مرحب بسنه تانيه دفعه 2012

**Horiaa Swedan** · 10-04-2009, 12:31 AM

بسم الله الرحمن الرحيم

والصلاه والسلام على اشرف الخلق اجمعين

مرحب بسنه تانيه دفعه 2012

كل سنه وانتم طيبين اخواتى وزملائى دفعه تانيه الجديده

يارب تكونوا بخير وباحسن حال ، وربنا يوفقكم السنادى سواء للى عايزين يدخلوا شعبه نظم معلومات او شعبه مساحه وخرايط.

انا اختكم حوريه طالبه بالفرقه التالته شعبه نظم معلومات جيت ارحب بيكم واقولكم حاجات ملقتش حد يقولهالى يمكن تنفعكم.

اولا سنه تانيه مش ساهله زى اولى ومش صعبه فى نفس الوقت بس محتاجه شغل بجد

محتاجه حضور والتزام وتبيض اول باول ومرجعه اللى بتخده

اهم حاجه الالتزام بكلام المحاضره ومزجها بالكتاب

موادكم السنادى حلوه جدا وسلسه مش صعبه اوعوا تركزوا على مواد المساحه وتنسوا باقى المواد واعرفوا ان كل المواد محتاجه شغل

عندكم السنادى باذن الله

اولا : جيومورفولوجيا

ودى من اجمل المواد اللى ممكن دراستها لانها بتدرس دراسه طبيعيه لسطح الارض وبتخرج بره حاجز الزمن عشان تدرس حاضر وماضى ومستقبل كل ظاهره موجوده على سطح الارض زى تكوين الجبال وتكوين جميع مظاهر الارض من خلال عوامل طبيعيه وبشريه الخ

ثانيا : الجغرافيه المناخيه

تدرس مناخ سطح الارض والعوامل المؤثره فيه بطرق مباشره وغير مباشر كما تدرس عناصر المناخ المختلفه وترتبها زى الاشعاع الشمسى والتساقط وغيرها من العناصر كمان بتدرس طرق قيسها والاجهزه اللى بتتقاس بيها وفى النهايه بتاخد منظومه لتوزيع المناخ لعلماء مختلفه
والترم التانى بيكون مطلوب منك تدرس اثر الظواهر دى على سطح الارض وتاثرها على مظاهر الحضر زى نشاط الانسان " زراعه صناعه نقل " ووعلاقها براحه الانسان وعلاقتها بغذائه وفى النهايه تدرس الظاهرات الخطيره فى سطح الارض زى الاحتباس الحرارى والنينو الخ.

ثالثا : الاساليب الكميه والاحصائيه

ودى اول ماده مساحيه بنتناولها ماده لذيذه وجميله بتتبلور حول الرياضه والفكر الاحصائى باختصار ازاى تتعامل مع بيانات
عندك بيانات عن كليه مثلا عدد التلاميذ فيها وتخصصتهم انت بتدرس ازاى بتجمع البيانات عنهم اذا كان من خلال عينا استرشاديه او اسلوب مباشر وغير مباشر اسلوب حصر شامل او من خلال مجله كتاب دفاتر الصحه الخ
وتبدأ تبوب البيانات وتحطها فى جداول بانوعها تكراريه ومتجمع صاعد وهابط الخ
بعدين تبدأ تعالج البيانات وتعملها رسمه ممكن منحنى تكرارى مضلع تكرارى مدرج الخ
وتقيم عليها بعض العلاقات اللى بتكون عباره عن قوانين زى ايجاد الوسط والوسيط والمنوال كلها قوانين جميله وسهله محتاجه فكر رياضى ومتابعه.

رابعا: ماده النصوص الجغرافيه باللغه

دى انجليزى زى السنه الماضيه مصطلحات وموضيع جغرافيه معروضه باللغه الانجليزيه.

خامسا: الجغرافيه الحيويه

ماده حيويه بتدرس كل ما هو هى على سطح الارض بفكر جغرافى يعنى النبات على سطح الارض وانواعه وانواع الغابات وتقسمه وتوزيعه على سطح الارض
والحيوان كمان والتربه وكل شئ حى موجود على سطح الارض . ماده ترم واحد

سادسا : جغرافيه اسيا
دراسه اقليميه زى افريقيا والوطن العربى بتكون فى الترم التانى باذن الله من خلاللها بندرس قاره اسيا موقعها الجغرافى والفلكى ومظاهر سطحها جبال ومحيطات وانهار واهم معالمها الحضاريه ومناخها ونباتتها وتربتها وسكنها ومرحله الكشوف الجغرافيه لها وسياستها وننتهى باخذ مثال او اكثر على احدى المدن الكبيره بها مثل الهند والصين واليابان.

سابعا: مساحه مستويه

قلب الدراسه ماده فى منتها الجمال للى بيحب مجال المساحه وهى من خللها بندرس يعنى ايه مساحه وايه هى طرق قياس مساحه رقعه من الارض بالطرق القديمه او بالاجهزه او بالصور الجويه كما نرى حديثا
وهى تنقسم بين دراسه الطرق القديمه زى الجنزير والبوصله البلنشيطه الى الوصول للقياس التاكيومترى وهو بالاجهزه البصريه زى الميزان والتوتل والتيدوليت وده لرفع منطقه ما
ومن خلال هذه الماده بنتعرف على مفاهيم عديده مثل مقياس الرسم وهو النسبه بين الابعاد على الطبيعه والابعاد على الخريطه او الرسم وده اللى بيحددلى مقدار التصغير اللى عملته كمان بنتعلم ازاى نقيس اى شكل على الخريطه بالطرق المختلفه زى المسطره والديفيدر وعجله القياس او البلانيميتر او الطرق التخطيطيه زى طريقه المربعات او الخطوط المتوازيه الخ وننتهى فى النهايه بدراسه المساحه التصويريه والتى تتم من خلال اخراج خرايط عن طريق صور التقطه بكاميره طائره
كما نجد اخر فصل وهو الابصار المجسم والذى تتلخص فكرته فى كيفيه رؤيه الاشياء مجسمه اى بثلاث ابعا.

ثامنا : جغرافيه السكان

وهى تدرس المجتمعات البشريه واى حاجه بتاثر على الانسان زى الوفيات والموليد وتغير فئات العمر المختلفه وهرم العمر وازاى بنقسمها .
كمان بندرس الخصائص المكتسبه والتعليم والزواج والعادات والتقليد كل ما يؤثر على المجتماعت وعلى الانسان.

اتمنى انى اكون قدرت افدكم بحاجه ومكنش نسيت اى حاجه واهم حاجه الرسوماااااااااااااااااااااااااااااااااااااااااااا اااااااااات والمصطلحات الانجليزيه والخط المنظم والجمل المنسقه والحضور والكتاب واضمنلكم الامتياز ان شاء الله.

ربنا الموفق للجميع ويارب مكنش طولت.

**Mahmoud Slem** · 10-04-2009, 12:33 AM

هههههههههههههههههههههههههههههه

الله ينور شغل جامد قوى

جزاكى الله كل خير

**Horiaa Swedan** · 10-04-2009, 12:37 AM

المشاركة الأصلية كتبت بواسطة Mahmoud Slem

هههههههههههههههههههههههههههههه

الله ينور شغل جامد قوى
جزاكى الله كل خير

جزانا واياك ان شاء الله ده ملخص سنه من عمرى لو كل واحد يحاول يفيد غيره باللى يعرفه حتى لو كان بسيط حاجات كتير حتتغير

**sameh gamal** · 10-04-2009, 12:39 AM

بجد ياحوريه تسلم ايدك وشغل جميل جدا وربنا يارب يوفقهم ويوفقك وبجد الفكرة جميله انى كل واحد اكبر من حد هنا يديله الدليل اللى يتحرك بيه لاننا كلنا هنا اخوات

**Horiaa Swedan** · 10-04-2009, 12:56 AM

المشاركة الأصلية كتبت بواسطة sameh gamal

بجد ياحوريه تسلم ايدك وشغل جميل جدا وربنا يارب يوفقهم ويوفقك وبجد الفكرة جميله انى كل واحد اكبر من حد هنا يديله الدليل اللى يتحرك بيه لاننا كلنا هنا اخوات

ربنا يكرمك يا سامح وياريت كلنا ننفذ ياجماعه عشان تعم الفائده واى سؤال يا سنه تانيه قولوا وان شاء الله اجوبكم لو اعرف

**spider girl** · 10-04-2009, 01:06 AM

ربنا يخليكى يا حوريه

بجد مش عارفه اقولك ايه

ربنا يجازيكى كل خير

انا هدعى كل صحابى فى دفعتى

انهم يشوفوا الموضوع ده

فعلا هيستفادوا كتير لان كل سؤال فى زهنهم هيلاقوا اجابتوا هنا

الف شكر يا حببتى

**مى رسمى** · 10-04-2009, 01:14 AM

تسلم اديكى ياحوريا ويارب ديما تكونى عضو فاعل

ونافع لغيرك حتى لو جزء بسيط

وتذكرى دائما قول الشاعر

ولاتحقرا من المعروف شيئا ان الجبال من الحصى والرمال

جزاكى الله خير الجزاء

**Horiaa Swedan** · 10-04-2009, 01:22 AM

المشاركة الأصلية كتبت بواسطة spider girl

ربنا يخليكى يا حوريه

بجد مش عارفه اقولك ايه

ربنا يجازيكى كل خير

انا هدعى كل صحابى فى دفعتى

انهم يشوفوا الموضوع ده

فعلا هيستفادوا كتير لان كل سؤال فى زهنهم هيلاقوا اجابتوا هنا

الف شكر يا حببتى

:animation343py::110:

اخيرا حد من تانيه ظهر العفو ياحبى انتوا اخواتى واصحابى وزميلى ويارب فعلا الموضوع يكون نافع بالنسبلكم واتمنى يفيد الجميع واى حد يحتاج حاجه يقول وميتكسفش وان شاء الله متاخرش